اتوار, جون 22, 2025
لائیو سٹریم
اے آر وائی نیوز انگریزی
رمضان کیلنڈر 2025
گولڈ ریٹس
کرنسی ریٹ
ایندھن قیمتیں
ہوم بلاگ صفحہ 23802

اسرائیلی فوج کی فائرنگ سے زخمی فلسطینی نوجوان دم توڑ گیا

کی طرف
ویب ڈیسک
-
0
firing

یروشلم: فلسطین میں قابض اسرائیلی فوج کی فائرنگ سے زخمی ہونے والا پندرہ سالہ نوجوان اسپتال میں دم توڑ گیا۔

تفصیلات کے مطابق فلسطین میں اسرائیلی فوج کی جارحیت مسلسل جاری ہے، معصوم اور نہتے مظلوم شہریوں پر ظلم کی انتہا کردی گئی ہے، ایک ہفتے قبل اسرائیلی فوج کی فائرنگ سے شدید زخمی ہونے والا 15 سالہ نوجوان آج اپنی زندگی کی بازی ہار گیا۔

ترجمان فلسطینی وزارت صحت کا کہنا ہے کہ 15 سالہ ’عدی اکرم ابو خلیل‘ ایک ہفتے قبل امریکی سفارت خانے کی القدس منتقلی کے خلاف احتجاجی مظاہرے میں شریک تھا کہ اچانک اسرائیلی فوج نے اس پر فائرنگ کردی جس کے باعث وہ شدید زخمی ہوگیا تھا۔

فلسطین: اسرائیلی فوج نے حملہ کرکے امدادی کشتی تباہ کردی

فلسطینی وزارت صحت کے مطابق بعد ازاں اسے فوری طور پر طبی امداد فراہم کرنے کے لیے اسپتال منتقل کیا گیا جہاں اسے بچانے کی ہرممکن کوکشش کی گئی لیکن وہ زخموں کی تاب نہ لاتے ہوئے آج جاں بحق ہوگیا، عدی اکرم غزہ میں اسرائیلی فوج کے خلاف احتجاج کر رہا تھا۔

خیال رہے کہ سرحد پر اسرائیلی فورسز کی وحشیانہ فائرنگ سے زخمی متعدد فلسطینی اردن کے اسپتالوں میں زیرعلاج ہیں، دوسری جانب فلسطینی وزیر خارجہ ریاد المالکی نے عالمی عدالت انصاف سے اسرائیلی فوج کے ہاتھوں نہتے فلسطینیوں کے قتل عام کی مکمل تحقیقات کا مطالبہ کیا ہے۔

امریکی سفارتخانہ بیت المقدس منتقل، اسرائیلی فوج کی فائرنگ سے 58 فلسطینی شہید

علاوہ ازیں گزشتہ روز مظلوم فلسطینیوں کے لیے بھیجی گئی امدادی کشتی کو بھی اسرائیلی فورسز نے حملہ کرکے مکمل طور پر تباہ کردیا تھا، مذکورہ کشتی امدادی فلوٹیلا کا حصہ تھی۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

جرمن چانسلر کی چینی صدر سے ملاقات، ایران سے متعلق جوہری ڈیل پر تبادلہ خیال

کی طرف
ویب ڈیسک
-
0
meeting

بیجنگ: جرمن چانسلر انجیلا مرکل نے چینی صدر شی جن پنگ سے ملاقات کی اور دونوں رہنماؤں نے ایران سے متعلق جرہری ڈیل پر تبادلہ خیال کیا۔

تفصیلات کے مطابق جرمنی کی خاتون چانسلر انجیلا مرکل دو روزہ سرکاری دورے پر چین میں موجود ہیں جہاں انہوں نے آج چین کے دار الحکومت بیجنگ میں چینی صدر شی جن پنگ سے ملاقات کی، علاوہ ازیں انہوں نے چینی وزیر اعظم ’کیچیانگ‘ اور دیگر رہنماؤں سے بھی ملاقات کی۔

عالمی میڈیا کے مطابق چینی صدر شی جن پنگ کے ساتھ ملاقات کے بعد جرمن خاتون چانسلر نے اُس چینی حکومتی فیصلے کا خیر مقدم کیا، جس کے تحت چین نے موٹر کاروں کی امپورٹ پر عائد محصولات میں کمی کی ہے، ملاقات کے دوران دونوں رہنما بڑے خوشگوار موڈ میں نظر آئے۔

جرمنی شام میں کسی بھی فوجی کارروائی کا حصہ نہیں بنے گا، انجیلا مرکل

ایک مشترکہ پریس کانفرنس کرتے ہوئے جرمن چانسلر انجیلا مرکل کا کہنا تھا کہ امریکا ایران جوہری معاہدے سے دست بردار ہوچکا ہے، لیکن چین اور جرمنی ایران جوہری ڈیل کے ساتھ کھڑے ہیں، چین اور جرمنی اپنے باہمی تعلقات کو مزید مضبوط کرنا چاہتے ہیں۔

اس دوران انجیلا مرکل نے چینی رہنماؤں سے کہا کہ وہ غیر ملکی سرمایہ کاری کے راستے میں بھی حائل رکاوٹوں اور مشکلات کو دور کرے تاکہ زیادہ سے زیادہ تجارتی معاملات طے پائیں، معیشت کی بہتری کے لیے یہ اقدام ضروری ہے۔

اوباما نےمیرے اور انجیلا مرکل کے فون ٹیپ کیے‘ ڈونلڈ ٹرمپ

خیال رہے کہ چینی وزیر اعظم کے ساتھ ملاقات کے بعد دونوں رہنماؤں نے خاص طور پر آزاد تجارت کی ضرورت پر زور دیا، مرکل نے چینی صدر اور وزیراعظم کے ساتھ ملاقاتیں دارالحکومت بیجنگ کے گریٹ ہال میں کی، مرکل اور لی کیچیانگ نے ایرانی جوہری ڈیل کا دفاع بھی کیا۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

شیخ راشد المکتوم افطار سے قبل اچانک رضاکاروں کے پاس پہنچ گئے

کی طرف
ویب ڈیسک
-
0

دبئی: متحدہ عرب امارات کے امارات کے نائب صدر اور حاکم الشیخ محمد راشد بن المکتوم اچانک سڑک پر نکلے اور انہوں نے افطار تقسیم کرنے والے رضاکاروں سے ملاقات بھی کی۔

تفصیلات کے مطابق دبئی کے حاکم الشیخ محمد راشد المکتوم دو روز قبل افطار سے قبل اچانک شاہی محل سے گاڑی میں بیٹھ کر سڑکوں پر ہونے والے انتظامی معاملات کا جائزہ بھی لیا۔

اس موقع پر راشد المکتوم نے سڑک پر تعینات افطاری تقسیم کرنے والے رضاکاروں سے بھی ملاقات کی اور اُن کا حال چال پوچھا، دبئی حکام کو اچانک اپنے درمیان پاکر لوگوں کو خوشگوار حیرت ہوئی۔

اس دوران رضا کاروں میں سے کچھ لوگوں نے نائب وزیراعظم کے ساتھ تصاویر بنوائیں اور کچھ نے ویڈیوز بنا کر سوشل میڈیا پر شیئر کیں، راشد المکتوم کے اس اقدام کو شہریوں نے بہت پسند کیا۔

واضح رہے کہ دبئی میں ماہ رمضان کے دوران سرکاری اور غیر سرکاری اداروں کی جانب سے لوگوں کو افطاری تقسیم کی جاتی ہے تاکہ مزدور اور گھروں سے باہر رہنے والے لوگ آرام سے افطار کرسکیں۔

عرب میڈیا کے مطابق راشد المکتوم خاص طور پر انتظامیہ کی جانب سے ٹریفک پلان دیکھنے کے لیے خود سڑک پر نکلے تھے کیونکہ ماہ صیام میں جلدی کے باعث اکثر خطرناک حادثے پیش آتے ہیں جن میں انسانی جانوں کا ضیاع ہوتا ہے۔

گزشتہ برس ماہ صیام میں ٹریفک حادثات کے نتیجے میں 3 قیمتی جانیں ضائع ہوئی تھیں جس کے بعد دبئی حکومت نے خاص طور پر رمضان المبارک میں حادثات کی روک تھام کے لیے خصوصی اقدامات کیے۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

رات کی تاریکی میں اچانک سمندر پر نیلی روشنی نمودار

کی طرف
ویب ڈیسک
-
0

کیلی فورنیا: سین ڈیگو کے ساحل پر رات کے پہر انتہائی خوبصورت اور دلکش قدرتی منظر دیکھا گیا جس نے لہروں کو رنگین بنادیا۔

تفصیلات کے مطابق کیلی فورنیا کے ساحل پر گزشتہ شب دلکش اور قدرتی منظر نمودار ہوا جسے دیکھنے والے آنکھیں جھپکنا بھول گئے، رات کی تاریکی میں اچانک سمندر حیران کن طور پر روشن ہوگیا۔

امریکی میڈیا کے مطابق شب کے درمیانی حصے میں گہرے اور شفاف پانی پر نیلے رنگ کی چمک اور روشنی دور دور تک واضح طور پر نظر آئی جس کی وجہ سے منظر انتہائی دلکش ہوگیا۔اتفاق سے ساحل پر پہنچے ہوئے فوٹو گرافر نے اس تمام قدرتی منظر کو اپنے کیمرے میں محفوظ کیا جس کو دیکھنے والے واقعی سحر میں گرفتار ہوگئے۔

ماہرین کے مطابق سمندر میں بننے والی یہ روشنی قدرتی عمل سے پیدا ہونے والے بائیولیومن کا نتیجہ ہے جسے دیکھنے کے لیے کہی دہائیاں درکار ہوتی ہیں۔

کیلی فورنیا کے جنوبی علاقے میں واقع سین ڈیگو کے ساحل پر آنے والی لہروں پر نیلے رنگ کی روشنی جن لوگوں نے دیکھی وہ ماہرین کی رائے کے بعد اپنے آپ کو دنیا کا خوش قسمت انسان سمجھنے لگے۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

کوشش ہے کہ نگراں وزیراعظم کامعاملہ پارلیمان ہی میں حل ہوجائے: نوید قمر

کی طرف
ویب ڈیسک
-
0

اسلام آباد: پاکستان پیپلزپارٹی کے سنیئر رہنما نوید قمر نے کہا ہے کہ کوشش ہوگی کہ نگراں وزیراعظم کامعاملہ پارلیمان میں ہی حل ہوجائے.

ان خیالات کا اظہار انھوں نے پارٹی اجلاس کے بعد میڈیا سے گفتگو کرتے ہوئے کیا. ان کا کہنا تھا کہ اجلاس میں نگراں وزیراعظم کےمعاملے پر بھی مشاورت کی گئی.

سابق وفاقی وزیر نے کہا کہ نگراں وزیراعظم کے لئے حکومت اور اپوزیشن کی کافی ملاقاتیں ہو چکی ہیں، البتہ ڈیڈلاک برقرار ہے، معاملہ پارلیمان میں حل کرنے کی آخری دن تک کوشش کریں گے.

نویدقمرنے کہا کہ کوشش ہوگی کہ معاملہ جلد حل ہو، نگراں وزیراعظم کا فیصلہ الیکشن کمیشن کے پاس نہ جائے. ان کا کہنا تھا کہ اس معاملے میں  تحریک انصاف کو بھی اعتماد میں لیا گیا تھا.

نوید قمر نے کہا کہ پارٹی اجلاس میں مختلف معاملات پر بات ہوئی، فاٹا بل کی منظوری پر عوام کو مبارکباد دی گئی، نگران وزیراعظم کا معاملہ بھی زیر بحث آیا.

واضح رہے کہ آج اپوزیشن لیڈر خورشید شاہ نے کہا تھا کہ اب وزیراعظم سے نگراں وزیراعظم کے معاملے میں ملاقات نہیں ہوگی، ہوسکتا ہے، پارلیمانی کمیٹی کے لیے دو نام اسپیکر کو بجھوا دوں، نوید قمر اور شیری رحمان پارلیمانی کمیٹی میں شامل ہوں گے.

اب وزیراعظم سے نگراں وزیراعظم کے معاملے پر کوئی ملاقات نہیں ہو گی: خورشید شاہ

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

میچ کے دوران کینگرو میدان میں داخل، ویڈیو وائرل

کی طرف
ویب ڈیسک
-
0

کینبیرا: آسٹریلیا میں رگبی میچ کے دوران کینگرو کی گراؤنڈ میں آمد کے باعث میچ روکنا پڑ گیا جس کی ویڈیو سوشل میڈیا پر وائرل ہوگئی۔

تفصیلات کے مطابق آسٹریلیا میں گرمیوں کے موسم میں کھیلے جانے والے رگبی کے ٹورنامنٹ میں ویسے تو دلچسپ واقعات دیکھنے میں آتے ہیں تاہم اس بار کچھ انوکھا واقعہ پیش آیا جس نے سب کی توجہ اپنی جانب مبذول کرالی۔

دفاعی چیمپئن اور آئرلینڈ کی ٹیموں کے مابین میچ جاری تھا کہ اچانک کھیل کو روکنا پڑا جس کی وجہ کوئی جھگڑا نہیں بلکہ میدان کے قریب واقع جنگل ٹھہری کیونکہ وہاں سے ایک کینگرو اچھلتا کودتا میدان میں داخل ہوگیا۔

میچ کی کوریج کرنے والے کیمرہ مین نے اس تمام منظر کی ویڈیو اپنے پاس محفوظ کرلی جس میں دیکھا جاسکتا ہےکہ کینگرو کی گراؤنڈ میں آمد کے ساتھ ہی خواتین کھلاڑی اپنی جگہ پر حیرانی کے عالم میں کھڑے ہوکر  خاموشی سے سارا منظر دیکھتی رہیں، اس دوران منتظمین نے بھی کوئی اقدامات نہیں کیے۔

کینگرو اچھلتا کودتا میدان کے ایک طرف سے داخل ہوا اور کچھ ہی دیر میں وہ گراؤنڈ کے دوسری طرف بھاگتا نظر آیا اور اچانک قریبی جنگل میں داخل ہوکر کہیں غائب ہوگیا۔ اس تمام واقعے کے بعد کھیل کو مختصر وقفے کے بعد شروع کیا گیا۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

مسلمان ہونے والی روسی خاتون اسلام کے بارے میں کیا کہتی ہیں؟

کی طرف
ویب ڈیسک
-
0

دبئی: بیلا روس کی خاتون نے اسلامی تعلیمات سے متاثر ہوکر آئندہ کی زندگی اسلام کے مطابق گزارنے کا اعلان کردیا۔

بیلا روس سے تعلق رکھنے والی وکٹوریہ کا کہنا ہے کہ ’میرے ملک میں مسیح و دیگر مذاہب سے تعلق رکھنے والے افراد کی تعداد بہت زیادہ ہے جبکہ وہاں مسلمان بہت کم ہیں‘۔

اُن کا کہنا تھاکہ تھاکہ جب آپ کو صحیح اسلامی تعلیمات معلوم ہوں تو اللہ کے احکامات کا سمجھ آتا ہے، اسلام کے بارے میں مزید جاننے کے لیے میں یہاں دبئی آئی۔

لارڈز ٹیسٹ: انگلینڈ کی ٹیم 184 رنز پر ڈھیر، پاکستان نے ایک وکٹ کے نقصان پر 50 رنز بنالیے

کی طرف
ویب ڈیسک
-
0
Lord's Test

لارڈز: پاکستان اور انگلینڈ کے درمیان جاری لارڈز ٹیسٹ میچ کے پہلے روز انگلینڈ کی ٹیم 184 رنز پر ڈھیر ہوگئی، دن کے اختتام پر پاکستان نے ایک وکٹ کے نقصان پر پچاس رنز بنالیے۔

تفصیلات کے مطابق لارڈز ٹیسٹ میچ کے پہلے روز انگلینڈ کی ٹیم 184 رنز بنا کر آؤٹ ہوگئی، محمد عباس اور حسن علی نے چار، چار وکٹیں حاصل کیں، پاکستان نے دن کے اختتام پر ایک وکٹ کے نقصان پر 50 رنز بنالیے، قومی ٹیم کو انگلینڈ کی برتری ختم کرنے کے لیے 134 رنز درکار ہیں ان کی 9 وکٹیں باقی ہیں۔

 اظہر علی 18 اور حارث سہیل 21 رنز بناکر کریز پر موجود ہیں جبکہ اوپنر امام الحق 4 رنز بنا کر براڈ کی گیند پر ایل بی ڈبلیو آؤٹ ہوگئے تھے۔

قبل ازیں لندن کے تاریخی میدان لارڈز میں جاری پاکستان اور انگلینڈ کے درمیان پہلے ٹیسٹ میچ میں انگلینڈ کے کپتان جوئے روٹ نے ٹاس جیت کر بیٹنگ کا فیصلہ کیا جو صحیح ثابت نہ ہوسکا اور انگلینڈ کی پوری ٹیم 184 رنز پر آؤٹ ہوگئی۔

انگلینڈ کی جانب سے ایلسٹر کک اور بین اسٹوکس کے علاوہ کوئی بھی بلے باز اچھی کارکردگی نہ دکھا سکا، کک نے نصف سنچری اسکور کرتے ہوئے 70 رنز بنائے جبکہ بین اسٹوکس 38 رنز بناسکے۔

انگلینڈ کے کپتان جوئے روٹ صرف چار رنز بنا کر حسن کی گیند پر سرفراز احمد کو کیچ دے بیٹھے، ڈیوڈ ملان کو بھی 6 رنز پر حسن علی نے اپنا شکار بنایا، بریسٹو 27 رنز بناسکے انہیں فہیم اشرف نے بولڈ کیا۔

پاکستان کی جانب سے محمد عباس اور حسن علی نے چار، چار کھلاڑیوں کو پویلین کی راہ دکھائی، محمد عامر اور فہیم اشرف نے ایک، ایک وکٹ حاصل کی، لیگ اسپنر شاداب خان کوئی وکٹ حاصل نہ کرسکے۔

واضح رہے کہ پاکستان اور انگلینڈ کے درمیان دو سال بعد ٹیسٹ سیریز کھیلی جارہی ہے، آخری مرتبہ مصباح الحق کی قیادت میں قومی ٹیم نے اوول ٹیسٹ میچ انگلینڈ کو شکسست دے کر پہلی مرتبہ آئی سی سی رینکنگ میں پہلی پوزیشن حاصل کی تھی۔

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

گیتا: بھارتی حکام کو والدین نہ مل سکے مگر رشتے مل گئے، 25 لڑکے شارٹ لسٹ

کی طرف
ویب ڈیسک
-
0

نئی دہلی: پاکستان سے بھارت جانے والی قوت سماعت و گویائی سے محروم لڑکی کے   والدین تاحال  نہ مل سکے مگر حکومتی اشتہار کے بعد گیتا کے 50 رشتے ضرور آگئے۔

تفصیلات کے مطابق گیتا نامی بھارتی لڑکی نے  غلطی سے سرحد پار کرلی تھی جس کے بعد پاکستانی حکام نے قوت گویائی و سماعت سے محروم لڑکی کو ایدھی فاؤنڈیشن کے حوالے کیا تھا۔

گیتا نے اپنی زندگی کے 13 سال ایدھی ہوم میں گزارے اور وہاں اُس کی پرورش عبدالستار ایدھی و دیگر حکام نے کی ، مذکورہ لڑکی کو 2015 میں بھارت واپس بھیج دیا گیا تھا تاہم تین سال گزر جانے کے باوجود بھی بھارتی حکام اس کے والدین کو تلاش کرنے میں ناکام رہے۔

بھارتی اخبار کے مطابق حکومت نے گیتا کی خواہش کو مدنظر رکھتے ہوئے اُس کی شادی کا اشتہار دیا  گیا تھا جس میں کہا گیا تھا کہ جو شخص بھی اس لڑکی سے شادی کرے گا اُسے سرکاری نوکری، گھر اور گاڑی حکومت کی طرف سے دی جائے گی۔

مزید پڑھیں: عبدالستار ایدھی کی وفات نے بھارت کی گیتا کو بھی رُلا دیا

گیتا سے شادی کے خواہش مند 50 لوگوں کے رشتے آئے جن میں سے 25 کو شارٹ لسٹ کر کے وزارتِ داخلہ نے مذکورہ امیدواروں کی جانچ پڑتال شروع کردی۔

بھارتی ضلع اندور کے حکام کا کہنا تھا کہ 25 لڑکوں کی تصاویر اور معلومات گیتا کو دکھائی جائیں گی جس کے بعد وہ اپنی مرضی سے ہی شریک حیات کا انتخاب کرے گی جس کے بعد سرکاری خرچے پر مذکورہ لڑکی کی شادی کی جائے گی۔ گیتا پاکستان سے واپسی کے بعد ایک فلاحی تنظیم کے زیر نگرانی اپنی زندگی گزار رہی ہے۔

واضح رہے کہ گیتا واہگہ بارڈر کے راستے سے آنے والے سمجھوتہ ایکسپریس سے پاکستان کی حدود میں داخل ہوئی تھی جسے پولیس نے فوری طور پر اپنی تحویل میں لے کر اسلام آباد منتقل کیا تھا تاہم کچھ عرصے بعد اُسے ایدھی فاؤنڈیشن کے حوالے کردیا گیا تھا۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

حافظ سعید سے متعلق بھارتی اخبار میں شائع ہونے والی پاکستانی رپورٹر کی خبر بے بنیاد قرار

کی طرف
ویب ڈیسک
-
0
hafiz saeed

اسلام آباد: حافظ سعید سے متعلق بھارتی اخبار میں شائع ہونے والی پاکستانی رپورٹر کی خبر بے بنیاد نکلی، مبشر زیدی نے اپنی رپورٹ میں کہا تھا کہ چین حافظ سعید کو مغربی ایشیا کے کسی ملک منتقل کرنا چاہتا ہے۔

تفصیلات کے مطابق چین اور پاکستانی حکام نے بھارتی اخبار میں شائع مبشر زیدی کی خبر بے بنیاد قرار دے دی، مبشر زیدی کا کہنا تھا کہ چین کے صدر چاہتے کہ حافظ سعید دنیا کی نظروں سے اوجھل ہوجائیں اور انہیں مغربی ایشیا کے کسی ملک منتقل کیا جائے۔

مبشر زیدی نے بھارتی اخبار دی ہندو میں شائع ہونے والے اپنے مضمون میں یہ گمراہ کن موقف اختیار کیا کہ چین چاہتا ہے حافظ سعید کو مغربی ایشیا کے کسی ملک منتقل کیا جانا چاہئے، پاکستان پر دہشت گردی کے خلاف کارروائی کے لیے دباؤ بڑھ رہا ہے۔

مبشر زیدی کی رپورٹ کے مطابق چین کے صدر نے وزیر اعظم شاہد عباسی سے باؤ فورم میں اس بات کا اصرار کیا تھا، چینی وزارت خارجہ نے کہا ہے کہ بھارتی اخبار میں شائع ہونے والی خبر افسوسناک اور بے بنیاد ہے۔

  وزیر اعظم شاہد خاقان عباسی نے بھی خبر کی تردید کرتے ہوئے کہا ہے کہ حافظ سعید کے بارے میں چینی حکام سے کوئی گفتگو نہیں  ہوئی، اور نہ ہی باؤ فورم کوئی مناسب فورم تھا جہاں اس متعلق گفتگو کی جاتی۔

دوسری جانب چینی ترجمان کا کہنا ہے کہ صدر زی کی جانب سے حافظ سعید کو کہیں اور منتقل کرنے کی خبر بے بنیاد اور حیران کن ہے، چینی صدر نے ایسی کوئی تجویز مشورہ، یا اصرار نہیں کیا۔

یاد رہے کہ مذکورہ اخبار کے صحافی سرل المیڈا بھی اپنی حساس نوعیت کی خبروں کی وجہ سے تنازعات کا شکار رہے ہیں، ان کے گزشتہ دنوں سابق وزیر اعظم میاں نواز شریف سے کئے گئے انٹرویو نے بھی ممبئی حملوں کے معاملے کو ایک نیا متنازع رخ دے دیا تھا۔

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

1...23,80123,80223,803...30,731صفحہ%موجودہ صفحہ%کا%کل صفحات

سوشل میڈیا

اے آر وائی ڈیجیٹل نیٹ ورک

انٹرایکٹو

کارپوریٹ

کاپی رائٹ © 2025