لاہور: ہربنس پورہ کے قریب نامعلوم افراد کی فائرنگ سے زخمی ہونے والی اسٹیج اداکارہ قسمت بیگ اسپتال میں دوران علاج دم توڑ گئیں، انہیں آج صبح گھر واپس جاتے وقت نشانہ بنایا گیا تھا۔
تفصیلات کےمطابق اسٹیج اداکارہ قسمت بیگ اپنی گاڑی میں محافظ کے ہمراہ تقریب سے واپس آرہی تھیں کہ ہربنس پورہ کے مقام پر مسلح موٹر سوار ملزمان نے اندھا دھند فائرنگ کی، جس کے نتیجے میں اداکارہ اور اُن کا محافظ زخمی ہوا۔
فائرنگ کے بعد اداکارہ اور محافظ کو فوری طور پر طبی امداد کے لیے قریبی اسپتال منتقل کیا گیا، جہاں ڈاکٹروں نے اُن کو بچانے کی سرتوڑ کوشش کی تاہم وہ زخموں کی تاب نہ لاتے ہوئے دم توڑ گئیں، اسپتال انتظامیہ کے مطابق اداکارہ کے سر اور جسم میں 8 گولیاں لگای تھیں جس کے باعث وہ جانبر نہ ہوسکیں جبکہ محافظ کو ابتدائی طبی امداد دے کر اسپتال سے روانہ کردیا گیا ہے۔
اداکارہ کے محافظ کا کہنا ہے کہ بنس پورہ کے مقام پر مسلح افراد نے گاڑی روکی اور لوٹ مار کرنے لگے تاہم مزاحمت کرنے پر انہوں نے اندھا دھند فائرنگ کی اور نقدی ، موبائل چھین کر فرار ہوگئے۔
واقعے کے بعد پولیس کی نفری جائے وقوعہ پر پہنچ کر خول اکھٹے کرلیے جبکہ محافظ کا بیان قلم بند کرنے کے بعد تفتیش کا آغاز کردیا گیا ہے، پولیس کا کہنا ہے کہ اداکارہ کو 8 گولیاں لگیں تھیں۔
دوسری جانب خاندانی ذرائع نے مؤقف اختیار کیا ہے کہ اداکارہ پر اس سے قبل بھی دو بار قاتلانہ حملے ہوچکے ہیں یہ واقعہ ڈکیتی کا نہیں بلکہ قسمت بیگ کو باقاعدہ ٹارگٹ کر کے قتل کیا گیا ہے۔
گوجرانوالہ: نندی پور پاور پلانٹ سے بجلی کی پیداوار کئی ماہ سے بند ہے، نیپرا نے وزارت بجلی سے جواب طلب کرلیا، ناردرن پاور کو بھاری جرمانہ عائد کیے جانے کا بھی امکان ہے۔
تفصیلات کے مطابق نندی پور پاورپلانٹ سے بجلی کی پیداوار چھ ماہ سے بند ہونے کا انکشاف ہوا ہے، نیپرا نے معاملے کا نوٹس لے کر وزارت پانی وبجلی سےجواب طلب کرلیا۔
نیپرا حکام کا کہنا ہے کہ نندی پورپاورپلانٹ بند ہونے سے اب تک اربوں روپے کا نقصان ہوچکا ہے۔ حکام کے مطابق پلانٹ اب کمرشل آپریشن میں ہے اس صورت حال میں پاور پلانٹ سے کئی ماہ گزرنے کے باوجود بجلی کی پیداوار نہ ہونا معاہدے کی صریحاً خلاف ورزی ہے۔
حکام نے متنبہ کیا کہ پلانٹ بند ہونے سے ناردرن پاور کمپنی پر بھی بھاری جرمانہ عائد کیا جا سکتا ہے جبکہ دیگر ذمہ داروں کے خلاف سخت کارروائی کا بھی امکان ہے۔
واضح رہے کہ نندی پور پاور پلانٹ کا افتتاح سال 2014ء کو وزیراعظم نواز شریف نے کیا تاہم یہ منصوبہ اول روز سے ہی متنازع رہا، مذکورہ منصوبہ 2011 کو مکمل ہونا تھا لیکن ناگزیر وجوہات کی بنا پر کام رکا رہا۔
نندی پور پاور پراجیکٹ 425 میگا واٹ بجلی پیدا کرنے کا منصوبہ تھا جس کی ابتدائی لاگت 23 ارب روپے تھی جو کہ بڑھ کر 57.38ارب روپے تک پہنچ گئی تھی اور بعض ذرائع کے مطابق منصوبہ کل 84 ارب کی لاگت سے مکمل کیا گیا۔
تاشقند: ازبک نیشنل سیکیورٹی کے اہلکار نے دعویٰ کیا ہے کہ ازبکستان کے پہلے صدر اسلام کریموف کی بیٹی گلنارا کو زہر دے کر قتل کردیا گیا، گلنارا کا شمارسوویٹ یونین کی ارب پتی خواتین میں ہوتا تھا۔
تفصیلات کے مطابق ازبکستان کے پہلے صدر اسلام کریموف کی صاحبزادی اور سوویت یونین کی ارب پتی خاتون گلنارا کو زہر دے کر قتل کرنے کی افواہیں گردش کررہی ہیں، غیر ملکی خبررساں ادارے نے دعویٰ کیا ہے کہ گلنارا کو 5 نومبر کو ہی زہر دے کر قتل کیا گیا۔
غیر ملکی خبر رساں ادارے کے مطابق ازبک صدر کی بیٹی کو زہر دے کر قتل کرنے کی تصدیق نیشنل سیکیورٹی سروس کا اہلکار بھی کرچکا ہے، گزشتہ دو سال سے مقتولہ کو حکومت کی جانب سے پاگل خانے میں قید رکھا گیا تھا۔
چوالیس سالہ گلنارا کریموف کا شمار دنیا کی خوبصورت اور امیر ترین خواتین میں ہوتا تھا، انہوں نے ہاورڈ یونیورسٹی سے ایم بی اے کی تعلیم حاصل کر کے اپنے کریئر کا آغاز کیا۔ خوبصورت ہونےکے باعث گلنارا نے فیشن انڈسٹری میں بھی قدم رکھا اور اپنی کامیابی کے جھنڈے گاڑے تھے۔
ازبکستان کے سابق صدر اسلام کریموف کا انتقال رواں سال ستمبر میں ہوا ۔ حکومتی قید میں ہونے کے باعث صاحبزادی کو والد کے جنازے میں شرکت کی اجازت نہیں دی گئی تھی۔ گلنارا کو ازبک صدر کا حقیقی جانشین سمجھا جاتا تھا تاہم 2013 میں والد اور اُن کے درمیان شدید اختلافات پیدا ہوگئے تھے جس کے بعد رشتے میں بگاڑ پیدا ہوا۔
یروشلم: اسرائیلی پارلیمنٹ میں اذان پر پابندی کی تجویز کے پیچھے اسرائیلی وزیراعظم کے بیٹے کے ملوث ہونے کا انکشاف ہوا ہے۔
اسرائیلی میڈیا کے مطابق اسرائیلی پارلیمنٹ میں ایک تجویز پیش کی گئی جس میں مسلمانوں کی عبادت گاہ سے بلند ہوتی ہوئی آواز اذان کو خلل قرار دیتے ہوئے اذان پر پر پابندی کا مطالبہ کیا گیا۔
ایک اسرائیلی ٹی وی نے دعویٰ کیا کہ اذان پر پابندی کے قانون کے پیچھے اسرائیلی وزیراعظم نیتن یاہو کے بیٹے کا ہاتھ ہے، اسرائیلی وزیراعظم کا بیٹا قیساریا میں نتین یاہو خاندان کے گھر میں اپنے ایک دوست کے ہمراہ موجود تھا کہ اس دوران اس کے غیرملکی دوست کو اذان کی آواز سے الجھن محسوس ہوئی جس پر اس نے یہ فیصلہ کیا۔
یاد رہے کہ اسرائیلی وزیراعظم نے رات 11 بجے سے صبح 7 بجے تک اذان پر پابندی کی تجویز پیش کی ہے جب کہ پارلیمنٹ میں موجودہ صیہونی ارکان نے اس تجویز کو بل بعدازاں ایکٹ بنا کر نافذ کرنے حمایت کی ہے۔
بیت المقدس کی سپریم اسلامک کمیٹی نے متعلقہ تجویز کی مذمت کرتے ہوئے کہا ہے کہ یہ نازیبا عمل کسی صورت قبول نہیں کریں گے۔
اسرائیلی پارلیمنٹ کے عرب رکن ڈاکٹر طیبی کا کہنا ہے کہ اگر اذان پر پابندی عائد کی گئی تو وہ پابندی کے خلاف سپریم کورٹ سے رجوع کریں گے کیوں کہ پابندی کا مقصد مسلمانوں کے حقوق سلب کرتے ہوئے انہیں امتیازی سلوک کا نشانہ بناناہے ۔
پابندی کی تجویز کے خلاف اسرائیلی پارلیمنٹ کے مسلمان رکن ابوعرار نے پارلیمنٹ کے اجلاس میں اذان دے کر اس پابندی کو مسترد کردیا، اذان کے وقت صیہونی ارکان نے شور مچایا لیکن ابو عرار نے اذان مکمل کرکے ہی دم لیا۔
ایڈلڈ: آسٹریلوی خاتون گھر میں اپنی 14 پالتو بلیوں کو بند کر کے چلی گئی جس کے بعد بلیوں نے کھانا پینا نہ ملنے اور بھوک کے باعث ایک دوسرے پر حملہ کر کے ہلاک کرکے خوراک کی کمی کو پورا کیا۔
برطانوی خبر رساں ادارے کے مطابق یہ واقعہ جنوبی آسٹریلیا کے شہر ایڈلڈ میں پیش آیا، جہاں 43 سالہ خاتون اپنے گھر میں 14 پالتو بلیوں کو بند کر کے خود روانہ ہوگئیں۔
آسٹریلوی خاتون روانہ ہوتے وقت بلیوں کے کھانے پینے کے انتظامات کر کے نہیں گئی تھیں پھر ایک وقت ایسا آیا کہ جب بلیوں کو بھوک کی شدت ستانے لگی اور انہوں نے ایک دوسرے پر حملہ کیا اور آپس کے حملے کے نتیجے میں ہلاک ہوگئیں۔
واقعے کی اطلاع ملنے پر جانوروں کے تحفظ کے لیے قائم برطانوی تنظیم (آر ایس پی سی اے) نے نوٹس لیا اور حکومت مقامی حکومت کو خاتون کے خلاف کارروائی کے لیے نوٹس بھیجا، عالمی ادارے کی جانب سے خط موصول ہونے کے بعد مقامی انتظامیہ نے کارروائی کا آغاز کیا۔
آر ایس پی سی اے کے مطابق خاتون گھر سے روانہ ہوتے وقت بلیوں کے لیے کھانے پینے کے انتظامات کر کے نہیں گئیں جس کے باعث بلیوں نے ایک دوسرے پر حملہ کیا اور صرف ایک بلی زندہ بچی جس کی حالت کافی خراب تھی۔
مقامی انتظامیہ نے بلیوں کو گھر پر اکیلا چھوڑ کر جانے اور ان کی ہلاکت سامنے آنے کے بعد خاتون کو جانوروں کے ساتھ بے رحمی برتنے کا مجرم قرار دے دیا۔ پالتو جانوروں کی پرورش میں غلفت برتنے پر خاتون کو سزا سنائی گئی ہے۔
قانون کی خلاف ورزی کرنے پر خاتون کو ایک سال کے لیے نیک چال چلن اور جانوروں کو پالنے پر پابندی عائد کردی گئی جبکہ زندہ بچ جانے والی واحد بلی کی طبیعت بہتر ہونے کے بعد اُسے کسی اور کی ملکیت میں دے دیا گیا۔
کراچی : واجبات کی عدم ادائیگی پر پی ایس او کی جانب سے فیول فراہم نہ کیے جانے کی وجہ سے پی آئی اے کی پرواز مقررہ وقت پرروانہ نہ ہوسکی، مسافر پی آئی اے انتظامیہ پر برس پڑے۔
تفصیلات کے مطابق واجبات کی عدم ادائیگی پر پی آئی اے اورپی ایس او کی چپقلش پھرعروج پر پہنچ گئی ہے، پی آئی اے پی ایس او کا 15 ارب روپے کا نادہندہ ہے۔
دس روز قبل واجبات کی عدم ادائیگی پرپی ایس او نے پی آئی اے کو تیل کی فراہمی بند کردی تھی، بعد ازاں واجبات کی ادائیگی کی یقین دہانی پرتیل کی فراہمی شروع کی گئی۔
معاہدے کے مطابق پی آئی اے کو روزانہ کی بنیاد پر تیل کی رقم یومیہ ادا کرنا تھی، پی آئی اے اپنے آپریشنز کو برقرار رکھنے کیلیے یومیہ کی بنیاد پر 30 کروڑ روپے کاتیل خریدتا ہے، جبکہ گزشتہ روز یومیہ ادائیگی بھی نہیں کی گئی۔
یومیہ ادائیگی روکنے پر پی ایس او نے آج پھرتیل کی فراہمی بند کردی، تاہم تیل کی فراہمی روکنے پر پی آئی اے کا آپریشن شدید متاثر ہوا ہے۔
تیل کی عدم دستیابی کے باعث کراچی سے لاہورجانے والی پرواز تاخیر کا شکارہوئی، کراچی سے لاہور جانے والی پرواز پی کے 304 کا مقررہ وقت سہ پہر3 بجے ہے، تیل کی عدم دستیابی کی وجہ سے پروازابھی تک روانہ نہ ہوسکی۔
پرواز کے روانہ نہ ہونے کی وجہ سے مسافروں نے احتجاج کیا، ان کا کہنا تھا کہ مسافرمہنگے ٹکٹ لینے کے باوجود وقت پراپنی منزل پرنہیں پہنچ سکتے، پی آئی اے مسافروں کو مہنگے ٹکٹ فروخت کرتی ہے اورتیل کے پیسے کیوں نہیں دیتی۔
اسلام آباد: وزیراعظم نواز شریف نے کہا کہ جنرل راحیل شریف ایک بہترین سپہ سالار ہیں، ان کی قابلیت کے باعث انہیں آرمی چیف بنایا گیا، راحیل شریف کی قیادت میں پاک فوج نے دشمن کو ہرمحاذ پر شکست دی۔
یہ بات انہوں نے وزیراعظم ہائوس میں آرمی چیف جنرل راحیل شریف کے اعزاز میں دی گئی الوداعی تقریب سے خطاب کرتے ہوئے کہی۔
وزیراعظم نواز شریف نے جنرل راحیل شریف کی بطور آرمی چیف خدمات کو سراہا اور کہا کہ جنرل راحیل شریف کے خاندان نے قوم کی خدمت کی ان کا خاندان ملکی دفاع کے طور پر جانا جاتا ہے۔
وزیراعظم نے کہا کہ راحیل شریف کی قابلیت پر انہیں آرمی چیف بنایا گیا وہ ایک بہترین سپہ سالار ہیں،تقریب کا مقصد راحیل شریف کی خدمات کو خراج تحسین پیش کرنا ہے، ان کی قیادت میں فوج نے دہشت گردی کا مقابلہ کیا، میں نے ہمیشہ راحیل شریف کے اسٹریٹجک مشوروں کو اپنایا۔
انہوں نے مزید کہا کہ دنیا ہمارے انسداد دہشت گردی کے عزم سے واقف ہے، پاک فوج نے دہشت گردوں کو ہر محاذ پر شکست دی۔
جنرل راحیل شریف نے اپنی خدمات کو سراہے جانے پر وزیراعظم کا شکریہ ادا کیا اور کہا کہ بھرپور حمایت اور شاندار الفاظ پر وزیراعظم کا شکر گزار ہوں۔
قبل ازیں راحیل شریف وزیراعظم ہائوس پہنچے جہاں وزیراعظم نے ان کا استقبال کیا۔
وزیراعظم اور آرمی چیف کی ون ٹو ون ملاقات
عشائیے سے قبل آرمی چیف اور وزیراعظم کے درمیان ون ٹو ون ملاقات ہوئی جس میں مختلف امور پر تبادلہ خیال ہوا، ذرائع کا کہنا ہے کہ ملاقات میں نئے آرمی چیف کی تقرری کے حوالے سے بھی بات ہوئی،نئے آرمی چیف کے لیے وزارت دفاع کی جانب سے سمری وزیراعظم ہاؤس کو موصول ہوگئی ہے۔
تقریب میں عسکری قیادت میں پاک بحریہ کے سربراہ ایڈمرل ذکا اللہ ،پاک فضائیہ کے سربراہ ایئرچیف سہیل امان، نئے آرمی چیف کے لیے نامزد چاروں لیفٹیننٹ جنرلززبیر حیات،جنرل اشفاق ندیم،جاوید اقبال رمدے اور قمر جاوید باجوہ، ڈائریکٹر جنرل آئی ایس آئی میجر جنرل رضوان اختر، ڈی جی آئی ایس پی آر لیفٹیننٹ جنرل عاصم سلیم باجوہ، ڈی جی ملٹری آپریشنز(ایم او)، ڈی جی ملٹری انٹیلی جنس، کور کمانڈرز، پرنسپلز اسٹاف آفیسرز نے شرکت کی۔
سول قیادت میں وزیر دفاع خواجہ آصف،وزیر برائے دفاعی پیداوار رانا تنویر،وزیر خزانہ اسحق ڈار، مشیر خارجہ سرتاج عزیز،سیکریٹری خارجہ اعزاز چوہدری، معاون خصوصی برائے امور خارجہ طارق فاطمی، مشیر قومی سلامتی ناصر جنجوعہ، مشاہد حسین سید، عبدالقادر بلوچ اور دیگر وزرا و مشیران نے شرکت کی۔
وزیراعظم نواز شریف نے فرداً فرداً تمام عسکری افسران سے ملاقات کی اور مصافحہ کیا، اسی طرح جنرل راحیل شریف نے بھی تمام افراد سے فرداً فرداً ملاقات کی اور ان سے ہاتھ ملایا۔
راحیل شریف چاروں لیفٹیننٹ جنرلز سے بھی ملاقات کریں گے جن کے نام نئے آرمی چیف کے لیے نامزد ہیں ان میں لیفٹیننٹ جنرل زبیر حیات کا نام سینیارٹی لسٹ میں سرفہرست ہے، وہ اس وقت چیف آف جنرل اسٹاف کے عہدے پر فائز ہیں۔
فہرست میں دوسرانام کورکمانڈر ملتان لیفٹیننٹ جنرل اشفاق ندیم کا ہے جنہوں نے آپریشن ضرب عضب کا خاکہ تیار کیا، بہاولپور کے کور کمانڈر لیفٹیننٹ جنرل جاوید اقبال رمدے تیسرے نمبر پر اور چوتھے نمبر پر جی ایچ کیو میں انسپکٹر جنرل آف ٹریننگ اینڈ ایوولوشن لیفٹیننٹ جنرل قمر جاوید باجوہ کا نام زیر غور ہے جو پاک فوج کی سب سے بڑی دسویں کور کی کمانڈ کرچکے ہیں۔
دو روز قبل وزیراعظم نوازشریف نے چیئرمین جوائنٹ چیف آف اسٹاف کمیٹی جنرل راشد محمود کے اعزاز میں ظہرانہ دیا تھا جس میں پاک بحریہ، پاک فضائیہ اور قومی سلامتی کے مشیر ناصر جنجوعہ نے شرکت کی تھی۔
راحیل شریف توسیع نہ لینے والے دوسرے آرمی چیف
واضح رہے کہ جنرل راحیل شریف اپنی مدت ملازمت میں توسیع نہ لینے والے دوسرے جرنیل ہیں، قبل ازیں جنرل عبدالوحید کاکڑ نے بھی توسیع لینے سے انکار کردیا تھا۔
پشاور: پی آئی اے کی پرواز پی کے 353 میں آگ لگنے کے بعد ائیرپورٹ پر ہنگامی لینڈنگ کی گئی جس میں قومی کرکٹ ٹیم کے نامور کھلاڑی شاہد خان آفریدی سمیت تمام مسافروں کو بحفاظت جہاز سے باہر نکال لیا گیا۔
تفصیلات کے مطابق پشاور سے کراچی آنے والی قومی ائیرلائن کی پرواز پی کے 353 میں اچانک آگ بھڑک اٹھی، جس کے بعد پرواز کو ہنگامی بنیادوں پر پشاور ائیرپورٹ پر اتارا گیا۔
ائیرپورٹ انتظامیہ کے مطابق الیکٹرک شٹ ڈاؤن کے باعث طیارے کے عقبی حصے میں آگ لگی تاہم تمام مسافروں کو بحفاظت نکال لیا گیا ہے، آگ پر قابو پانے کے بعد طیارے کو کلیئر قرار دے دیا گیا ہے۔
خیال رہے کہ آج صبح آرمی چیف جنرل راحیل شریف نے خیبر ایجنسی کی تحصیل باڑہ کا دورہ کیا اور وہاں شاہد آفریدی کے نام سے بنائے جانے والے اسٹیڈیم کا افتتاح کیا اس موقع پر آفریدی خود بھی موجود تھے۔
قومی کرکٹ ٹیم کے کھلاڑی اسٹیڈیم کی افتتاحی تقریب کے بعد پی آئی اے کی پرواز پی کے 353 میں پشاور سے واپس کراچی آرہے تھے۔ آرمی چیف کے اس اقدام پر آفریدی نے اُن کا شکریہ ادا کرتے ہوئے کہا کہ ’’آپ میرے اور پوری قوم کے ہیرو ہیں‘‘۔
اسلام آباد: ایم کیو ایم نے نیب کو مزید فعال بنانے اور نیب آرڈیننس میں ترمیم کرکے نیا قانون وضع کرنے کے لیے قرارداد قومی اسمبلی سیکریٹریٹ میں جمع کرا دی۔
تفصیلات کے مطابق قومی اسمبلی میں قرارداد ایم کیو ایم کے رہنما علی رضا عابدی، عبدالوسیم، شیخ صلاح الدین اور ساجد احمد کی جانب سے جمع کرائی گئی۔ قرارداد میں ایم کیو ایم رہنماؤں کی جانب سے موقف اختیار کیا گیا کہ کرپشن ملک کے لیے ناسور بن چکا ہے۔
متحدہ رہنماؤں کی جانب سے قرارداد میں مطالبہ کیا گیا ہے کہ کرپشن کے خاتمے میں نیب ناکام ثابت ہوا ہے، نیب آرڈیننس میں ترمیم کرکے اسے مزید فعال اور مضبوط بنایا جائے تاکہ نیب کرپٹ مافیا کے خلاف موثر کارروائی کر سکے۔
خیال رہے کہ ملک بھر میں کرپشن کو مانیٹر کرنے کے لیے نیب کا قیام عمل میں لایا گیا تھا، ملک بھر میں کرپشن کے خلاف شروع ہونے والے آپریشن کے خلاف نیب کو متحرک کیا گیا تھا۔
نیب نے قومی خزانے کو نقصان پہنچانے والے بڑے ملزمان کو گرفتار کیا ہے جبکہ کرپشن کرنے والوں کے لیے رضاکارانہ پیسوں کی واپسی کے لیے اسکیم متعارف کروائی تھی جس کے بعد قومی خزانے کو لوٹنے والے افراد نے کروڑوں روپے حکومتی خزانے میں جمع کروائے تھے۔
کراچی : پاکستان پیپلز پارٹی کے رہنماؤں نے چیئرمین بلاول بھٹو زرداری کو پارلیمانی سیاست میں لانے کا فیصلہ کرلیا۔بلاول کو لاڑکانہ کی آبائی نشست این اے 204 سے ضمنی انتخابات کا ٹکٹ دیا جائے گا۔
تفصیلات کے مطابق گزشتہ روز پاکستان پیپلزپارٹی کے اجلاس میں رہنماؤں نے چیئرمین کو پارلیمانی سیاست میں آنے کا مشورہ دیتے ہوئے فیصلہ کیا کہ لاڑکانہ کی آبائی نشست سے انہیں متخب کرواکر اسمبلی کا حصہ بنایا جائے گا۔
بلاول بھٹو کے الیکشن لڑنے کے لیے نشست کا فیصلہ دبئی اجلاس میں ہوگا تاہم پارٹی کے سینیئررہنماؤں نے بلاول بھٹو کو لاڑکانہ 204سے الیکشن لڑنے کا مشورہ دے دیا۔
بلاول بھٹو خود لاڑکانہ کی آبائی نشست سے الیکشن لڑنا چاہتے ہیں، تاہم پارٹی مٹینگ میں ملیر اور سے خالی ہونے والی نشست کو دوسرے اور لیاری سے الیکشن لڑنا بھی آپشنزمیں شامل ہے ۔
واضح رہے کہ این اے 204 لاڑکانہ سے ایاز سومرو پیپلزپارٹی کے ایم این اے ہیں، ایاز سومرو بینظیر بھٹو کے قریبی ساتھی تھے ،آج کل پارٹی سے کنارہ کش ہیں۔
نمائندہ اے آر وائی ارباب چانڈیو کے مطابق بلاول کی عملی سیاست میں آنے کا اعلان یوم تاسیس کی تقریب میں کیا جائے گا، چیئرمین کو جنوبی پنجاب کی نشست سے بھی ٹکٹ دیا جاسکتا ہے۔
