وزیر اعظم پاکستان کا ماہرین اور پروفیشلنز کی آسامیوں کی تخلیق کرنے کے اختیار کو ختم کر دیا گیا ہے۔

اے آر وائی نیوز کو ذرائع سے ملنے والی اطلاعات کے مطابق اہم تعیناتیوں اور آسامیوں کی تخلیق کے معاملے پر اہم پیش رفت ہوئی ہے اور ان آسامیوں کی تخلیق کا وزیراعظم کا اختیار ختم کر دیا گیا ہے اور اب یہ اختیار وزرا، وزرائے مملکت، مشیروں سیکریٹریز کے حوالے کر دیا ہے۔

ذرائع نے بتایا کہ وزیراعظم کا ماہرین اور پروفیشنلز کی آسامیوں کی تخلیق کا اختیار ختم کرنے کی سفارشات کی وفاقی کابینہ نے شہباز شریف کی اجازت سے منظوری دے دی اور سرکولیشن کے ذریعے ان سفارشات کو منظور کیا گیا۔

ذرائع کا کہنا ہے کہ مختلف وزارتوں اور ڈویژنز میں ماہرین اور پروفیشنلز تعینات کرنے کا منصوبہ ہے اور اب ان آسامیوں کی تخلیق وزارت خزانہ اور اسٹیبلشمنٹ ڈویژن کی مشاورت سے کی جائے گی جب کہ کنسلٹنٹس کی تعیناتیاں متعلقہ وزیر، وزیر مملکت یا مشیرکی منظوری سے ہوں گی۔

ذرائع کے مطابق ریسرچ ایسوسی ایٹس، ینگ پروفیشنلز کی تعیناتی متعلقہ سیکرٹری کی منظوری سے ہو گی تاہم ٹیکنیکل ایڈوائزرز کی تعیناتی کے لیے وزیراعظم کی منظوری ضروری ہو گی۔

ذرائع کا کہنا ہے کہ تعیناتیوں کا عمل مسابقتی عمل اور اسپیشل سلیکشن بورڈ کے ذریعے مکمل کیا جائے گا۔

پاکستان تحریک انصاف کی رہنما یاسمین راشد نے کہا ہے کہ الیکشن کمیشن اور بیورو کریسی شریفوں کی غلام بن کر رہ گئی ہے۔

اے آر وائی نیوز کے مطابق پی ٹی آئی رہنما یاسمین راشد نے لاہور کی انسداد دہشت گردی عدالت میں صحافیوں سے غیر رسمی گفتگو کرتے ہوئے کہا کہ ضمنی الیکشن میں دھاندلی نے ووٹ کو عزت دو کا نعرہ دفن کر دیا۔ الیکشن کمیشن اور بیورو کریسی شریفوں کی غلام بن کر رہ گئی ہے۔

پی ٹی آئی رہنما نے کہا کہ 8 فروری کو ظلم کے باوجود لوگوں نے نکل کر ووٹ دیا جس کے باعث ن لیگ کو اتحادیوں کے ساتھ مل کر حکومت بنانی پڑی۔

انہوں نے کہا کہ ضمنی الیکشن میں ن لیگ کو معلوم تھا کہ کیا ہونا ہے اس لیے ڈبے بھر دیے اور اب اتراتے پھرتے ہیں کہ ہم جیت گئے۔

یاسمین راشد نے کہا کہ کوئی شرم اور حیا ہوتی ہے، عوام کے ساتھ اور کتنی زیادتی کرنی ہے۔ انہوں نے مطالبہ کیا کہ چیف جسٹس ان واقعات پر نوٹس لے کر عوام کو مزید بربادی سے بچائیں۔

پاکستان تحریک انصاف کے مرکزی رہنما اور رکن قومی اسمبلی سردار لطیف کھوسہ نے کہا ہے کہ شریف برادران کا آپس میں جھگڑا چل رہا ہے۔

اے آر وائی نیوز کے مطابق پاکستان تحریک انصاف کے مرکزی رہنما اور رکن قومی اسمبلی سردار لطیف کھوسہ نے اسلام آباد میں میڈیا سے گفتگو کرتے ہوئے کہا ہے کہ شہباز شریف نے اپنے بڑے بھائی کو دھوکا دیا اور وزارت عظمیٰ چھین لی جس کے بعد دونوں بھائیوں کا آپس میں جھگڑا چل رہا ہے۔

لطیف کھوسہ نے کہا کہ ن لیگ میں رانا ثنا اللہ، خرم دستگیر، جاوید لطیف اور سعد رفیق الگ گروپ ہے جو شہباز شریف کو تسلیم نہیں کرتا اور کہتا ہے کہ نواز شریف ہوگا تو ہماری حکومت ہو گی۔

پی ٹی آئی رہنما نے کہا کہ شہباز شریف کسی اور کی گود میں بیٹھ کر حکومت کر رہے ہیں ان کا نہ وزیر خزانہ اپنا ہے اور نہ ہی وزیر داخلہ۔

انہوں نے یہ بھی کہا کہ نواز شریف یہاں کاروبار کرنے آئے تھے۔ انہوں نے پاکستان کو کاروبار کا حب بنایا ہوا ہے، یہاں سے فائدہ اٹھا کر واپس چلے جاتے ہیں۔

وزیراعظم شہباز شریف نے کہا ہے کہ پاکستان کا سب سے بڑا مسئلہ معاشی استحکام کا ہے ملکی ترقی کے لیے ناپسندیدہ فیصلے بھی کرنا پڑے تو کریں گے۔

وزیراعظم شہباز شریف نے اپنے دورہ کراچی کے موقع پر وزیراعلیٰ ہاؤس میں اعلیٰ سطح اجلاس سے خطاب کرتے ہوئے کہا ہے کہ پاکستان کا سب سے بڑا مسئلہ معاشی استحکام کا ہے۔ معاشی استحکام کیلیے وفاق اور صوبوں کو قریبی تعلق بنانا پڑے گا ملکی ترقی کے لیے ناپسندیدہ فیصلے بھی کرنا پڑے تو کریں گے۔

شہباز شریف نے کہا کہ سندھ اور پنجاب سمیت کسی بھی صوبے کی ترقی پاکستان کی ترقی ہے۔ ہمیں آپس میں ہم آہنگی اور یکسوئی کی ضرورت ہے۔ چاروں صوبوں کی ترقی کے لیے مواقع بروئے کار لائیں گے اور عوام کی ترقی اور خوشحالی کے لیے مل کر کام کریں گے۔

انہوں نے کہا کہ ایرانی صدر کل کراچی میں موجود تھے۔ امید کرتے ہیں آئندہ ہفتوں میں سرمایہ کاری کیلیے غیر ملکی وفد آئیں گے اور آنے والے مہینوں میں غیر ملکی سرمایہ بھی ملک میں آئے گا۔

شہباز شریف نے کہا کہ 8 فروری کے الیکشن کے نتیجے میں وفاق میں اسپلٹ مینڈیٹ ہے۔ مراد علی شاہ سے بھائیوں جیسا تعلق ہے۔ وفاقی وزرا سے گزارش کروں گا کہ سندھ سے قریبی تعلق رکھیں۔

اس موقع پر وزیراعلیٰ سندھ نے اپنی اور صوبائی کابینہ کی جانب سے شہباز شریف کو وزیراعلیٰ منتخب ہونے پر مبارکباد پیش کرتے ہوئے کہا کہ ہم نے پہلے 2022 میں مل کر سفر شروع کیا تھا۔ اچھی بات ہے کہ ہماری اور آپ کی طرف سے وہی لوگ چیزیں سنبھال رہے ہیں۔

مراد علی شاہ نے کہا کہ اس وقت سندھ کی نمائندگی بہت زیادہ ہے اور سندھ کے عوام کو آپ سےبہت امیدیں ہیں۔