کئی ایوارڈز اپنے نام کرنے والے منور رانا ہندوستان کے ایسے شاعر تھے جو بیرونِ ملک بھی اردو شاعری پڑھنے اور سمجھنے والوں میں مقبول تھے وہ ایک کام یاب شاعر تھے جنھیں خاص طور پر مشاعروں میں حاضرین دیر تک سننا پسند کرتے تھے۔ منور رانا کی مقبول ترین نظم ’ماں‘ اور ’مہاجر نامہ‘ ہیں۔

اردو کے معروف شاعر منور رانا کو 2014 میں ان کی نظم ’شہ دابا‘ پر ’ساہتیہ اکیڈمی ایوارڈ‘ دیا گیا تھا، لیکن بھارت میں عدم برداشت اور بڑھتی ہوئی ناانصافی پر احتجاجاً منور رانا نے یہ ایوارڈ واپس کر دیا تھا۔ ان کی اردو ادب کے لیے خدمات کے اعتراف میں 2012 میں ’ماٹی ایوارڈ‘ جب کہ وہ امیر خسرو ایوارڈ، میر تقی میر ایوارڈ، غالب ایوارڈ، ڈاکٹر ذاکر حسین ایوارڈ سمیت دیگر کئی ادبی ایوارڈ کے حق دار قرار پائے۔

منور رانا کو ہندوستان میں اردو زبان اور شعرو شاعری کے حوالے سے ان کے بعض بیانات کی وجہ سے تنقید کا بھی سامنا کرنا پڑا۔ وہ سمجھتے تھے کہ شاعرات کی اکثریت دوسروں سے کلام لکھواتی ہیں اور اس کا اظہار بھی کرتے تھے۔ منور رانا اس بات سے سخت نالاں تھے کہ موجودہ دور میں‌ مشاعروں کا انعقاد تجارتی سوچ کے ساتھ کیا جاتا ہے اور یہی وجہ ہے کہ پست اور غیرمعیاری شاعری عوام تک پہنچ رہی ہے۔ بھارت میں اردو زبان اور شاعری کے حوالے سے منور رانا کو ہر تقریب میں مدعو کیا جاتا تھا اور لوگ ان کا کلام بڑے ذوق و شوق سے سنتے تھے۔ منور رانا ایک اچھے نثر نگار بھی تھے۔ منور رانا کا پہلا شعری مجموعہ ‘آغاز’ 1971ء میں شائع ہوا۔ بعد کے برسوں میں سرحد، مہاجر نامہ، ماں، دیگر کئی شعری مجموعے شائع ہوئے۔ اُن کی نثر پر مشتمل کتاب ‘بغیر نقشے کا مکان’ بہت مقبول ہوئی۔ جنگلی پھول، سخن سرائے، چہرے یاد رہتے ہیں اور سفید جنگلی کبوتر بھی ان کی تصنیفات میں شامل ہیں۔

شاعر منور رانا کا اصل نام سید منور علی تھا۔ وہ 26 نومبر 1952ء کو اتر پردیش کے رائے بریلی میں پیدا ہوئے۔ ان کے والد کا نام سید انور علی اور والدہ کا نام عائشہ خاتون تھا۔ منور رانا نے اپنی ابتدائی تعلیم مکمل کی تو ان کو لکھنؤ بھیج دیا گیا جہاں سینٹ جانس ہائی اسکول میں مزید تعلیم پائی۔ والد کا تبادلہ ہوا تو 1968ء میں منور رانا کو بھی کلکتہ جانا پڑا اور وہاں سے ہائر سیکنڈری کی سند لی اور پھر گریجویشن کے لیے کلکتہ کا رخ کیا۔ منور رانا کے ادبی ذوق و شوق کا سبب ان کے ادب نواز دادا مرحوم سید صادق علی رہے اور بعد میں اسی شوق نے انھیں شاعر بنا دیا۔

زمانۂ طالب علمی سے ہی منور رانا کو فلم اور شاعری کا شوق رہا۔ انھیں فلمی اداکاروں کی آوازوں کی نقالی میں بھی مہارت حاصل ہوگئی تھی۔ خاص طور پر فلم اسٹار شتروگھن سنہا کی آواز کی نقالی پر حقیقت کا گمان ہونے لگتا تھا۔ منور رانا نے چند افسانے اور مختصر کہانیاں بھی لکھیں جو مقامی اخبارات میں شائع ہوئیں۔ اس کے علاوہ انھوں نے پرتھوی راج اور آغا حشر کاشمیری کے کئی ڈراموں میں اپنی اداکاری کے جوہر بھی دکھائے۔

اردو شاعری میں غزل کو وسیلۂ اظہار بنانے والے منور رانا نے ابتداً منور علی آتش کے قلمی نام سے شاعری شروع کی اور ان کی پہلی تخلیق 1972ء میں کلکتہ کے ایک معیاری رسالہ ماہنامہ ’’شہود‘‘ میں شائع ہوئی۔ بعد میں تخلص شاداں رکھ لیا اور 1977ء میں ایک مرتبہ منورؔ رانا بن گئے اور بے مثال شہرت پائی۔

منور رانا پچھلے سال 14 جنوری کو انتقال کرگئے تھے، انھیں لکھنؤ کے مقامی قبرستان میں سپردِ خاک کیا گیا۔ 71 سالہ منور رانا 2017ء سے گلے کے کینسر، دل اور گردے کے عوارض میں مبتلا تھے اور طبیعت خراب ہونے پر انھیں اسپتال منتقل کیا گیا تھا جہاں انھوں نے زندگی کی آخری سانسیں لیں۔ ان کا ایک شعر ہے:

جسم پر مٹی ملیں گے پاک ہو جائیں گے ہم
اے زمیں اک دن تری خوراک ہو جائیں گے ہم

روئے زمین پر موجود قدیم اور تاریخی عمارتوں کے کھنڈر، کسی قدر پختہ یا خستہ آثار اور مختلف مقامات جو کسی قدیم تہذیب اور ثقافت کی خبر دیتے ہوں بلاشبہ بنی نوع انسان کے لیے کسی خزانے سے کم نہیں۔ جدید دنیا اسے عالمی ورثہ تسلیم کرتی ہے۔ تاریخی حیثیت کی حامل ایسی کوئی جگہ اور مقام کسی ایک ملک، مذہب یا معاشرے کا نہیں ہوتا بلکہ اسے دنیا کا خزانہ سمجھا جاتا ہے۔

عالمی سطح پر قدیم ورثہ کی حفاظت، دیکھ بھال اور اس سے متعلق دریافت و تحقیق کے لیے باقاعدہ اور منظم کوششیں 20 ویں صدی کے وسط سے شروع ہوئیں۔ یونیسکو کے عالمی ثقافتی ورثہ کنونشن کے تحت بین الاقوامی سطح پر دنیا کے ممالک نے اتفاقِ رائے کیا اور 1972 میں ایک بین الاقوامی معاہدہ کیا گیا جس کے تحت عالمی ثقافتی ورثہ کی فہرست بنائی گئی اور پھر مختلف ممالک میں تہذیبی و ثقافتی ورثے کی حفاظت کے لیے مشترکہ کوششیں شروع کی گئیں۔

یونیسکو نے پاکستان میں بھی متعدد مقامات کو ان کی ثقافتی، تاریخی یا قدرتی اہمیت کے پیشِ نظر عالمی ورثہ تسلیم کیا ہے اور ان کی حفاظت و دیکھ بھال پر اس کے تحت خاص توجہ دی جاتی ہے۔ یونیسکو ان مقامات کے حوالے سے ضرورت کے مطابق مختلف منصوبے شروع کرتا ہے جس میں تعمیراتی کاموں سے لے کر لوگوں کو کسی مقام کی تاریخی اہمیت کے بارے میں آگاہی دینا بھی شامل ہے۔ یونیسکو کی وجہ سے دنیا بھر میں سیاح مختلف ممالک کے تاریخی مقامات کی جانب متوجہ ہوتے ہیں اور ان کو دیکھنے کے لیے آتے ہیں۔ یہ ادارہ بین الاقوامی ثقافتی تبادلے کو فروغ دینے کے ساتھ کسی عالمی ورثے کی حفاظت کے لیے بین الاقوامی تعاون کو بھی بڑھاتا ہے۔ 11 جنوری کو دنیا عالمی ورثے کا دن بھی مناتی ہے اور اس موقع پر عالمی ثقافتی ورثہ کی اہمیت کو اجاگر کرتے ہوئے ان کی حفاظت کو یقینی بنانے پر زور دیا جاتا ہے۔

اس حوالے سے عالمی ثقافتی ورثہ کمیٹی کی بنیاد رکھی گئی تھی جو دنیا کے مختلف ممالک میں اپنے اجلاس میں نئے ثقافتی مقامات کی فہرست جاری کرتا ہے۔ حال ہی میں یونیسکو کے عالمی ثقافتی ورثے کے تحت جو مقامات فہرست میں شامل کیے گئے ہیں، ان میں پہلا ثقافتی مقام سعودی عرب کا ہیماکا ثقافتی علاقہ ہے۔ یہاں چٹانوں پر ایسے نقش و نگار موجود ہیں جن کے بارے میں ماہرین نے اندازہ لگایا ہے کہ یہ 7 ہزار سال پہلے بنائے گئے تھے۔ یہ نقش و نگار حیوانات اور نباتات کے ہیں جب کہ بعض جگہ معاشرتی زندگی کی عکاسی کی گئی ہے۔

اس عالمی ورثہ فہرست میں دوسرا علاقہ یورپ کے عظیم سپا ٹاؤن کا ہے جو 11 قصبات پر مشتمل ہے۔ یہ قصبات سات یورپی ممالک میں شامل ہیں اور تمام قصبے قدرتی معدنی پانی کے چشموں کے قریب ہیں۔ اس حوالے سے سائنسی محققین نے کئی دل چسپ اور حیرت انگیز انکشافات بھی کیے ہیں۔

تیسرا مقام فرانس میں کورڈوئن کا لائٹ ہاؤس ہے جو بحر اوقیانوس کی پتھریلی سطح مرتفع پر واقع ہے۔ سولھویں اور سترھویں صدی کے اختتام پر سفید چونے کے پتھر سے بنے اس شاہکار کو انجینئر لوئس ڈی فوکس نے ڈیزائن کیا تھا اور اٹھارہویں صدی کے آخر میں انجینئر جوزف ٹولیئر نے اسے دوبارہ تیار کیا۔

عالمی ورثہ کی فہرست کا چوتھا مقام جرمنی کی ڈرمسٹیٹ آرٹسٹس کالونی ہے۔ اسے 1897ء میں ہیسے کے گرینڈ ڈیوک، ارنیسٹ لوڈویک نے تعمیراتی صنعت میں اصلاحات کی ابھرتی ہوئی تحریکوں کے مرکز کے طور پر قائم کیا تھا۔

پانچواں مقام اٹلی میں چودھویں صدی میں تعمیر ہونے والی پڈوا کی فریسکو سائیکلز(نقش و نگار) ہیں۔ یہ 8 مذہبی اور سیکولر عمارت کے کمپلیکس پر مشتمل ہے اور تاریخی دیواروں والے شہر پڈوا کے اندر واقع ہے۔ اس میں صدیوں پہلے فن کاروں کی جانب سے متنوع عمارتوں میں بنائے گئے فریسکو سائیکلز موجود ہیں۔ ماہرین کے مطابق یہ 1302ء سے 1397ء کے درمیان پینٹ کیے گئے تھے۔

اگر پاکستان کی بات کریں تو یہاں بھی اقوام متحدہ کے ثقافتی ادارے یونیسکو نے مختلف مقامات کو عالمی ورثہ قرار دے رکھا ہے۔ عالمی ورثے کی فہرست میں پاکستان کے چند مقامات تاریخی و سیاحتی اعتبار سے نہایت اہمیت کے حامل ہیں۔ ان میں سب سے پہلا نمبر موہن جو دڑو کا ہے جو پاکستان کے صوبۂ سندھ میں موجود ہے۔ یہ ساڑھے 6 ہزار سال قدیم تہذیب کے آثار ہیں جن کو 1921ء میں دریافت کیا گیا تھا۔ دوسرے نمبر پر صوبۂ پنجاب کا شہر ٹیکسلا ہے جو گندھارا تہذیب کے بھید کھولتا ہے۔ یہ بدھ مت اور ہندو مت کا مرکز سمجھا جاتا تھا۔ تخت بائی کے کھنڈرات جو پشاور سے تقریباً 80 کلو میٹر کے فاصلے پر ہیں، وہ بھی عالمی ورثہ ہیں اور بدھ تہذیب کی یاد دلاتے ہیں۔ مغل دور کی عمارتیں‌ اور باغات بھی اپنے طرزِ تعمیر کی وجہ سے منفرد اور تاریخی یادگار سمجھی جاتی ہیں اور شاہی قلعہ اور شالامار باغ پنجاب کے دارالحکومت لاہور میں واقع وہ مقامات ہیں جنھیں اس فہرست میں اہمیت دی گئی ہے۔ اس کے علاوہ مکلی کا قبرستان بھی قدیم اور انسان کے فن و ہنرمندی کا ایک نقش ہے۔ ٹھٹھہ کے قریب واقع یہ قبرستان دنیا بھر میں مشہور ہے۔ اس میں چودھویں صدی سے اٹھارہویں صدی تک کے مقبرے اور قبریں موجود ہیں۔ اسے یونیسکو نے 1981ء میں عالمی ثقافتی ورثہ قرار دیا تھا۔ ساتواں مقام پوٹھو ہار کے پتھریلے سطح مرتفع پر بنایا گیا قلعہ روہتاس ہے جو شیر شاہ سوری کے دور کی یادگار ہے۔ اس کی تعمیر میں ترک اور ہندوستانی فنِ تعمیر کا امتزاج نظر آتا ہے۔ یہ ایک چھوٹی پہاڑی پر عکسری نقطۂ نظر سے تعمیر کردہ قلعہ ہے۔