اسلام آباد : پاکستان ڈیموکرٹک موومنٹ (پی ڈی ایم) نے پیپلزپارٹی لانگ مارچ کی حمایت کا فیصلہ کرلیا، پی پی 27 فروری کو مزار قائد سے لانگ مارچ شروع کرے گی۔
تفصیلات کے مطابق پاکستان ڈیموکرٹک موومنٹ (پی ڈی ایم) نے پیپلزپارٹی لانگ مارچ کی حمایت کا فیصلہ کرلیا، جس کے تحت ن لیگ پنجاب اور جے یو آئی خیبرپختونخوا میں لانگ مارچ کا استقبال کرے گی۔
پی ڈی ایم میں شامل جماعتوں کے کارکن ہر شہر میں لانگ مارچ کا استقبال کریں گے۔
گذشتہ روز سابق صدر آصف زرداری اور سربراہ پی ڈی ایم مولانا فضل الرحمان کے درمیان ملاقات کی کہانی سامنے آئی تھی ، ذرائع کا کہنا تھا کہ فضل الرحمان نے پی پی کو 27فروری کا لانگ مارچ ملتوی کرنے کا مشورہ دیا۔
ولانا فضل الرحمان نے کہا 2الگ الگ لانگ مارچ سےاپوزیشن کی تقسیم کا تاثر ملتا ہے اور تجویز دی کہ پیپلز پارٹی اپوزیشن کیساتھ لانگ مارچ میں شریک ہو، پہلے عمران خان کیخلاف تحریک عدم اعتماد لانی چاہیے۔
ذرائع کے مطابق آصف زرداری نے تجویز دی کہ پہلے وزیراعلیٰ پنجاب کیخلاف عدم اعتماد لانی چاہیے تاہم عدم اعتماد پہلے کہاں لائی جائے ، اس معاملے پر مولانا اور آصف زرداری میں اتفاق نہ ہوسکا۔
ذرائع نے بتایا تھا کہ عدم اعتماد کے معاملے پر آصف زرداری آج شہباز شریف سےمشاورت کریں گے جبکہ ن لیگ کی اتحادیوں کے بجائے ناراض ارکان کو ملانے کی تجویز پر بھی غور کیا جائے گا۔
ذرائع کا کہنا تھا کہ لیگی رہنماؤں کےمطابق20سے22ناراض حکومتی ارکان نےحمایت کایقین دلایا، ناراض ارکان کی حمایت کے بعد اپوزیشن کو اتحادیوں کو توڑنے کی ضرورت نہیں ہوگی۔
مولانا اور زرداری نے رائے دی تھی کہ ناراض ارکان کی حمایت سےعدم اعتماد متنازع ہوسکتی ہے، عدم اعتماد کیلئےاتحادیوں کوساتھ ملانا چاہیے۔
ذرائع کے مطابق ملاقات میں مولانا اور زرداری نے حکومتی اتحادیوں سے بھی رابطے جاری رکھنے سمیت عدم اعتماد ،لانگ مارچ پر مشاورت جاری رکھنے پر اتفاق کیا۔
خیال رہے پیپلزپارٹی ستائیس فروری کومزار قائد کراچی سے لانگ مارچ شروع کرے گی اور سکھر پہنچ کر رات کو قیام ہوگا۔
ذرائع نے بتایا تھا کہ سکھر میں پیپلز پارٹی رہنما خورشید شاہ لانگ مارچ کی میزبانی کریں گے ، سکھر میں بڑے جلسے کا اہتمام کیا گیا ہے ، جس سے بلاول بھٹو زرداری خطاب کریں گے۔
