ابوجا: افریقی ملک نائجیریا میں نقدی کا بحران شدید ہونے پر اے ٹی ایمز کے سامنے لوگوں کی قطاریں بن گئیں۔
غیر ملکی میڈیا رپورٹس کے مطابق نائجیریا میں نئے نوٹوں کی شدید قلت کے باعث لوگوں کو اشیائے خورد و نوش کی فراہمی بھی مشکل ہو گئی ہے۔
افریقہ کی سب سے بڑی معیشت نائجیریا میں کیش مشینوں کے سامنے قطار پہلے ایک غیر معمولی بات تھی، مگر اب کئی ہفتوں سے اس ملک میں یہ ایک معمول کا منظر بن چکا ہے، اور نقدی کے بحران نے ایک افراتفری کی سی شکل اختیار کر لی ہے۔
رپورٹس کے مطابق نائجیریا میں زیادہ تر لوگوں کی بچت بینکوں میں پھنسی ہوئی ہے، کرنسی کے ڈیزائن میں تبدیلی کی وجہ سے ملک صدارتی انتخابات سے عین قبل نقدی کے بحران میں مبتلا ہو گیا ہے، کیوں کہ یہ ملک نقدی پر انحصار کرتا ہے۔
نوٹوں کی عدم دستیابی کی وجہ سے شہریوں کو کھانے کے بھی لالے پڑ گئے ہیں، یہی وجہ ہے کہ نوٹوں کے حصول کے لیے کیش مشینوں کے باہر لمبی قطاریں لگی نظر آنے لگی ہیں۔
یاد رہے کہ گزشتہ برس نائجیریا کے مرکزی بینک نے نئے کرنسی نوٹوں کے اجرا کا اعلان کیا تھا، شہریوں کے پاس رواں برس 31 جنوری تک کا وقت تھا کہ وہ پرانے کرنسی نوٹوں کو نئے نوٹوں سے تبدیل کروا لیں، یہ ڈیڈ لائن گزر گئی اور تمام افراد نئے نوٹوں کے حصول میں ناکام رہے تو سرکار نے 10 فروری کی دوسری ڈیڈ لائن دے دی۔
تاہم نائجیریا کی سپریم کورٹ نے تین ریاستوں کی جانب سے اٹھائے گئے قانونی نکات کے بعد یہ ڈیڈ لائن معطل کر دی ہے، ان ریاستوں کا مؤقف تھا کہ نوٹوں کی تبدیلی کی وجہ سے انتخابات کے انعقاد کے حوالے سے مسائل پیدا ہو رہے ہیں۔
