اسلام آباد : مسلم لیگ ن108 ارکان کے ساتھ قومی اسمبلی کی بڑی جماعت بن گئی، ن لیگ کی پچھترجنرل نشستیں اور نو آزاد امیدواروں کی شمولیت کے بعد تعداد 84 ہوگئیں۔
تفصیلات کے مطابق الیکشن کمیشن نےقومی اسمبلی میں سیاسی جماعتوں کے اعداد وشمار جاری کردئیے، خواتین و اقلیتوں کی نشستوں کی تقسیم کے بعد مسلم لیگ ن ایک سوآٹھ ارکان کے ساتھ ایوان کی سب سے بڑی جماعت بن گئی۔
الیکشن کمیشن کا کہنا ہے کہ ن لیگ کی پچھترجنرل نشستیں،نوآزاد امیدواروں کی شمولیت کے بعد تعدادچوراسی ہوگئیں جبکہ اقلیتوں کی چاراورخواتین کی بیس نشستوں کے ساتھ مسلم لیگ ن کے ارکان کی تعدادایک سو آٹھ ہوگئی۔
الیکشن کمیشن نے بتایا کہ پیپلزپارٹی کے 54 امیدوار جنرل نشستوں پر کامیاب ہوئے تاہم پیپلزپارٹی میں کسی آزادامیدوار نےشمولیت اختیارنہیں کی ، پیپلزپارٹی کو اقلیتوں کی 2 نشست اورخواتین کی 12 نشستیں ملیں ، جس کے بعد قومی اسمبلی میں پپیلزپارٹی کی مجموعی تعداد 68 ہوگئی
عدادوشمار کے مطابق جنرل نشستوں پر قومی اسمبلی میں ننانوے آزاد ارکان کامیاب ہوئے، جن میں سےاکیاسی سنی اتحادکونسل میں شامل ہوئے تاہم سنی اتحادکونسل کی مخصوص نشستوں کامعاملہ الیکشن کمیشن میں زیرالتوا ہے۔
اسی طرح ایم کیوایم پاکستان کو اقلیت کی ایک اور خواتین کی چارنشستیں ملیں، جس کہ بعدایم کیوایم پاکستان کےارکان کی قومی اسمبلی میں تعدادبائیس ہوگئی۔
الیکشن کمیشن کا کہنا تھا کہ جمعیت علمائے اسلام کےچھ ارکان جنرل نشستوں پرکامیاب ہوئے اور دوخواتین کی مخصوص نشستوں کیساتھ جےیوآئی ارکان کی تعداد آٹھ ہوگئی جبکہ ق لیگ کے تین ممبران کامیاب ہوئے، ایک آزادرکن کی شمولیت اور خواتین کی ایک مخصوص نشست ملنے پر ق لیگ کے ارکان کی تعداد پانچ ہوگئی۔
استحکام پاکستان پارٹی کے تین، مجلس وحدت مسلمین کا ایک، مسلم لیگ ضیاء،پشتونخواملی عوامی پارٹی، بی اے پی،بی این پی،نیشنل پارٹی کا بھی ایک،ایک رکن کامیاب ہوا تاہم قومی اسمبلی کی تین نشستوں پرالیکشن زیرالتواہے۔
