غلام علی آزاد بلگرامی کا نام ہندوستان کی ایک دینی ذوق و شوق کی حامل ایسی شخصیت کے طور پر لیا جاتا ہے جنھوں نے بڑا علمی و تحقیقی کام بھی کیا۔ انھیں شعر و ادب، تاریخ اور تذکرہ نگاری میں ان کی تصانیف کی وجہ سے شہرت اور بڑا مقام و مرتبہ نصیب ہوا۔

غلام علی آزاد بلگرامی نواب ناصر جنگ والیِ حیدر آباد دکن کے استاد تھے۔ وہ بلگرام سے اورنگ آباد آئے تھے جہاں ان کے علم و فضل کے سبب انھیں دربار میں جگہ ملی اور بڑی عزّت اور پذیرائی حاصل ہوئی۔ انھیں عربی، فارسی، اردو اور ہندی زبانوں پر عبور حاصل تھا۔

1704ء میں پیدا ہونے والے غلام علی آزاد کا تعلق بلگرام سے تھا اور اسی نسبت ان کے نام کے ساتھ بلگرامی لکھا جاتا ہے۔ 15 ستمبر کو اورنگ آباد میں قیام کے دوران ان کی زندگی کا سفر تمام ہوا۔ 1786ء میں اس دارِ فانی سے رخصت ہوجانے والے آزاد بلگرامی کو حسّانُ الہند بھی کہا جاتا ہے۔

حضرت غلام علی آزاد بلگرامی بیک وقت مختلف علوم و فنون میں طاق اور متعدد زبانوں پر کامل عبور رکھنے کے باعث اپنے ہم عصروں میں ممتاز رہے۔ انھیں نثر و نظم پر یکساں قدرت حاصل تھی۔ وہ تصنیف و تالیف اور شعر و شاعری تک ہی محدود نہ رہے بلکہ علمی میدان میں اپنے افکار و خیالات کے لازوال نقش چھوڑ گئے۔

ان کی نثری تالیف میں’’شمامہ العنبر فی ما ورد فی الہند من سید البشر‘‘ کے علاوہ سبحۃ المرجان جو دراصل علمائے ہند کا تذکرہ ہے، نہایت وقیع و مستند کتاب مانی گئی۔ اسی طرح یدِ بیضا کو بھی شہرت ملی، جو عام شعرا کے تذکرے سے سجائی گئی ہے۔ خزانۂ عامرہ بھی ان کی وہ یادگار ہے جس میں اُن شعرا کا تذکرہ ہے جو صلہ یافتہ تھے جب کہ سرورِ آزاد ہندی نژاد شعرا پر غلام علی آزاد بلگرامی کی ایک نہایت معلوماتی اور مفید کتاب ہے۔ مرحوم نے اپنی ایک اور تصنیف مآثر الکرام کی بدولت بڑی عزّت اور نام پایا جو دراصل علمائے بلگرام کے تذکرے پر مبنی ہے۔ اسی طرح روضۃُ الاولیا میں انھوں‌ نے عرق ریزی سے اپنی تحقیق کے بعد اولیائے اورنگ آباد پر مستند اور جامع معلومات فراہم کی ہیں۔

آزاد بلگرامی فنِ شعر گوئی اور تاریخ میں‌ یدِ طولیٰ رکھتے تھے۔ مشہور ہے کہ وہ نہایت حلیم الطبع، منکسرالمزاج اور متواضع تھے۔ حافظہ نہایت قوی تھا اور کوئی واقعہ، شعر وغیرہ ایک بار پڑھ لیتے یا کسی کی زبانی سنتے تو ذہن میں رہتا اور سہولت سے دہرا دیتے تھے۔

انسان حیوانِ‌ ناطق ہے جو اپنے احساسات اور جذبات کا اظہار دوسری مخلوقات کے مقابلے میں‌ زیادہ بہتر اور مؤثر انداز میں کرسکتا ہے، لیکن روئے زمین پر جو چرند پرند موجود ہیں وہ بھی جذبات اور احساسات سے عاری نہیں ہوتے۔ آج جدید دور میں‌ ہم اس حوالے سے کئی ویڈیوز بھی دیکھتے ہیں‌ مثلاً شیر کا ہرن کے بچّے کو شکار نہ کرنا اور اس کے ساتھ کھیلنا بلکہ حملہ کرنے والے دیگر درندوں سے اس کی حفاظت کرنا۔

یہاں ہم مشہور مؤرخ اور فلسفی ول ڈیورانٹ کی کتاب "نشاطِ فلسفہ” (The Pleasures of Philosophy) کے ایک باب سے اسی حوالے سے اقتباس پیش کررہے ہیں‌ جس کے مترجم ڈاکٹر نعیم احمد ہیں۔ ملاحظہ کیجیے۔

آئیے ہم حیوانوں کا مطالعہ کریں اور احساسِ حسن کے سرچشمہ تک پہنچیں۔

ہمارا یہ خیال غلط ہے کہ فقط انسان ہی کو جمالیاتی احساس ودیعت کیا گیا ہے۔ بہت سے حیوان اس بے پَر و بال دو پائے سے زیادہ حسین ہیں جو دنیا پر حکومت کرتا ہے اور غالباً وہ ہمیں حقارت کی نظر سے دیکھتے ہیں۔ ہم یہ سمجھتے ہیں کہ احساسِ حسن فقط ہم رکھتے ہیں کیونکہ ہم حسن کو نظر اور بینائی کے ساتھ وابستہ کرتے ہیں۔ حیوانوں میں جمالیاتی لرزش شامہ کے ذریعے پیدا ہوتی ہے۔

حیوانوں کی آنکھیں بھی حسن کی حساسیت رکھتی ہیں۔ ڈارون کہتا ہے کہ "کچھ پرندے اپنے گھونسلوں کو رنگین پتّوں اور گھونگھوں، پتھروں اور پروں اور کپڑے کے ان ٹکڑوں سے سجاتے ہیں جو انسانوں کے گھروں میں پائے جاتے ہیں۔ "مرغِ فردوس اپنے شریکِ زندگی کے لیے خاص گھونسلا بناتا ہے جو گھنی جھاڑی سے ڈھکا ہوتا ہے اور اس کے فرش پر گھاس پھونس چنی ہوتی ہے، وہ قریبی چشمہ سے سفید کنکر لا کر فن کارانہ طریق پر دو رویہ رکھتا ہے، وہ دیواروں کو چمک دار پروں، سرخ بیریوں اور دوسری خوب صورت چیزوں سے آراستہ کرتا ہے۔ آخر میں وہ دروازے کو دریائی صدفیوں اور درخشاں سنگریزوں سے ایک حسن و وقار بخشتا ہے۔ یہ وہ قصر ہے جو مرغِ فردوس اپنی محبوبہ کے لیے تیار کرتا ہے۔ بوش کہتا ہے، "صرف ایک مرتبہ محل کو دیکھنے سے یہ یقین ہوجاتا ہے کہ حسن و جمال سے لطف اندوز ہونا اس پرندے کی فطرت میں داخل ہے۔” کچھ پرندے اپنے آپ کو آئینہ میں دیکھتے ہیں۔ آئینہ کو سورج کی روشنی سے چمکائیے تو بتہ سے چکاوک جمع ہوجائیں گے۔ باوجود گولیوں کی بوچھاڑ کے یہ پرندے اندھی آرزو سے متوالے ہو کر اس کی جانب بڑھیں گے۔ مینا، پہاڑی کوا اور دوسرے پرندے، چمک دار اشیاء چاندی اور جواہرات چراتے ہیں۔ خود پسندی تجسّس یا ہوس۔ کون انہیں اس حرکت پر مجبور کرتے ہیں کوئی نہیں جانتا۔ لیکن مردہ چیزوں میں حسن دیکھنے کی صلاحیت صرف چند جانوروں میں پائی جاتی ہے۔ اور ان کا جمالیاتی شعور معمولی اور ثانوی ہوتا ہے۔

ڈارون کہتا ہے "اکثر حیوانوں میں احساسِ حسن صرف جنسِ مخالف کی کشش تک ہی محدود ہوتا ہے۔”

ہمارے مطالعہ کے لیے اس منکسرالمزاج سائنسدان کا یہ سادہ قول نہایت مفید ہے۔ اگر ڈارون صحیح کہتا ہے تو یہ بات ظاہر ہے کہ احساس حسن، جنسی کشش سے پیدا ہوتا ہے۔ حسین چیز وہ ہے جسے ہم جنسی طور پر پسند کریں اور اگر دوسری چیزیں ہمیں حسین معلوم ہوں تو وہ محض ثانوی طور پر اور جمالیاتی احساس کے اس سرچشمہ سے وابستگی کی بنا پر حسین معلوم ہوتی ہیں۔