کراچی : پیپلزپارٹی سندھ کے نومنتخب صدر نثار کھوڑو نے کہا ہے کہ اسٹیٹ بینک کو لاہور منتقل کرنے کی سازش کامیاب نہیں ہونے دیں گے، انہوں نے کہا کہ کراچی میں تعصب کی سیاست اور دہشت گردی نے بہت کچھ برباد کیا ہے، گھر کے بھیدی اور جرم کے ساتھی اب ایک دوسرے کے راز کھول رہے ہیں۔
ان خیالات کا اظہار انہوں نے کراچی میں جمعہ کو پیپلز سیکریٹریٹ اور اپنی رہائش گا ہ پر مبارکباد کے لیے آنے والے کارکنان سے خطاب کرتے ہوئے کیا، نثار کھوڑو نے کراچی میں پارٹی کو مضبوط بنانے کا عزم کرتے ہوئے جیالوں کو کراچی میں پارٹی کی تنظیم سازی کاٹاسک بھی دیا۔
انہوں نے کہا ہے کہ پارٹی کارکنان آئندہ انتخابات کی بھرپور تیاری کرلیں ، 2018ء کے انتخابات کا دن ملک بھر میں تیر کی فتح کا دن ثابت ہوگا اور بلاول بھٹو زرداری کو وزیراعظم بنا کر دکھائیں گے۔
نثار احمد کھوڑو نے کہا کہ نواز شریف اور عمران خان دونوں بند گلی میں پھنس چکے ہیں ، نواز شریف کے بعد ایک آمر کے ریفرینڈم کے حمایتی عمران خان نے پارلیمنٹ کے مشترکہ اجلاس سے بائیکاٹ کرکے خود کو بھی مودی کا یار ثابت کیا ہے اور یہ دونوں ملک کے عوام کو مزید بیوقوف نہیں بنا سکتے۔
نثار احمد کھوڑو نے کہا کہ ن لیگ پیپلز پارٹی کے چار مطالبات تسلیم کرلے ورنہ 27 دسمبر کے بعد نواز شریف کو بند گلی سے بھی نکلنے کا موقع نہیں ملے گا۔
انہوں نے کہا کہ نوازشریف حکومت کی ناکام پالیسیوں کی وجہ سے دنیا میں پاکستان کا امیج خراب ہورہا ہے تو دوسری طرف پانامہ لیکس معاملے کے بعد نوا ز شریف کے وزرات عظمیٰ کے عہدے پر بھی سوالیہ نشان آچکا ہے اس لئے وہ خود کو بھی احتساب کے لیئے پیش کریں اور پیپلز پارٹی انھیں بھاگنے نہیں دے گی۔
نثارکھوڑو کا کہنا تھا کہ ن لیگ اب اسٹیٹ بینک لاہور منتقل کرنے کی سازش کررہی ہے جس کی مذمت کرتے ہیں اور سازش کامیاب نہیں ہونے دیں گے۔
