سیول : شمالی کوریا نے بیلسٹک میزائل کا تجربہ کیا جو تقریباً 60 کلومیٹر تک پرواز کر کے مشرقی سمندر میں جا گرا۔

غیرملکی میڈیا کے مطابق شمالی کوریا نے ایک اور بیلسٹک میزائل کا تجربہ کیا ، میزائل شمالی کوریا کی بندرگاہ سنپو سے فائرکیا گیا، جو بحیرہ جاپان میں گرا۔
ابتدائی جائزہ میں پتہ چلا ہے کہ شمالی کوریا نے کے این 15 اوسط دوری کے بیلسٹک میزائل کا تجربہ کیا ہے۔

بیلسٹک میزائل کی ٹیکنالوجی کے حامل کسی بھی راکٹ کا تجربہ اقوام متحدہ کی سلامتی کونسل کی قراردادوں کی خلاف ورزی ہے، لیکن شمالی کوریا یہ کہہ کر مسلسل یہ خلاف ورزیاں کرتا آ رہا ہے کہ وہ اپنے دفاع کے حق اور خلائی تحقیق کو استعمال میں لا رہا ہے۔

امریکی وزیرخارجہ ریکس ٹلرسن نے کہا یہ ایک اوردرمیانے درجے تک مارکرنے والا بیلسٹک میزائل تھا، شمالی کوریا کے بارے میں پہلے ہی بہت کچھ کہہ چکے ہیں مزید کچھ نہیں کہنا۔ میں یہ بہت واضح انداز میں بتا دوں کہ تحمل کی پالیسی ختم ہو چکی ہے۔ ہم شمالی کوریا سے متعلق سفارتی، سکیورٹی اور اقتصادی اقدام سمیت نئے اقدام پر غور کر رہے ہیں۔

خیال رہے کہ شمالی کوریا نے میزائل تجربہ چین کے صدرشی جن پنگ اورامریکی صدرڈونلڈ ٹرمپ کی ملاقات سے 48 گھنٹوں قبل کیا ہے، دونوں رہنماؤں کی ملاقات کل واشنگٹن میں ہوگی، ملاقات میں دونوں رہنما دیگر امور کے ساتھ ساتھ شمالی کوریا کے ایٹمی پروگرام پر بھی گفتگو کریں گے۔

مزید پڑھیں : شمالی کوریا کابلیسٹک میزائل کاتجربہ

واضح رہے کہ فروری میں شمالی کوریا نےسطح سےسطح تک پانچ سو کلومیٹرمار کرنے والے بلیسٹک میزائل کاتجربہ کیا تھا، بلیسٹک میزائل کا تجربہ شمالی پیونگان صوبے کے ایئر بیس سے کیا گیا تھا۔

یاد رہے کہ شمالی کوریا نے گزشتہ سال نومبر میں اپنا پانچواں جوہری تجربہ کیا تھا۔ شمالی کوریا کے حکام نے اعلان کیا تھاکہ جوہری میزائل پروگرام جاری رکھا جائےگا۔