ممبئی: 200 کروڑ منی لانڈرنگ کیس کے مرکزی ملزم سکیش چند شیکھر نے بالی وڈ کی معروف اداکارہ جیکلین فرنانڈیز کو دنیا کی خوبصورت ترین خاتون قرار دے دیا۔
میڈیا رپورٹس کے مطابق جیکلین فرنانڈیز کے عدالت سے رجوع کرنے کے باوجود سکیش چند شیکھر کی جانب سے انہیں خطوظ موصول ہونے کا سلسلہ تھم نہ سکا اور آج خواتین کے عالمی دن کے موقع پر ملزم نے اداکارہ کو خط بھیجا۔
خط میں سکیش چند شیکھر نے جیکلین فرنانڈیز کو انٹرنینشل وومن ڈے پر مبارکباد دی اور لکھا کہ یہ سال کا خاص دن ہے، سب کہتے ہیں دنیا مردوں کی ہے جس سے میں اتفاق کرتا ہوں لیکن ہر مضبوط اور کامیاب مرد کے پیچھے ایک عورت کا ہاتھ ہوتا ہے۔
متعلقہ: منی لانڈرنگ کیس میں جیکلین فرنانڈیز کیخلاف ثبوت سامنے آگئے، گرفتاری کا خدشہ
’میری کامیابی آپ ہو۔ آپ اس دن کو منانے والی خواتین کیلیے بڑی مثال ہیں۔ آپ اُن خواتین کیلیے متاثر کُن شخصیت ہیں جو معاشرے میں مشکلات سے لڑ رہی ہیں۔ میری جان آپ راک اسٹار اور سُپر اسٹار ہیں۔‘
منڈولی جیل میں قید سکیش چند شیکھر اس سے قبل بھی متعدد بار خط لکھ چکا ہے جس کے خلاف بالی وڈ اداکارہ نے عدالت سے رجوع کیا تھا اور ملزم کو ایسا کرنے سے روکنے کی استدعا کی تھی۔
جیکلین فرنانڈیز نے دہلی پولیس کمشنر سنجے اروڑا اور اسپیشل کمشنر آف پولیس (کرائم برانچ) کو ’استغاثہ کے گواہوں کے تحفظ میں نظام کی ناکامی‘ کے عنوان سے خط لکھ دیا تھا۔
خط میں بالی وڈ اداکارہ نے تحریر کیا تھا کہ میں ایک ذمہ دار شہری ہوں جسے ایک ایسے کیس میں پھنسایا گیا ہے جس کے قانون کی حکمرانی اور ہمارے عدالتی نظام کے تقدس پر دور رس اثرات مرتب ہوتے ہیں۔
انہوں نے لکھا تھا کہ سکیش چند شیکھر کے خلاف کیس میں استغاثہ کی گواہ ہوں، میں ذہنی دباؤ اور اپنے خلاف منظم مہم کی وجہ سے آپ کو خط لکھ رہی ہوں، سکیش نامی ایک شخص مجھے کھلے عام دھمکیاں دے کر خوفزدہ کر رہا ہے، میں مطالبہ کرتی ہوں قانون نافذ کرنے والے ادارے جلد از جلد معاملے میں مداخلت کریں کیونکہ اس سے میری جان کو شدید خطرہ لاحق ہے۔
’یہ حرکتیں صرف میرے انفرادی حقوق پر اثر انداز نہیں ہوتیں بلکہ یہ ہمارے نظامِ انصاف پر ہے۔ گواہوں کے تحفظ کے اصول سے سمجھوتہ کیا گیا جس سے قانونی اداروں کی ساکھ اور افادیت کو نقصان پہنچا۔ یہ ضروری ہے ملزمان کو دستیاب تمام مواصلاتی ذرائع کی چھان بین کی جائے اور سخت اقدامات کیے جائیں۔‘
