انڈین پریمیئرلیگ (آئی پی ایل) کی ٹیم ممبئی انڈینز کی نمائندگی کرنے والے بھارتی بلے باز سوریا کمار یادیو نے ویرات کوہلی کا اہم ریکارڈ توڑ دیا۔
بھارتی بلے باز سوریا کمار یادیو نے آئی پی ایل کی تاریخ میں تیز ترین 4 ہزار رنز بنا کر ریکارڈ قائم کردیا ہے اور انہوں نے یہ سنگ میل رواں سیزن میں لکھنو سپر جائنٹس (ایل ایس جی) کے خلاف وانکھڈے اسٹیڈیم میں حاصل کرلیا۔
سوریا کمار نے آئی پی ایل کی تاریخ کے تیز ترین 4 ہزار رنز مکمل کرنے کے لیے دو ہزار 714 گیندوں کا سامنا کیا جبکہ اس سے قبل یہ ریکارڈ کے ایل راہل کے نام تھا جنہوں نے دو ہزار 820 گیندوں پر 4 ہزار رنز اسکور کئے تھے۔
سوریا کمار ٹی20 کرکٹ میں مجموعی طور پر تیز ترین 4 ہزار رنز بنانے والے بیٹرز میں دنیا میں تیسرے نمبر پر ہیں، جنوبی افریقہ کے اے بی ڈی ولیئرز اور ویسٹ انڈیز کے کرس گیل نے دو ہزر 658 گیندوں پر 4 ہزار رنز بنا کر یہ ریکارڈ بنایا تھا۔
آئی پی ایل کے میچ میں لکھنو سپرجائنٹس کے خلاف سوریا کمار نے 28 گیندوں پر 54 بنائے تھے اور اس دوران انہوں نے آئی پی ایل کی تاریخ میں 150 چھکے لگانے کا سنگ میل بھی عبور کرلیا اور مزید ایک ریکارڈ بنانے میں کامیاب ہوگئے۔
واضح رہے کہ سوریا کمار میچ کے دوران اسٹمپ مائیک سے دور رہتے ہیں، اس کی انھوں نے دلچسپ وجہ بیان کی ہے۔
سوریہ کمار کے پیشرو روہت شرما میچ کے دوران اسٹمپ مائیک پر اپنے تبصروں کے لیے جانے جاتے ہیں، مداح ان کی اس حرکت سے لطف اندوز بھی ہوتے ہیں جبکہ ان کے کلپ سوشل میڈیا پر وائرل ہوتے بھی نظر آتے ہیں۔
ان کی سب سے مشہور اسٹمپ مائیک کلپ میں سے ایک یہ بھی ہے کہ وہ ساتھی پلیئر پر میچ کے دوران برس رہے تھے کہ ’گارڈن میں گھوم رہے ہو کیا‘، روہت میچ کے دوران سست فیلڈنگ پر یہ جملے کہتے نظر آئے تھے۔
سوریہ کمار سے حال ہی میں پوچھا گیا کہ کیا بھارتی کرکٹر اب بھی باغ میں گھومتے ہیں، اب جب کہ روہت ریٹائر ہو چکے ہیں، سوریا کمار نے مزاحیہ انداز میں کہا کہ وہ اپنے فیلڈرز پر گھومنے پھرنے پر پابندیاں نہیں لگاتے کیونکہ اب کوئی ایسا نہیں کرتا۔
سوریہ کمار نے یہ بھی بتایا کہ جتنا ہو سکتا ہے وہ میچ کے دوران اسٹمپ مائک سے دور رہنے کی کوشش کرتے ہیں، بھارتی ٹی ٹوئنٹی کپتان کے مطابق کسی کی خاصیت ان کے پاس ہی رہنی چاہیے۔
بھارتی جارح مزاج بیٹر نے کہا کہ میں اسٹمپس سے دور رہنے کی کوشش کرتا ہوں اگر یہ کسی کی خاصیت ہے، پھر یہ بہتر ہے کہ یہ صرف اس شخص کے ساتھ رہے۔
