سوڈان میں فورسز کے درمیان مسلح جھڑپوں کے بعد پیدا ہونے والی صورتحال پر پاکستان کا ردعمل آگیا۔
ترجمان دفتر خارجہ کی جانب سے جاری بیان میں کہا گیا ہے کہ ہم سوڈان میں سیکیورٹی کی صورتحال پر گہری نظر رکھے ہوئے ہیں خرطوم میں ایک ہزار کے قریب پاکستانی ہیں پاکستانیوں کی حفاظت کویقینی بنانے کے لیے ہمارا مشن ان کے ساتھ رابطےمیں ہے۔
سوڈان کا دارلحکومت خرطوم فائرنگ اور دھماکوں سے گونج اٹھا ہے۔ مسلح افواج اور ریپڈ سپورٹ پیرا ملٹری فورسز کے درمیان کشیدگی عروج پر پہنچ گئی ہے۔
صدارتی محل، ایئرپورٹ اور شہر کے مرکزی علاقوں میں فائرنگ کا تبادلہ ہوا ہے۔ ریپڈ سپورٹ فورس نے الزام عائد کیا کہ آرمی نے پیراملٹری فورسز کے کیمپ پر حملہ کیا جس کے بعد انہوں نے ائیرپورٹ کا کنٹرول حاصل کر لیا۔
خرطوم ائیرپورٹ پر فلائٹ آپریشن معطل کر دیا گیا ہے۔ پیرا ملٹری فورسز نے صدارتی محل کا کنٹرول حاصل کرنے کا بھی دعوی کیا ہے۔
امریکا اور بھارت نے سوڈان میں اپنے شہریوں کو گھر میں رہنے کی ہدایت جاری کردیں۔
