کراچی: شہر قائد کے علاقے پرانا حاجی کیمپ میں لکڑی کے گودام میں آگ لگ گئی، آتش زدگی کے باعث کئی دکانیں جل کر راکھ ہو گئیں۔

تفصیلات کے مطابق پرانا حاجی کیمپ ٹمبر مارکیٹ میں آتش زدگی کے واقعے میں شدید مالی نقصان ہو گیا ہے، آگ لگنے کے بعد واٹر بورڈ ہائیڈرنٹس پر ایمرجنسی نافذ کر دی گئی، جب کہ آگ تیسرے درجے کی قرار دی گئی۔

ایم ڈی واٹر بورڈ کا کہنا تھا کہ آتش زدگی کی اطلاع ملتے ہیں پانی سے بھرے ٹینکرز روانہ کر دیے گئے، فائر بریگیڈ کی 7 گاڑیاں موقع پر ہی روانہ کی گئیں جب کہ 4 دیگر فائر ٹینڈرز اور اسنارکل بعد میں روانہ کیے گئے۔

کئی گھنٹوں کی کوششوں کے بعد ٹمبر مارکیٹ میں لگنے والی آگ پر قابو پالیا گیا ہے، فائر آفیسر کا کہنا تھا کہ 11 فائر ٹینڈرز اور اسنارکل نے آگ بجھانے میں حصہ لیا، آگ لگنے سے 12 لکڑی کی دکانیں اور گودام جل جل گئے ہیں۔

یہ بھی پڑھیں:  زندہ جلنے کا خوف، دو افراد جلتی عمارت کی چھت سے کود گئے

فائر آفیسر کے مطابق آگ لگنے سے قریب کی 2 مکانوں کو بھی نقصان پہنچا، تاہم آگ لگنے کی وجہ معلوم نہیں ہو سکی ہے۔

یاد رہے کہ مارچ کے مہینے میں کراچی کے علاقے گلشن اقبال ممتاز منزل کے قریب 17 منزلہ عمارت میں آگ لگ گئی تھی جس میں دو افراد جان کی بازی ہار گئے تھے، آگ نے 4 سے 5 منزلوں کو متاثر کیا تھا، جان بچانے کے لیے لوگ چھت پر چڑھ گئے، جہاں سے 2 افراد جان بچانے کے لیے نیچے کود گئے لیکن گر کر جاں بحق ہو گئے۔

کراچی: شہر قائد میں کلب روڈ پر 10 روز قبل تبدیل کی گئی سیوریج لائن پھر بیٹھ گئی ہے، کے ایم سی کی جانب سے روڈ کی کارپیٹنگ کی جا رہی تھی کہ اس دوران سیوریج لائن دھنس گئی۔

تفصیلات کے مطابق کراچی کے کلب روڈ پر سیوریج لائن دس روز بعد ایک بار پھر دھنس گئی ہے،ذرایع کا کہنا ہے کہ 54 انچ سیوریج لائن کی تبدیلی پر لاکھوں روپے لاگت آئی تھی۔

سیوریج لائن زمین سے تقریباً 22 فٹ نیچے ڈالی گئی تھی، گزشتہ روز یہ کے ایم سی کے کام کے دوران پھر بیٹھ گئی، ایک روز گزر جانے کے باوجود نہ لائن تبدیل کی جا سکی نہ رساؤ روکا جا سکا تھا، تاہم، آج سیوریج لائن پر مرمت کا کام شروع کر دیا گیا ہے۔

ایم ڈی واٹر بورڈ اسداللہ خان بھی مرمتی کام کا معائنہ کرنے پہنچ گئے، ان کا کہنا تھا کہ دھنسنے والی سیوریج لائن 60 سال پرانی ہے، مرمت کام فوری شروع کیا گیا ہے تاکہ اطراف میں اوور فلو کا مسئلہ پیدا نہ ہو، متاثرہ سیوریج لائن کی مرمت کا کام 24 گھنٹے میں مکمل کر لیا جائے گا۔

واضح رہے کہ کلب روڈ پر 25 فٹ گہری قدیم سیوریج لائن بیٹھ گئی تھی، جس کی مرمت کا کام 4 روز میں مکمل کیا گیا تھا، کام کی تکمیل کے بعد واٹر بورڈ نے کہا تھا کہ سڑک کی تعمیر اب کے ایم سی کی ذمہ داری ہے، تاہم کے ایم سی کی ذمہ داری کی ادائیگی کے دوران سیوریج لائن پھر بیٹھ گئی۔

60 سال پرانی 54 انچ کی لائن بیٹھنے سے اولڈ ٹاؤن گٹر ٹاؤن میں تبدیل ہو گیا تھا، سیوریج کے گندے پانی سے کلب روڈ، عبداللہ ہارون روڈ، گورنر ہاؤس، فوارہ چوک، زیب النسا اسٹریٹ، لکی اسٹار اور شارع فیصل متاثر ہوئے تھے۔ واٹر بورڈ کی نا اہلی کے باعث بار بار دھنسنے والی لائن کو تبدیل نہ کیا جا سکا تھا۔