ایڈلڈ: آسٹریلوی خاتون گھر میں اپنی 14 پالتو بلیوں کو بند کر کے چلی گئی جس کے بعد بلیوں نے کھانا پینا نہ ملنے اور بھوک کے باعث ایک دوسرے پر حملہ کر کے ہلاک کرکے خوراک کی کمی کو پورا کیا۔
برطانوی خبر رساں ادارے کے مطابق یہ واقعہ جنوبی آسٹریلیا کے شہر ایڈلڈ میں پیش آیا، جہاں 43 سالہ خاتون اپنے گھر میں 14 پالتو بلیوں کو بند کر کے خود روانہ ہوگئیں۔
آسٹریلوی خاتون روانہ ہوتے وقت بلیوں کے کھانے پینے کے انتظامات کر کے نہیں گئی تھیں پھر ایک وقت ایسا آیا کہ جب بلیوں کو بھوک کی شدت ستانے لگی اور انہوں نے ایک دوسرے پر حملہ کیا اور آپس کے حملے کے نتیجے میں ہلاک ہوگئیں۔
واقعے کی اطلاع ملنے پر جانوروں کے تحفظ کے لیے قائم برطانوی تنظیم (آر ایس پی سی اے) نے نوٹس لیا اور حکومت مقامی حکومت کو خاتون کے خلاف کارروائی کے لیے نوٹس بھیجا، عالمی ادارے کی جانب سے خط موصول ہونے کے بعد مقامی انتظامیہ نے کارروائی کا آغاز کیا۔
آر ایس پی سی اے کے مطابق خاتون گھر سے روانہ ہوتے وقت بلیوں کے لیے کھانے پینے کے انتظامات کر کے نہیں گئیں جس کے باعث بلیوں نے ایک دوسرے پر حملہ کیا اور صرف ایک بلی زندہ بچی جس کی حالت کافی خراب تھی۔
مقامی انتظامیہ نے بلیوں کو گھر پر اکیلا چھوڑ کر جانے اور ان کی ہلاکت سامنے آنے کے بعد خاتون کو جانوروں کے ساتھ بے رحمی برتنے کا مجرم قرار دے دیا۔ پالتو جانوروں کی پرورش میں غلفت برتنے پر خاتون کو سزا سنائی گئی ہے۔
قانون کی خلاف ورزی کرنے پر خاتون کو ایک سال کے لیے نیک چال چلن اور جانوروں کو پالنے پر پابندی عائد کردی گئی جبکہ زندہ بچ جانے والی واحد بلی کی طبیعت بہتر ہونے کے بعد اُسے کسی اور کی ملکیت میں دے دیا گیا۔
کراچی : واجبات کی عدم ادائیگی پر پی ایس او کی جانب سے فیول فراہم نہ کیے جانے کی وجہ سے پی آئی اے کی پرواز مقررہ وقت پرروانہ نہ ہوسکی، مسافر پی آئی اے انتظامیہ پر برس پڑے۔
تفصیلات کے مطابق واجبات کی عدم ادائیگی پر پی آئی اے اورپی ایس او کی چپقلش پھرعروج پر پہنچ گئی ہے، پی آئی اے پی ایس او کا 15 ارب روپے کا نادہندہ ہے۔
دس روز قبل واجبات کی عدم ادائیگی پرپی ایس او نے پی آئی اے کو تیل کی فراہمی بند کردی تھی، بعد ازاں واجبات کی ادائیگی کی یقین دہانی پرتیل کی فراہمی شروع کی گئی۔
معاہدے کے مطابق پی آئی اے کو روزانہ کی بنیاد پر تیل کی رقم یومیہ ادا کرنا تھی، پی آئی اے اپنے آپریشنز کو برقرار رکھنے کیلیے یومیہ کی بنیاد پر 30 کروڑ روپے کاتیل خریدتا ہے، جبکہ گزشتہ روز یومیہ ادائیگی بھی نہیں کی گئی۔
یومیہ ادائیگی روکنے پر پی ایس او نے آج پھرتیل کی فراہمی بند کردی، تاہم تیل کی فراہمی روکنے پر پی آئی اے کا آپریشن شدید متاثر ہوا ہے۔
تیل کی عدم دستیابی کے باعث کراچی سے لاہورجانے والی پرواز تاخیر کا شکارہوئی، کراچی سے لاہور جانے والی پرواز پی کے 304 کا مقررہ وقت سہ پہر3 بجے ہے، تیل کی عدم دستیابی کی وجہ سے پروازابھی تک روانہ نہ ہوسکی۔
پرواز کے روانہ نہ ہونے کی وجہ سے مسافروں نے احتجاج کیا، ان کا کہنا تھا کہ مسافرمہنگے ٹکٹ لینے کے باوجود وقت پراپنی منزل پرنہیں پہنچ سکتے، پی آئی اے مسافروں کو مہنگے ٹکٹ فروخت کرتی ہے اورتیل کے پیسے کیوں نہیں دیتی۔
اسلام آباد: وزیراعظم نواز شریف نے کہا کہ جنرل راحیل شریف ایک بہترین سپہ سالار ہیں، ان کی قابلیت کے باعث انہیں آرمی چیف بنایا گیا، راحیل شریف کی قیادت میں پاک فوج نے دشمن کو ہرمحاذ پر شکست دی۔
یہ بات انہوں نے وزیراعظم ہائوس میں آرمی چیف جنرل راحیل شریف کے اعزاز میں دی گئی الوداعی تقریب سے خطاب کرتے ہوئے کہی۔
وزیراعظم نواز شریف نے جنرل راحیل شریف کی بطور آرمی چیف خدمات کو سراہا اور کہا کہ جنرل راحیل شریف کے خاندان نے قوم کی خدمت کی ان کا خاندان ملکی دفاع کے طور پر جانا جاتا ہے۔
وزیراعظم نے کہا کہ راحیل شریف کی قابلیت پر انہیں آرمی چیف بنایا گیا وہ ایک بہترین سپہ سالار ہیں،تقریب کا مقصد راحیل شریف کی خدمات کو خراج تحسین پیش کرنا ہے، ان کی قیادت میں فوج نے دہشت گردی کا مقابلہ کیا، میں نے ہمیشہ راحیل شریف کے اسٹریٹجک مشوروں کو اپنایا۔
انہوں نے مزید کہا کہ دنیا ہمارے انسداد دہشت گردی کے عزم سے واقف ہے، پاک فوج نے دہشت گردوں کو ہر محاذ پر شکست دی۔
جنرل راحیل شریف نے اپنی خدمات کو سراہے جانے پر وزیراعظم کا شکریہ ادا کیا اور کہا کہ بھرپور حمایت اور شاندار الفاظ پر وزیراعظم کا شکر گزار ہوں۔
قبل ازیں راحیل شریف وزیراعظم ہائوس پہنچے جہاں وزیراعظم نے ان کا استقبال کیا۔
وزیراعظم اور آرمی چیف کی ون ٹو ون ملاقات
عشائیے سے قبل آرمی چیف اور وزیراعظم کے درمیان ون ٹو ون ملاقات ہوئی جس میں مختلف امور پر تبادلہ خیال ہوا، ذرائع کا کہنا ہے کہ ملاقات میں نئے آرمی چیف کی تقرری کے حوالے سے بھی بات ہوئی،نئے آرمی چیف کے لیے وزارت دفاع کی جانب سے سمری وزیراعظم ہاؤس کو موصول ہوگئی ہے۔
تقریب میں عسکری قیادت میں پاک بحریہ کے سربراہ ایڈمرل ذکا اللہ ،پاک فضائیہ کے سربراہ ایئرچیف سہیل امان، نئے آرمی چیف کے لیے نامزد چاروں لیفٹیننٹ جنرلززبیر حیات،جنرل اشفاق ندیم،جاوید اقبال رمدے اور قمر جاوید باجوہ، ڈائریکٹر جنرل آئی ایس آئی میجر جنرل رضوان اختر، ڈی جی آئی ایس پی آر لیفٹیننٹ جنرل عاصم سلیم باجوہ، ڈی جی ملٹری آپریشنز(ایم او)، ڈی جی ملٹری انٹیلی جنس، کور کمانڈرز، پرنسپلز اسٹاف آفیسرز نے شرکت کی۔
سول قیادت میں وزیر دفاع خواجہ آصف،وزیر برائے دفاعی پیداوار رانا تنویر،وزیر خزانہ اسحق ڈار، مشیر خارجہ سرتاج عزیز،سیکریٹری خارجہ اعزاز چوہدری، معاون خصوصی برائے امور خارجہ طارق فاطمی، مشیر قومی سلامتی ناصر جنجوعہ، مشاہد حسین سید، عبدالقادر بلوچ اور دیگر وزرا و مشیران نے شرکت کی۔
وزیراعظم نواز شریف نے فرداً فرداً تمام عسکری افسران سے ملاقات کی اور مصافحہ کیا، اسی طرح جنرل راحیل شریف نے بھی تمام افراد سے فرداً فرداً ملاقات کی اور ان سے ہاتھ ملایا۔
راحیل شریف چاروں لیفٹیننٹ جنرلز سے بھی ملاقات کریں گے جن کے نام نئے آرمی چیف کے لیے نامزد ہیں ان میں لیفٹیننٹ جنرل زبیر حیات کا نام سینیارٹی لسٹ میں سرفہرست ہے، وہ اس وقت چیف آف جنرل اسٹاف کے عہدے پر فائز ہیں۔
فہرست میں دوسرانام کورکمانڈر ملتان لیفٹیننٹ جنرل اشفاق ندیم کا ہے جنہوں نے آپریشن ضرب عضب کا خاکہ تیار کیا، بہاولپور کے کور کمانڈر لیفٹیننٹ جنرل جاوید اقبال رمدے تیسرے نمبر پر اور چوتھے نمبر پر جی ایچ کیو میں انسپکٹر جنرل آف ٹریننگ اینڈ ایوولوشن لیفٹیننٹ جنرل قمر جاوید باجوہ کا نام زیر غور ہے جو پاک فوج کی سب سے بڑی دسویں کور کی کمانڈ کرچکے ہیں۔
دو روز قبل وزیراعظم نوازشریف نے چیئرمین جوائنٹ چیف آف اسٹاف کمیٹی جنرل راشد محمود کے اعزاز میں ظہرانہ دیا تھا جس میں پاک بحریہ، پاک فضائیہ اور قومی سلامتی کے مشیر ناصر جنجوعہ نے شرکت کی تھی۔
راحیل شریف توسیع نہ لینے والے دوسرے آرمی چیف
واضح رہے کہ جنرل راحیل شریف اپنی مدت ملازمت میں توسیع نہ لینے والے دوسرے جرنیل ہیں، قبل ازیں جنرل عبدالوحید کاکڑ نے بھی توسیع لینے سے انکار کردیا تھا۔
پشاور: پی آئی اے کی پرواز پی کے 353 میں آگ لگنے کے بعد ائیرپورٹ پر ہنگامی لینڈنگ کی گئی جس میں قومی کرکٹ ٹیم کے نامور کھلاڑی شاہد خان آفریدی سمیت تمام مسافروں کو بحفاظت جہاز سے باہر نکال لیا گیا۔
تفصیلات کے مطابق پشاور سے کراچی آنے والی قومی ائیرلائن کی پرواز پی کے 353 میں اچانک آگ بھڑک اٹھی، جس کے بعد پرواز کو ہنگامی بنیادوں پر پشاور ائیرپورٹ پر اتارا گیا۔
ائیرپورٹ انتظامیہ کے مطابق الیکٹرک شٹ ڈاؤن کے باعث طیارے کے عقبی حصے میں آگ لگی تاہم تمام مسافروں کو بحفاظت نکال لیا گیا ہے، آگ پر قابو پانے کے بعد طیارے کو کلیئر قرار دے دیا گیا ہے۔
خیال رہے کہ آج صبح آرمی چیف جنرل راحیل شریف نے خیبر ایجنسی کی تحصیل باڑہ کا دورہ کیا اور وہاں شاہد آفریدی کے نام سے بنائے جانے والے اسٹیڈیم کا افتتاح کیا اس موقع پر آفریدی خود بھی موجود تھے۔
قومی کرکٹ ٹیم کے کھلاڑی اسٹیڈیم کی افتتاحی تقریب کے بعد پی آئی اے کی پرواز پی کے 353 میں پشاور سے واپس کراچی آرہے تھے۔ آرمی چیف کے اس اقدام پر آفریدی نے اُن کا شکریہ ادا کرتے ہوئے کہا کہ ’’آپ میرے اور پوری قوم کے ہیرو ہیں‘‘۔
اسلام آباد: ایم کیو ایم نے نیب کو مزید فعال بنانے اور نیب آرڈیننس میں ترمیم کرکے نیا قانون وضع کرنے کے لیے قرارداد قومی اسمبلی سیکریٹریٹ میں جمع کرا دی۔
تفصیلات کے مطابق قومی اسمبلی میں قرارداد ایم کیو ایم کے رہنما علی رضا عابدی، عبدالوسیم، شیخ صلاح الدین اور ساجد احمد کی جانب سے جمع کرائی گئی۔ قرارداد میں ایم کیو ایم رہنماؤں کی جانب سے موقف اختیار کیا گیا کہ کرپشن ملک کے لیے ناسور بن چکا ہے۔
متحدہ رہنماؤں کی جانب سے قرارداد میں مطالبہ کیا گیا ہے کہ کرپشن کے خاتمے میں نیب ناکام ثابت ہوا ہے، نیب آرڈیننس میں ترمیم کرکے اسے مزید فعال اور مضبوط بنایا جائے تاکہ نیب کرپٹ مافیا کے خلاف موثر کارروائی کر سکے۔
خیال رہے کہ ملک بھر میں کرپشن کو مانیٹر کرنے کے لیے نیب کا قیام عمل میں لایا گیا تھا، ملک بھر میں کرپشن کے خلاف شروع ہونے والے آپریشن کے خلاف نیب کو متحرک کیا گیا تھا۔
نیب نے قومی خزانے کو نقصان پہنچانے والے بڑے ملزمان کو گرفتار کیا ہے جبکہ کرپشن کرنے والوں کے لیے رضاکارانہ پیسوں کی واپسی کے لیے اسکیم متعارف کروائی تھی جس کے بعد قومی خزانے کو لوٹنے والے افراد نے کروڑوں روپے حکومتی خزانے میں جمع کروائے تھے۔
کراچی : پاکستان پیپلز پارٹی کے رہنماؤں نے چیئرمین بلاول بھٹو زرداری کو پارلیمانی سیاست میں لانے کا فیصلہ کرلیا۔بلاول کو لاڑکانہ کی آبائی نشست این اے 204 سے ضمنی انتخابات کا ٹکٹ دیا جائے گا۔
تفصیلات کے مطابق گزشتہ روز پاکستان پیپلزپارٹی کے اجلاس میں رہنماؤں نے چیئرمین کو پارلیمانی سیاست میں آنے کا مشورہ دیتے ہوئے فیصلہ کیا کہ لاڑکانہ کی آبائی نشست سے انہیں متخب کرواکر اسمبلی کا حصہ بنایا جائے گا۔
بلاول بھٹو کے الیکشن لڑنے کے لیے نشست کا فیصلہ دبئی اجلاس میں ہوگا تاہم پارٹی کے سینیئررہنماؤں نے بلاول بھٹو کو لاڑکانہ 204سے الیکشن لڑنے کا مشورہ دے دیا۔
بلاول بھٹو خود لاڑکانہ کی آبائی نشست سے الیکشن لڑنا چاہتے ہیں، تاہم پارٹی مٹینگ میں ملیر اور سے خالی ہونے والی نشست کو دوسرے اور لیاری سے الیکشن لڑنا بھی آپشنزمیں شامل ہے ۔
واضح رہے کہ این اے 204 لاڑکانہ سے ایاز سومرو پیپلزپارٹی کے ایم این اے ہیں، ایاز سومرو بینظیر بھٹو کے قریبی ساتھی تھے ،آج کل پارٹی سے کنارہ کش ہیں۔
نمائندہ اے آر وائی ارباب چانڈیو کے مطابق بلاول کی عملی سیاست میں آنے کا اعلان یوم تاسیس کی تقریب میں کیا جائے گا، چیئرمین کو جنوبی پنجاب کی نشست سے بھی ٹکٹ دیا جاسکتا ہے۔
کراچی: سندھ اسمبلی میں اقلیتوں کے تحفظ سے متعلق بل متفقہ طور پر منظور کرلیا گیا جس کے تحت زبردستی مذہب تبدیل کروانے پر 5 سال قید کی سزا ہوگی۔
تفصیلات کے مطابق یہ بل ایک سال قبل مسلم لیگ فنکشنل سے تعلق رکھنے والے رکن اسمبلی نند کمار گولکانی نے پیش کیا تھا جسے آج منظور کرلیا گیا۔
بل کے مطابق بالغ شخص کو مذہب تبدیل کرنے پر غور کے لیے 21 دن کا وقت دیا جائے گا جبکہ 18سال سے کم عمری پر مذہب کی تبدیلی جرم تصور کیا جائے گا۔ بل میں اس شخص کے لیے بھی 5 سال قید کی سزا رکھی گئی ہے جو مذہب کی جبری تبدیلی میں سہولت کاری کا کردار ادا کرے گا۔
بل میں واضح کیا گیا ہے کہ مذہبی آزادی، پسند کی شادی کی آزادی، اور شادی کے لیے کسی بھی شخص کے انتخاب کی آزادی کا انتخاب ہر شخص کو حاصل ہوگا۔ بل میں زبردستی شادی کروانے والے افراد کے لیے بھی 3 سال کی سزا بشمول جرمانہ رکھی گئی ہے۔
واضح رہے کہ سندھ وہ پہلا صوبہ بن گیا ہے جہاں مذہب کی جبری تبدیلی کے حوالے سے قانون پاس کیا گیا ہے۔
قبل ازیں بھی سندھ اسمبلی میں ہندو برادری کی شادیوں کو رجسٹر کرنے کے حوالے سے ہندو میرج بل منظور کیا گیا تھا۔
کراچی : ہائی پروفائل کیسزکے گرفتار ملزمان عاصم کیپری اوراسحاق بوبی کی جےآئی ٹی مکمل کرلی گئی۔ حساس ادارے نے اختلافات کرتے ہوئے تاریخ میں پہلی بار اعتراضات اٹھادیئے۔
تفصیلات کے مطابق معروف قوال امجد صابری قتل سمیت ہائی پروفائل مقدمات میں گرفتار ملزمان عاصم کیپری اوراسحاق بوبی کی جےآئی ٹی مکمل کرلی گئی، تاریخ میں پہلی بار ہائی پروفائل جے آئی ٹی پر حساس ادارے نے اعتراضات اٹھا دئیے۔
آٹھ صفحات کا اختلافی نوٹ جے آئی ٹی سے منسلک کردیا گیا، رپورٹ کے مطابق مقدمات میں عینی شاہدین ،موقعہ معائنہ اور ملزمان کے بیانات میں تضادات ہیں جرائم اور ان کے حقائق جاننے کے بہانے الزامات کو درست ثابت کرانے پر زور دیا گیا۔
ملزمان پر پہلے انسٹھ کیسز تھے جو بعد میں پینتالیس ہوئے پھر پچیس کردیئے گئے،حساس ادارے نے اعتراض اٹھایا کہ تبت سینٹر، پارکنگ پلازہ سمیت اہم واقعات میں ملزمان کے بیانات میں فرق ہے، بار بار اصرار کے باوجود ملزمان کی کیس فائل فراہم نہیں کی گئی۔
حساس اداروں کے نوٹ میں مزید کہا گیا ہے کہ محکمہ داخلہ کے حکم پر چھ افسران پر مشتمل جے آئی ٹی بنائی گئی تھی لیکن احکامات کے بر خلاف دس افسران جے آئی ٹی میں شامل کئے گئے۔
ملزمان کا بیان ہے کہ انہوں نے ٹارگٹ کلنگ میں ہمیشہ نائن ایم ایم استعمال کیا، جبکہ بعض واقعات میں تیس بور کے خول بھی ملے ہیں۔
رپورٹ میں کہا گیا ہے کہ اطمینان بخش تفتیش سے قبل ہی وزیر اعلیٰ سندھ سید مراد علی شاہ سے ملزمان کی گرفتاری سے متعلق پریس کانفرنس کروادی گئی۔
کراچی: اے آر وائی فلمز کے زیر اہتمام بننے والی فلم ’دوبارہ پھر سے‘ کا کراچی میں شاندار پریمیئر منعقد کیا گیا۔ پریمیئر میں فلم کی کاسٹ سمیت متعدد فنکاروں نے شرکت کی۔
کراچی کے ایک سینما میں منعقد ہونے والے دوبارہ پھر سے کے پریمیئر میں مختلف فنکاروں نے بڑی تعداد میں شرکت کی۔ فنکاروں نے پاکستانی فلم انڈسٹری کی بحالی کے لیے اے آر وائی کی کوششوں کو سراہا۔
فلم کی ہدایت کاری کے فرائض جیکسن ہائیٹس اور رام چند پاکستانی جیسے منفرد پروجیکٹس کی ہدایت کار مہرین جبار نے ادا کیے ہیں۔
:ریویو
فلم کا آغاز حماد (عدیل حسین) سے ہوتا ہے جو ایک فیری پر ایک اجنبی لڑکی (حریم فاروق) کو دیکھ کر اس سے متاثر ہوجاتا ہے۔
اسی روز اس کے دوست ثمر (صنم سعید) اور واسع (علی کاظمی) اسے اپنے گھر پارٹی میں مدعو کرتے ہیں جہاں ثمر اسے اپنی دوست نتاشا (طوبیٰ صدیقی) سے ملواتی ہے۔ یہیں حماد کو وہ اجنبی لڑکی یعنی زینب بھی نظر آجاتی ہے اور ان کے درمیان شناسائی کا آغاز ہوتا ہے۔
زینب شادی شدہ ہوتی ہے اور اس کا شوہر (شاذ خان) اپنے باپ کی بے اعتنائی کا شکار ایک بد مزاج شخص ہوتا ہے۔ دونوں اس شادی سے خوش نہیں ہوتے اور فلم میں بہت جلدی ان کی علیحدگی دکھا دی گئی ہے تاہم اپنے بیٹے کے لیے وہ وقتاً فوقتاً ملاقات پر مجبور ہوتے ہیں جس کا اختتام ہر بار بدمزگی پر ہوتا ہے۔
دوسری طرف حماد زینب کو پسند کرنے لگتا ہے اور اس کے لیے وہ نتاشا سے بھی اپنا تعلق ختم کردیتا ہے، لیکن ان دونوں یعنی حماد اور زینب کا ملنا اتنا آسان نہیں ہے اور یہی مشکل پوری فلم پر محیط ہے۔
فلم میں تمام کرداروں نے بہترین اداکاری کا مظاہرہ کیا ہے۔ حریم فاروق پاکستانی انڈسٹری کی ابھرتی ہوئی اداکارہ ہیں جو مختلف ڈراموں میں بھی اپنی اداکاری کے جوہر دکھا چکی ہیں۔
صنم سعید کی اداکاری میں بھی کوئی کلام نہیں، ان کے ڈرامے نہ صرف پاکستان بلکہ بھارت میں بھی بے حد پسند کیے گئے۔
اسی طرح علی کاظمی اور عدیل حسین نے بھی شاندار اداکاری کا مظاہرہ کیا اور یہ فلم ان کے کیریئر کو بلندی پر پہنچانے کا ذریعہ ثابت ہوگی۔
فلم کا بہترین حصہ اس کی موسیقی ہے جو شیراز اپل نے ترتیب دی ہے۔ فلم میں بھارتی گلوکارہ ریکھا بھردواج کی آواز میں گایا ہوا گانا بھی شامل ہے۔
فلم دوبارہ پھر سے مجموعی طور پر پاکستانی فلم انڈسٹری کا ایک بہترین اضافہ ہے۔ فلم کو 25 نومبر کو ریلیز کردیا جائے گا۔
لاہور: حکومتِ پنجاب ریسکیو 1122 کی پہنچ گنجان آباد علاقوں میں یقینی بنانے کے لیے پانچ شہروں میں موٹر سائیکل ایمبولینسیں چلائے گی، یہ تجربہ دنیا کے کئی دیگر ممالک میں کیا جاچکا ہے۔
تفصیلات کے مطابق گوجرانوالا، فیصل آباد، لاہور ، ملتان اور راولپنڈی میں پچاس پچاس موٹر سائیکل ایمبولینسز دی جائیں گی۔ وزیرِ اعلی پنجاب نے ریسکیو1122 کی سمری منظور کر لی۔
اس منصوبے کا مقصد یہ ہے کہ جن تنگ گلیوں اور علاقوں تک ایمبولینسز نہیں پہنچ سکتیں وہاں موٹر سائیکل ایمبولینسیں کام آئیں گی اور مریضوں کو ابتدائی طبی امداد کے بعد بیک اپ پر موجود ایمبولینس تک پہنچائیں گی۔
دو تربیت یافتہ ریسکیو اہلکار ہر موٹر سائیکل ایمبولینس پر ابتدائی طبی امداد کے لئے موجود رہیں گے۔ موٹر سائیکل ایمبولینسوں کے اس منصوبے کا آئیڈیا برطانیہ، ترکی اور جاپان میں کامیابی سے چلتی موٹر سائیکل ایمبولینسوں کے ماڈلز سے لیا گیا ہے۔
