بھارت کی ریاست بہار کی مقامی عدالت نے بالی وڈ کی مشہور پروڈیوسر ایکتا کپور اور ان کی والدہ شوبھا کپور کے وارنٹ گرفتاری جاری کر دیے۔
میڈیا رپورٹس کے مطابق ایکتا کپور پر اپنی ویب سیریز ’ایکس ایکس ایکس‘ کے سیزن 2 میں فوجیوں کی توہین اور ان کے اہل خانہ کے جذبات کو ٹھیس پہنچانے کا الزام ہے۔
بیگوسرائے کی عدالت میں شمبھو کمار نامی سابق فوجی اہلکار نے درخواست جمع کروائی کہ ایکتا کپور نے سیریز میں ایک فوجی اہلکار کی بیوی سے متعلق قابلِ اعتراض مناظر دکھائے گئے، پروڈیوسر کی کمپنی ’ بالاجی‘ کے او ٹی ٹی پلیٹ فارم سے سیریز کو نشر کیا گیا، شوبھا کپور بھی اس کمپنی کا حصہ ہیں۔
درخواست گزار کے وکیل نے سماعت کے بعد میڈیا سے گفتگو میں بتایا کہ سیریز میں قابلِ اعتراض مناظر پر عدالت نے ایکتا کپور اور ان کی والدہ کو ذاتی حیثیت میں پیش ہو کر واضاحت دینے کا حکم دیا تھا، مگر انہوں نے اپنے وکیل کے ذریعے عدالت کو آگاہ کیا کہ سیریز سے قابلِ اعتراض مناظر حذف کر دیے گئے ہیں۔
وکیل نے بتایا کہ پیش نہ ہونے پر عدالت نے برہمی کا اظہار کیا اور دو کے وارنٹ گرفتاری جاری کر دیے۔