لاہور: قومی احتساب بیورو ( نیب) نے سابق وزیر اعلیٰ پنجاب عثمان بزدار کو گرفتار کرنے کا فیصلہ کرلیا اور چیئرمین نیب سےوارنٹ گرفتاری جاری کرنے کیلئے استدعا کردی۔
تفصیلات کے مطابق سابق وزیراعلیٰ پنجاب عثمان بزدار پر نیب تحقیقات کے معاملے پر نیب لاہور نے عثمان بزدار کی گرفتاری کا فیصلہ کرلیا۔
ذرائع نے بتایا کہ چیئرمین نیب سے وارنٹ گرفتاری جاری کرنے کیلئے استدعا کردی ہے ، نئے آرڈیننس کےتحت عثمان بزدار کو دوران انکوائری بھی گرفتار کیا جا سکتا ہے۔
ذرائع کا کہنا ہے کہ عثمان بزدار پر نئےآرڈیننس کااطلاق کرنے کافیصلہ کیا گیا، عثمان بزدار طلبی کےباوجود 14ویں مرتبہ نیب لاہور میں پیش نہیں ہوئے۔
ذرائع نے کہا ہے کہ وکیل نے استدعا کی تھی کہ عثمان بزدار نیب لاہور پیش نہیں ہو سکتے، جس پر نیب نےعثمان بزدار کےوکیل کی استدعا مسترد کردی۔
ذرائع کے مطابق نیب نے عثمان بزدار کے وکیل سے جواب وصول کرنے سے بھی انکار کردیا ہے، عثمان بزدار کیخلاف آمدن سےزائداثاثہ جات، تقرر و تبادلے اور ٹھیکوں میں بےضابطگی کا کیس چل رہا ہے۔
عثمان بزدار سمیت خاندان پر 9 ارب سے زائد اثاثہ جات بنانے کا کیس زیر تفتیش ہے جبکہ ان کے خلاف گندم برآمد کیس بھی زیر تحقیقات ہے۔
