کچھ انسان ایسی حیرت انگیز صلاحیتوں کے حامل ہوتے ہیں کہ دنیا انگشت بدنداں رہ جاتی ہے اسکاٹش خاتون کے بارے میں بھی جان کر لوگ ناقابل یقین حد تک حیران ہیں۔

خوف، درد اور بے چینی انسانی زندگی کی حقیقتوں میں سے ایک ہے جن سے کوئی بھی شخص زندگی کے کسی نہ کسی لمحے میں ضرور گزرتا ہے اور بعض اوقات یہ لمحات انتہائی تکلیف دہ ہوتے ہیں لیکن اسکاٹ لینڈ میں ایک ایسی بھی خاتون ہیں جو ان سے چیزوں سے دور زندگی گزار رہی ہیں۔

غیر ملکی میڈیا کے مطابق حیرت انگیز صلاحیتوں کی حامل یہ خاتون 74 سالہ کیمرون ہیں جو ایک منفرد جین کے ساتھ پیدا ہوئی ہیں جس کی وجہ سے وہ اپنی زندگی میں خوف اور بے چینی محسوس نہیں کرسکتی ہیں اس کا انتہائی ناقابل یقین پہلو یہ ہے کہ کیمرون کو جسم میں درد کا احساس بھی نہیں ہوتا ہے۔

خاتون کی اس حیرت انگیز خصوصیت نے عام انسانوں سمیت ڈاکٹروں اور سائنسدانوں کو بھی حیران کردیا۔ ڈاکٹرز کا کہنا ہے کہ کیمرون کو اگر کوئی بیماری لاحق ہو جائے تو عام لوگوں کے مقابلے میں زیادہ تیزی سے ٹھیک بھی ہو جاتی ہیں۔

رپورٹس کے مطابق خاتون کی اس منفرد خصوصیت کا انکشاف اس وقت ہوا جب ان کے 2 آپریشنز کے بعد ڈاکٹروں نے دیکھا کہ انہیں کوئی درد نہیں محسوس ہوا جو کہ آپریشن کے بعد یقینی چیز ہے اور خاتون کے ساتھ ایسا نہ ہونا ایک غیر معمولی ردعمل تھا۔

یہ صورتحال دیکھ کر جب ڈاکٹرز اور سائنسدانوں نے کیمرون کی حالت کا مطالعہ کرنا شروع کردیا ہے تا کہ معجزاتی درد ختم کرنے والی ادویات تیار کی جا سکیں جو اس وقت دستیاب ادویات سے زیادہ موثر طریقے سے کام کر سکیں۔

یہ کرہ ارض جس کو زمین کہا جاتا ہے اس پر لاکھوں مخلوقات بستی ہیں لیکن کیا آپ جانتے ہیں کہ ان میں سے سب سے مضبوط اور طاقتور مخلوق کون سی ہے؟

اس کائنات میں اب تک زمین واحد سیارہ ہے جہاں زندگی پائی جاتی ہے اور یہاں لاکھوں مخلوقات بستی ہیں جن میں انسان کے علاوہ جانور، چرند، پرند اور حشرات الارض کی لاکھوں اقسام ہیں ان میں بہت سے قوی الجثہ اور کئی معدوم بھی ہوچکے ہیں لیکن آج ہم آپ کو اس دنیا میں موجود سب سے مضبوط اور طاقتور ترین مخلوق کے بارے میں بتائیں گے۔

یہ طاقتور اور مضبوط ترین مخلوق نہ انسان ہے اور نہ ہی کوئی قوی الجثہ یا خونخوار جانور اور نہ زمین پر رینگنے والے زہریلے حشرات الارض تو پھر کون ہے جو سب سے زیادہ طاقتور اور مضبوط ہے تو حیران نہ ہوں وہ ایک چھوٹا سا مکوڑا ہے جس کو اوریبٹیڈ یا آرمورڈ مائیٹ نام دیا گیا ہے۔

اس کیڑے کا جسامت تو لگ بھگ ایک ملی میٹر ہے لیکن اس کو اس لیے دنیا کا سب سے مضبوط اور طاقتور ترین جانور مانا جاتا ہے کہ یہ اپنے وزن سے ایک ہزار گنا زیادہ وزن اٹھانے کی صلاحیت رکھتا ہے۔

ماہرین کے مطابق اوریبٹیڈ یا آرمورڈ مائیٹ کے انتہائی طاقتور اور مضبوط ہونے کی وجہ اس کے جسم کا بیرونی سخت اور مضبوط حصہ ہے جس کی بناوٹ ایسی ہے کہ یہ انتہائی سخت جان ہے اور اپنے سے 1180 گنا زیادہ وزن اٹھا سکتا ہے۔

واضح رہے کہ براعظم ایشیا میں پائی جانے والی چیونٹیاں اپنے جسمانی وزن نے 100 گنا زیادہ وزن اٹھانے کی صلاحیت رکھتی ہیں جب کہ گوبر میں پایا جانے والا ایک کیڑا اپنے سے 400 گنا زیادہ وزن اٹھا سکتا ہے لیکن اورینٹیڈ مائیٹ سے ان کا کوئی مقابلہ نہیں ہے۔