کراچی : قائم مقام آئی جی سندھ سردارعبدالمجید نے پولیس افسران اورجوانوں کو اپنے پہلے پیغام میں کہا ہے کہ ہم‫ سب ایک یونیفارم ڈسپلن فورس کےممبران ہیں اور قانون کی اطاعت اورپاسداری کا مکمل ادراک رکھتے ہیں۔

تفصیلات کے مطابق قائم مقام آئی جی سندھ سردارعبدالمجید دستی نے عہدہ سنبھالنے کے بعد اپنے پیغام میں کہا کہ گزشتہ روز عہدہ سنبھال لیا ہے اور سندھ پولیس کو مثالی ادارہ بنانے میں اپنا بھرپور کرادر ادا کریں جس کے لیے فورس کے جوانوں اور افسران کا تعاون درکار رہے گا۔

قائم مقام آئی جی سندھ سردار عبدالمجیددستی نے اپنے پیغام میں اس عزم کا بھی اعادہ کیا کہ سندھ میں جاری تمام آپریشنز جاری رہیں گے اور نیشنل ایکشن پلان و دیگر ہدایات پر عمل درآمد بھی جاری رہے گا جس کے لیے رینجرز سمیت قانون نافذ کرنے والے دیگر اداروں سے روابط کو مربوط اور منظم بنایاجائےگا۔

قائم مقام آئی جی نے اپنے پیغام میں یہ بھی واضح کیا کہ کسی پولیس آفیسر یاجونیئر رینک افسر کو ہٹایا نہیں جائے گا اور تقرریوں میں سینیارٹی کےاصولوں کی پاسداری کی جائے گی جس کے لیے میرٹ پر کسی بھی حال میں کوئی سمجھوتہ نہیں کیا جائے گا۔

انہوں نے کہا کہ سب کوقانون کی پاسداری کرناہوگی بحیثیت پولیس آفیسر دیگر کےمقابلے میں ہم لوگ زیادہ جوابدہ ہیں اس لیے اقرباء پروری اور پسندناپسندکےکلچرکوختم کرناضروری ہے اور کسی بھی معاملے میں جانبدارانہ عمل ناقابل برداشت ہوگا۔

قائم مقام آئی جی سندھ نے پولیس افسران اور جوانوں کو کہا کہ میں نےآپ کےساتھ اپنی زندگی کی تین دہائیاں گزاری ہیں یہ وقت ڈیوٹی کی پکار پر لبیک کہنےکا ہے اور کسی بھی مشکل اور سخت حالات میں آپ لوگ مجھے ہمیشہ اپنےدرمیان پائیں گے۔

اپنے پیغام کے آخر میں انہوں نے دعا کہ اللہ پاک ہم سب کی رہنمائی فرمائے اور اللہ ہم کوشیطان مردود کے وسوسوں سے دور رکھے، انہوں اپنے پیغام کا اختتام پاکستان زندہ باد، سندھ پولیس پائندہ باد کے نعرے پر کیا۔

خیال رہے گزشتہ روز سندھ حکومت کی جانب سے آئی جی سندھ اے ڈی خواجہ کو عہدے سے سبکدوش کرکے عبدالمجید دستی کو قائم مقام آئی جی سندھ مقرر کردیا گیا تھا۔

لاہور : وفاقی وزیر ریلوے سعد رفیق نے کہا ہے کہ پیپلز پارٹی نے سندھ کا کباڑہ کر کے رکھ دیا ہے اس لیے سندھ حکومت کو مذید فری ہینڈ نہیں دیں گے۔

وہ سندھ حکومت کی جانب سے اے ڈی خواجہ کی برطرفی اور آصف علی زرداری کی وفاقی حکومت پر کرپشن کے الزامات پر ردعمل دے رہے تھے۔

وفاقی وزیر نے کہا کہ آصف زرداری کرپشن کی بات نہ کریں ان کی خود کئی کہانیاں زبان زد عام ہیں اور سندھ کے عوام کو کرپشن اور بد انتظامی سے بچانے کے لیے مسلم لیگ (ن) اپنا پورا کردار ادا کرے گی جس کے لیے جلد سندھ کی سرزمین پر اپنا وجود ثابت کریں گے۔

انہوں نے سندھ حکومت کی جانب سے آئی جی سندھ اے ڈی خواجہ کی برطرفی پر اعتراض اُٹھاتے ہوئے کہا کہ چوں کہ آئی جی سندھ میرٹ پر کام کرتے ہیں اور کرپٹ لوگوں کو نہیں چھوڑتے اس لئے وہ پیپلز پارٹی کو راس نہیں آتے ہیں کیوں کہ پیپلز پارٹی آئی جی کے عہدے پر گھر کا منشی لگوانا چاہتی ہے۔

سعد رفیق نے کہا کہ بینظیرکی شہادت بہت بڑا المیہ تھا لیکن اس موقع پر سرکاری و غیر سرکاری املاک کو جلانا درست نہیں تھا جس کے نتیجے میں 11 ارب کا نقصان ہوا اور کئی سرکاری دفاتر نذر آتش ہوئے جب کہ نہایت اہم ریکارڈ جل خاکستر ہوئے۔

وفاقی وزیر ریلوے نے اپنے محکمے کے حوالے سے کہا کہ ریلوے کےمسائل ختم کرنےکی ہرممکن کوشش کی ہے جب کہ ماضی میں ریلوے مسائل پر کسی نے توجہ نہیں دی تاہم موجودہ دور میں جنگی بنیادوں پر ریلوے کا نظام بہتر کرنے پر توجہ دی جا رہی ہے۔

انہوں نے کہا کہ ماضی میں ریلوے میں اقرباپروری اور بدانتظامی کےریکارڈ بنائےگئے تاہم اب ریلوےکی حالت بہتر بنانے کے لیے تمام تر صلاحیتیں بروئے کار لائی جا رہی ہیں جس کے باعث آئندہ 3 سے 4 سال میں ریلوے میں کوئی پرانا انجن نظر نہیں آئے گا۔

وفاقی وزیر نے تحریک انصاف کے سربراہ اور وزیراعلیٰ کے پی کے کو ہدف تنقید بناتے ہوئے کہا کہ پرویزخٹک معتبر آدمی لگتے ہیں اور انہیں چاہیئے کہ غلط بیانی نہ کریں ہم کس طرح کرنا ریلوے لائن کی زمین انہیں بس کے لیے دے دیں؟

انہوں نے کہا کہ عمران خان کے الزامات کی کوئی حیثیت نہیں ہے وہ حکومت کے ترقیاتی پروجیکٹس سے جلن اور حسد رکھتے ہیں اسی لیے الزام تراشی کرتے ہیں، میں عمران خان کو کہتا ہوں کہ جھوٹ بول کر اور اس طرح کے نعرے لگانے سے کچھ نہیں ہونے والا ہے۔