ایکس کے مالک ایلون مسک کے سیلوٹ کے اشارے کو سوشل میڈیا صارفین نے نازی سیلوٹ سے مشابہ قرار دے دیا۔
کیپیٹل ون ایرینا میں خطاب کے دوران ایلون مسک نے عوام کا شکریہ ادا کرتے ہوئے دائیں ہاتھ کو اپنے سینے پر مارا، اپنی ہتھیلی نیچے اور انگلیوں کو ایک ساتھ رکھتے ہوئے بازو کو ہوا میں سیدھا بلند کیا۔
ایلون مسک نے اس کے بعد اپنے پیچھے موجود ہجوم کی جانب مڑ کر دوبارہ یہی اشارہ کیا، یہ نازی سیلوٹ کی طرح لگتا ہے، اور فاشزم اور عدم برداشت کی علامت سمجھا جاتا ہے۔
سوشل میڈیا صارف پیٹریاٹ ٹیکس نے ٹویٹ میں لکھا ایلون مسک نے یکے بعد دیگرے نازی سلیوٹ کیے، پاپ فلاپ ٹوئٹر اکاؤنٹ نے ایلون مسک اور ہٹلرکے سیلوٹ والی تصویر شیئر کی۔
ایلون مسک نے اپنی جوابی پوسٹ میں لکھا کہ اعتراض کرنے والوں کو بہتر اوچھے ہتھکنڈوں کی ضرورت ہے، ہر کوئی ہٹلر ہے والا حربہ بہت پرانا ہو چکا ہے۔
اسٹیج پر ایلون مسک کا ڈانس بھی وائرل ہوا، اور انھوں نے ایک بار پھر ’ذریں دور‘ کی آمد کی ڈونلڈ ٹرمپ کے عزم کا ذکر کیا، اور اسٹیج پر جوش و خروش کا مظاہرہ کرتے ہوئے کہا کہ جب کوئی جیتتا ہے تو ایسا ہی محسوس ہوتا ہے۔
اسلام آباد : صاحبزادہ حامد رضا کا کہنا ہے کہ اگر بات نہیں بنتی تو پھر سڑکوں پر دمادم مست قلندر ہوگا، ہم سڑکوں کے لوگ ہیں سڑکوں پرآئیں گے۔
تفصیلات کے مطابق پروگرام الیونتھ آور پاکستان تحریک انصاف کی مذاکراتی کمیٹی کے رکن حامد رضا نے اے آر وائی نیوز کے پروگرام الیونتھ آور میں گفتگو کرتے ہوئے کہا کہ بائیڈن انتظامیہ نے پاکستان کےاندرونی معاملات میں مداخلت کی تھی، ہم سمجھتےہیں ٹرمپ انتظامیہ اندرونی معاملات میں مداخلت نہیں کرے گی۔
کمیٹی کے رکن کا کہنا تھا کہ بانی پی ٹی آئی پاکستان کےقوانین اورعوام کےذریعےباعزت بری ہوں گے ، جس بانی پی ٹی آئی کےنام پر کاٹا لگایا تھا ان کی کمیٹی کیساتھ مذاکرات کیے گئے، ہمیں کہا گیا اس ملک میں بھی نہیں رہ پائیں گے ہم سے مذاکرات کیے گئے۔
انھوں نے کہا کہ 6 ماہ کہاں 2،3 ماہ کی بات ہے، بانی پی ٹی آئی جیل سے باہرہوں گے، کچھ مشاہدات اورکچھ اطلاعات کےمطابق بانی پی ٹی آئی جلد رہا ہوں گے۔
صاحبزادہ حامد رضا نے بتایا کہ مذاکرات کی چوتھی نشت مشروط ہے، حکومت جوڈیشل کمیشن بناتی ہےتوٹی اوآرز کےلیےچوتھی نشست ہوسکتی ہے، حکومت جواب الجواب دینا چاہتی ہے تو پھر ہم چوتھی نشست کے موڈ میں نہیں۔
ان کا کہنا تھا کہ حکومت 2014 پر جانا چاہتی ہے تو ہم نواز شریف ڈیل معاملےپرجائیں گے، 2014 کے بعد بھی دھرنے ہوئے ہیں ہم اس پر بھی جائیں گے، ہم اصغرخان کیس پر بھی جائیں گے، 2014 پر جا سکتے ہیں تو پھر اس سے پیچھے جانا قانوناً جرم تو نہیں۔
حامد رضا نے مزید کہا کہ اب اگربات نہیں بنتی تو پھر سڑکوں پر دمادم مست قلندر ہوگا، ہم سڑکوں کےلوگ ہیں سڑکوں پرآئیں گے۔
ترکیہ کے شمال مغربی حصے میں ایک سیاحتی مقام پر ایک کثیر منزلہ ہوٹل میں آتشزدگی کے باعث 10 افراد لقمہ اجل بن گئے، ملکی وزیر داخلہ کی طرف سے ہلاکتوں کی تصدیق کردی گئی ہے۔
غیر ملکی ذرائع ابلاغ کے مطابق ترک وزیر داخلہ علی یرلیکایا کا ایکس پر کہنا تھا کہ ترکیہ کے شمال مغربی صوبے بولُو میں آتشزدگی کے باعث 32 دیگر افراد زخمی بھی ہوئے ہیں۔
مقامی میڈیا کا کہنا ہے کہ آگ کرتالکایا نامی شہر کے ایک ہوٹل میں گزشتہ شب لگی، تاہم اس حوالے سے مزید معلومات حاصل نہیں ہوسکیں کہ آتشزدگی کا واقعہ کیسے رونما ہوا، مزید یہ کہ آتشزدگی کی اطلاع ملنے کے بعد آگ بجھانے والی درجنوں گاڑیاں اور ایمبولینس موقع پر پہنچ گئیں۔ کرتالکایا مقامی سیاحوں کے لیے ایک معروف اسکیئنگ مقام ہے۔
مقامی میڈیا اور سوشل میڈیا پر سامنے آنے والی ویڈیوز میں دیکھا جاسکتا ہے کہ آگ کے شعلے اس ہوٹل کی اوپری منزلوں کو اپنی لپیٹ میں لیے ہوئے ہیں۔
ریسکیو حکام آج منگل کی صبح تک اس آگ کو بجھانے کی کوششوں میں مصروف تھے۔
ترک میڈیا کے مطابق لکڑی کے بنے فرش کے باعث آگ ہوٹل میں تیزی سے پھیل گئی، سامنے آنے والی ویڈیوز میں ہوٹل میں موجود افراد کو انتہائی پریشانی کے عالم میں بستر کی چادروں کو آپس میں باندھ کر ان کے ذریعے ہوٹل سے باہر نکلنے کی کوشش کرتے دیکھا جا سکتا ہے۔
ایک عینی کا کہنا تھا کہ جس وقت یہ آگ لگی تھی میں وہاں موجود تھا، آگ نے بہت جلد ہوٹل کو اپنی لپیٹ میں لے لیا، لوگ کھڑکیوں سے باہر کود رہے تھے۔
گورنر خیبرپختونخوا فیصل کریم کنڈی نے کہا ہے کہ وزیراعلیٰ کے پی علی امین گنڈا پور نے صوبہ دہشتگردوں کے حوالے کردیا ہے۔
تفصیلات کے مطابق گورنر خیبرپختونخوا فیصل کریم کنڈی نے ایک بیان میں کہا ہے کہ وزیراعلیٰ کے پی اور وزیر اعلیٰ پنجاب کے بیانات سنے ہیں، جس کے باس کوئی دلیل نہ ہو تو آئیں بائیں شائیں باتیں کرتا ہے۔
فیصل کریم کنڈی نے کہا کہ ریاست مینڈیٹ نہ دے تو کیا صوبائی سطح پر معاہدے ہونگے، پہلے بھی انہوں نے جرگہ بھیجا تھا جنہوں نے دہشتگردوں کو آباد کرایا۔
انہوں نے کہا کہ وزیراعلیٰ کے پی نے صوبہ دہشتگردوں کے حوالے کردیا ہے، ریاست جب تک اجازت نہیں دے گی وفد بھیجنے کا فائدہ نہیں ہوگا، اگر آپ صوبہ نہیں سنبھال سکتے تو آپ وفاق سے فوج طلب کرلیں، اگر وفاق آپ کو فوج نہیں دیتی تو پھر بات ہوگی کیوں نہیں دے رہی۔
فیصل کریم کنڈی نے کہا کہ کرم کا 25 کلو میٹر روڈ ہے، صوبائی حکومت اپنی رٹ قائم نہیں کرسکی، انہوں نے کابینہ کا اجلاس تک نہیں بلایا، یہ امن چاہتے ہی نہیں ہیں، وفاقی حکومت نے اپنے وفود پہلے بھی افغانستان بھیجے ہیں۔
گورنر کے پی نے کہا کہ وزیراعلیٰ کے پی فلمی ڈائیلاگ بولتے ہیں،کبھی آپ کے پیچھے تو کبھی میرے پیچھے، پہلے کہتے تھے کہ پیسے نہیں ملتے اب انہیں کرپشن سے ہی نجات نہیں مل رہی، وفاق نے کےپی کو پیسے دیے جو کرپشن کی نذر ہوگئے۔
فیصل کریم کنڈی نے کہا کہ علی امین گنڈا پور کے دو روپ ہیں، اندر بیٹھے ہوں تو اچھے بچوں کی طرح ہوتے ہیں، یہ باہر آکر ریمکس گانے لگا دیتے ہیں، یہ بتاتے ہیں میری مجبوری ہے، 6 گھنٹے غائب بھی ہوتے ہیں، چائے پی کر باہر آجاتے ہیں 12 ضلع گھوم لیتے ہیں، جو وزیر اعلیٰ 12 ضلع گھوم کر آرہا ہو اور پھر بھی چھپ رہا ہو تو اس فلم کا نام کیا رکھیں؟
عالمی بینک نے رواں عالمی اقتصادی امکانات رپورٹ 2025 جاری کر دی ہے جس میں پاکستان سمیت دیگر ممالک کی اقتصادی اور معاشی حالات سے متعلق پیشگوئی کی گئی ہے۔
عالمی بینک کا اپنی رپورٹ میں کہنا ہے کہ پاکستان میں عام انتخابات کے بعد سیاسی عدم استحکام میں کمی ہوئی ہے۔ زرعی اور صنعتی شعبہ کی کارکردگی میں بہتری آ رہی ہے جب کہ مستحکم کرنسی اور مہنگائی کنٹرول کرنے سے میکرو اکنامک استحکام نظر آیا ہے۔ تین سال بعد مہنگائی سنگل ڈیجیٹ میں آئی ہے اور مہنگائی میں کمی کے بعد مرکزی بینک نے بھی پالیسی ریٹ میں کمی کی ہے۔
رپورٹ میں بتایا گیا ہے کہ عدم استحکام کی فضا میں کمی سے کاروبار اور سرمایہ میں اضافے کی توقع ہے۔ تاہم پاکستان میں تاحال سخت مالی نظم و نسق کی پالیسی اختیار کی جا سکتی ہے۔
رپورٹ میں اس جانب بھی اشارہ کیا گیا ہے کہ بے روزگاری کے باعث نوجوانوں کی بڑی تعداد روزگار کیلیے بیرون ملک کا رخ کر رہی ہے۔
عالمی بینک نے اپنی رپورٹ میں کہا ہے کہ پاکستان کو آئی ایم ایف قرض پروگرام پر مکمل کاربند رہنا ہو گا کیونکہ پروگرام پر سختی سے عملدرآمد نہ ہونے کی صورت میں معاشی سرگرمیوں پر اثر پڑے گا۔
ورلڈ بینک نے رواں مالی سال کے دوران پاکستان کی جی ڈی پی گروتھ 2.8 فیصد رہنے کی پیشگوئی کی ہے جب کہ اس سے قبل آئی ایم ایف پاکستان کی جی ڈی پی کی شرح تین فیصد رہنے کی پیشگوئی کر چکا ہے۔
عالمی بینک کی رپورٹ کے مطابق اگلے مالی سال پاکستان 3.2 فیصد کی شرح سے ترقی کرے گا اور پاکستان میں خطے کے مقابلے میں سب سے کم شرح نمو رہنے کی پیش گوئی ہے۔ بھارت میں 6.7 فیصد ، بھوٹان7.2 فیصد ، مالدیپ میں 4.7 فیصد ، نیپال 5.1 فیصد ، بنگلہ دیش 4.1 فیصد ، سری لنکا میں 3.5 فیصد گروتھ متوقع ہے۔
رپورٹ میں یہ بھی کہا گیا ہے کہ پاکستان میں سال 2026 تک فی کس آمدن کمزور رہنے کا خدشہ ہے۔
15 ماہ سے جاری اسرائیلی جارحیت اور بربریت کے بعد جنگ بندی ہونے پر غزہ کے شہریوں کو طویل عرصے بعد پرسکون رات نصیب ہوئی۔
غیر ملکی میڈیا کے مطابق اسرائیل اور حماس میں جنگ بندی معاہدے کے بعد 15 ماہ کے طویل عرصہ بعد غزہ کے شہریوں کو پرسکون رات نصیب ہوئی اور بمباری کا ڈر ختم ہونے کے بعد وہ سکون کی نیند سوئے۔
جنگ بندی کے تیسرے روز بے گھر فلسطینیوں کی پناہ گزین کیمپوں سے اپنے اپنے علاقوں میں واپسی جاری ہے۔ کئی خاندان طویل جدائی کے بعد اپنے پیاروں سے ملے تو رقت آمیز مناظر دیکھنے میں آئے۔
تاہم بے گھر فلسطینی امداد اور خوراک کے منتظر ہیں لیکن اچھی خبر یہ ہے کہ جنگ بندی کے بعد امدادی سامان کے ٹرک بھی غزہ پہنچ رہے ہیں اور معاہدے کے مطابق روزانہ 600 امدادی ٹرک غزہ میں داخل ہوں گے۔
گزشتہ روز اسرائیلی قید سے سیاست دان خالدہ جرار اور خاتون صحافی رولا حسنین رہائی پانے والوں میں شامل ہیں۔ قیدیوں کا اگلا تبادلہ 25 جنوری کو ہوگا۔ دوسرے مرحلے میں 33 اسرائیلی یرغمالیوں کو رہا کیا جائے گا اور اس کے بدلے اسرائیلی جیلوں سے 2000 قیدیوں کو واپس غزہ لایا جائے گا۔
جنگ بندی کے بعد تباہ شدہ علاقوں سے 62 شہدا کی لاشیں بھی برآمد ہوئی ہیں۔
واضح رہے کہ گزشتہ 15 ماہ سے زائد عرصے تک جاری رہنے والی اسرائیلی بمباری سے 47 ہزار سے زائد فلسطینی شہید ہو چکے ہیں۔
اسرائیل اور حماس معاہدے کے تحت 42 دن تک غزہ کی پٹی پر کوئی حملہ نہیں ہوگا۔
وزیر داخلہ محسن نقوی کی ہدایت پر پاکستان میں غیر قانونی مقیم افراد کے خلاف کریک ڈٓاؤن کر کے کئی افراد کو گرفتار کیا گیا۔
اے آر وائی نیوز کو ذرائع سے ملنے والی اطلاعات کے مطابق وزیر داخلہ محسن نقوی کی ہدایت پر وفاقی دارالحکومت اسلام آباد کے پوش اور مضافاتی علاقوں میں کارروائیاں کرتے ہوئے غیر قانونی طور پر مقیم غیر ملکیوں کو حراست میں لے لیا۔
یہ کارروائی وزارت داخلہ کی تشکیل کردہ خصوصی ٹیم نے کی۔ اس ٹیم میں سی ٹی ڈی کے علاوہ دیگر اداروں کے نمائندے شامل تھے۔
مذکورہ ٹیم نے غیر قانونی طور پر مقیم 41 افغان شہریوں کو حراست میں لینے کے بعد ان کے ملک ڈی پورٹ کر دیا ہے۔
ذرائع کا کہنا ہے کہ ڈی پورٹ کیے گئے افغان شہریوں کے پاس کسی قسم کے دستاویزات نہیں تھے۔
واضح رہے کہ گزشتہ ایک سال سے زائد عرصے سے مختلف اوقات میں ہونے والے اس آپریشن کے نتیجے میں سینکڑوں غیر قانونی مقیم افراد کو حراست میں لے کر ان کے ملکوں میں ڈی پورٹ کیا جا چکا ہے۔
کراچی : سات سالہ بچے صارم کے کیس میں زیرِ حراست پانچ ملزمان کو انویسٹی گیش سینٹرل کے حوالے کر دیا گیا، ملزموں میں کون کون شامل ہیں؟
تفصیلات کے مطابق نارتھ کراچی کے سات سالہ بچے صارم کے کیس میں اہم پیش رفت سامنے آئی، زیرِ حراست پانچ ملزمان کو انویسٹی گیش سینٹرل کے حوالے کر دیا گیا۔
پولیس نے بتایا کہ ملزمان میں دو چوکیدار، معلم اور بلڈنگ کا والومین شامل ہیں جبکہ زیرحراست ملزمان میں صارم کے والد کا رشتہ دار بھی شامل ہے، تمام ملزمان کا ڈی این اے کیا جائے گا۔
دوسری جانب کیس کی تحقیقات کے لیے چار رکنی کمیٹی بھی بنادی گئی ہے، ڈی ایس پی فرید قریشی کی سربراہی میں کمیٹی کی کیس کی مختلف زاویوں سے تفتیش کرے گی۔
تفتیشی ذرائع نے انکشاف کیا تھا کہ 7 سالہ صارم کے اغوا اور قتل کی واردات اپارٹمنٹ کے اندر ہی ہوئی۔
اس سے قبل صارم قتل کیس کی تفتیش اے وی سی سی سے واپس لینے کے احکامات جاری کئے گئے تھے ، اب کیس ایک مرتبہ پھر زون میں منتقل کیا جائے گا۔
پولیس حکام کا تھا کہ صارم کا کیس اغواء کا نہیں بلکہ قتل کا ہے، کیس میں ایک ملزم کو حراست میں لے رکھا ہے، گذشتہ روز کامبنگ آپریشن میں کئی شواہد تحویل میں لیے تھے جبکہ ایک بیڈشیٹ، رسی کو تفتیشی ٹیم نے سیل کیا تھا اور ٹینک سے ایک ٹوپی اور بال بھی ملی تھی۔
پولیس کے مطابق بچے کے منہہ اور حاجت کی جگہ سے بھی سیمپل لیے ہیں، صرف ڈی این اے کا انتظار کر رہے ہیں۔
یاد رہے نارتھ کراچی میں اغوا کے بعد قتل ہونے والے 7 سالہ بچے سےزیادتی کی تصدیق ہوئی تھی ، ابتدائی پوسٹ مارٹم رپورٹ میں سات سال کے بچے کو مبینہ طور پرزیادتی کربعد بے رحمی سے قتل کیے جانے کےشواہد ملے ہیں۔
رپورٹ میں بتایا گیا تھا بچے کو گلہ دباکر مارا گیا اور گردن کی ہڈی ٹوٹی تھی۔
پوسٹ مارٹم رپورٹ میں کہنا تھا کہ بچے کی کمر سمیت جسم کے تیرا حصوں پرزخم تھے، دونوں نتھنے پچکے ہوئے اورہونٹ سوجےہوئےتھے۔
رپورٹ کے مطابق بچے کی پیشانی،کان کے نیچے اور گردن کےپیچھےچوٹ لگی تھی، پیشانی کے علاوہ تمام چوٹیں مرنے سے پہلے کی ہیں جبکہ بچے کے پھیپھڑے سکڑ گئے تھے۔
واضح رہے نارتھ کراچی میں گیارہ روز کی گمشدگی کے بعد 7 سالہ بچے کی لاش ٹینک سے ملی تھی۔
اس دوران پولیس نے صرف ایک بار ٹینک چیک کیا اور اپارٹمنٹ کے اندر بھی چھان بین نہ کی تھی لیکن بچے کی موت کے بعد پولیس کو ہوش آیا۔
بعد ازاں سی آئی اے اسپیشلائزڈ یونٹ نےچھاپہ مار کرخالی فلیٹس کو سرچ کیا ساتھ ہی پرانی کھڑی گاڑیوں کو بھی سراغ رساں کتوں سے چیک کیا گیا اور دو مشتبہ افراد کو حراست میں لیا گیا۔ شبہ ظاہر کیا کہ صارم کو باہر نہیں لے جایا گیا تھا۔
لاہور : پنجاب میں پتنگ بازی ناقابل ضمانت جرم قرار دے دیا گیا، اب پتنگ اڑانے پر 3 سے 7 سال تک کی سزا ہوگی۔
تفصیلات کے مطابق پنجاب میں پتنگ بازی پر مکمل پابندی عائد کردی گئی اور گزشتہ روزمنظور کیے گئے بل کی تفصیلات سامنے آگئیں۔
پنجاب میں پتنگ بازی کی ممانعت کا ترمیمی ایکٹ 2024 منظور کیاگیا ، جس کے تحت پتنگ بازی سے متعلق مواد کی تیاری اور نقل و حمل پر مکمل پابندی عائد کی گئی۔
ترمیمی ایکٹ میں بتایا گیا کہ پتنگ اڑانے والے کو 3 سے 5 سال قید یا 20 لاکھ جرمانہ یا دونوں ہوں گے اور پتنگ ساز،ٹرانسپورٹر کو 5 سے 7سال قید یا 50 لاکھ جرمانہ یا دونوں ہوں گے۔
ترمیمی ایکٹ میں کہنا تھا کہ پتنگ اڑانے میں ملوث بچے کو پہلی بار 50 ہزار اور دوسری بار ایک لاکھ جرمانہ ہوگا جبکہ پتنگ اڑانے ، تیاری، فروخت و نقل وحمل پر 5 لاکھ سے 50 لاکھ تک جرمانہ ہوگا۔
پتنگ اڑانے کے دوران تیزدھار ڈور کے استعمال سے کئی قیمتی جانوں کا ضیاع ہوا ، انسانی جانوں کے تحفظ کیلئے پتنگ اڑانے پر مکمل پابندی کا قانون منظور کروایا ہے۔
پشاور: پی ٹی آئی سینیٹر فیصل جاوید کا کہنا ہے کہ ڈھائی سال میں سیاسی انتقام کے سارے ریکارڈ ٹوٹ گئے لیکن پنجاب کے طلبہ لیپ ٹاپ لیتے اور نعرہ بانی کا لگاتے ہیں۔
تفصیلات کے مطابق پی ٹی آئی سینیٹر فیصل جاوید نے عدالت میں پیشی کے موقع میڈیا سے گفتگو کرتے ہوئے کہا کہ 9مئی26نومبرپرآزادانہ تحقیقات چاہتےہیں لیکن حکومت سنجیدہ نظرنہیں آتی، کمیشن نہیں بنتا تو مذاکرات جاری نہیں رہ سکتے۔
پی ٹی آئی سینیٹر کا کہنا تھا کہ بانی پی ٹی آئی نے بڑی واضح پوزیشن لی ہے کہ کمیشن بنائیں، کمیشن بن گیاتودودھ کا دودھ اورپانی کا پانی ہو جائے گا۔
انھوں نے کہا کہ ڈھائی سال میں سیاسی انتقام کےسارےریکارڈ ٹوٹ گئے، القادرٹرسٹ کیس میں حکومت کوایک دھیلے کا نقصان نہیں ہوا جبکہ بانی اور بشریٰ بی بی کوکوئی فائدہ نہیں کیونکہ ٹرسٹ کسی کی ملکیت نہیں ہوتا۔
رہنما پی ٹی آئی کا مزید کہنا تھا کہ بانی جیل سے باہرآئیں گے تو ملک میں سرمایہ کاری شروع ہوگی، ہر پاکستانی کی زبان پر یہی سوال ہے کہ بانی کب باہر آئیں گے۔
سینیٹر جاوید نے کہا کہ جب تک عوام کاحکومت پراعتماد نہیں معیشت متاثرہوتی رہےگی، بانی کی کال پرآٹھ فروری کو یوم سیاہ منائیں گے، کیونکہ اس دن الیکشن چوری کیا گیا.
مریم نواز کی لیپ ٹاپ اسکیم سے متعلق ان کا کہنا تھا کہ پنجاب کےطلبہ لیپ ٹاپ لیتے اور نعرہ بانی کا لگاتے ہیں۔
