کراچی: شہر قائد کے علاقے لیاقت آباد میں ہونے والے ایک پراسرار قتل کے سلسلے میں ’آنٹی‘ نامی خاتون کی تلاش کی جا رہی ہے۔
تفصیلات کے مطابق کراچی کے علاقے لیاقت آباد نمبر 10 میں ایک گھر سے 50 سالہ خاتون کی تشدد زدہ لاش ملی ہے، ریسکیو ذرائع کا کہنا تھا کہ مقتولہ کی لاش اسپتال منتقل کی گئی ہے، اور اس کی شناخت رضیہ کے نام سے ہوئی ہے۔
ریسکیو ذرائع کے مطابق رضیہ نامی خاتون کو سر اور جسم پر وزنی چیز کے وار کر کے مارا گیا تھا۔
پولیس حکام نے ابتدائی تحقیقات کے بعد بتایا کہ مقتولہ رضیہ غیر شادی شدہ اور گھر کے گراؤنڈ فلور پر اکیلی رہتی تھی، ابتدائی معلومات کے مطابق اسی گھر میں پنجابی آنٹی کے نام سے ایک خاتون بھی رہتی تھی۔
پولیس حکام کے مطابق اس واقعے کے بعد سے ’آنٹی‘ غائب ہے، جس کے نام اور پتے کے بارے میں کسی کو معلوم نہیں۔ پولیس کا کہنا ہے کہ یہ جائیداد تنازعے کا کیس بھی ہو سکتا ہے۔
ابتدائی رپورٹ کے مطابق مقتولہ کو سر پر بلاک مار کر قتل کیا گیا تھا، جو کہ جائے وقوعہ سے پولیس کو مل گیا ہے، پولیس حکام نے بتایا کہ کرائم سین یونٹ نے موقع واردات پر پہنچ کر شواہد بھی جمع کر لیے ہیں۔
