کراچی: لیاری میں 6 منزلہ عمارت خالی کرانے کے لیے آپریشن میں رہائشیوں کے شدید احتجاج کے بعد پولیس نے آپریشن روک دیا اور ایس بی سی اے اور ضلع انتظامیہ واپس چلی گئی۔
تفصیلات کے مطابق سندھ ہائیکورٹ کے حکم پرلیاری میں 6منزلہ عمارت توڑنے کے معاملے پر ایس بی سی اے ، ضلع انتظامیہ پولیس کی بھاری نفری کے ہمراہ پہنچے.
ضلع انتظامیہ نے بتایا کہ لیاری کھڈا مارکیٹ میں غیر قانونی6منزلہ عمارت کوآج خالی کرایا جائے گا، کارروائی کے دوران عمارت خالی کرانے میں پولیس اور ایس بی سی اے کو مزاحمت کا سامنا رہا، عمارت میں رہائش پذیر خواتین اور پولیس آمنے سامنے آگئے۔
پولیس اہلکار عمارت کا دروازہ کھولنے کی کوشش کرتے رہے جبکہ مکین دروازے بند کرنے کیلئےزورآزمائی کرتے رہے، اہلخانہ نے دوٹوک مؤقف اختیار کیاکہ کچھ بھی ہوجائے گھر خالی نہیں کریں گے، بڑی مشکل سے جمع پونجی جوڑ کر یہ فلیٹ خریدا ہے۔
ضلع انتظامیہ کے مطابق غیرقانونی چھ منزلہ عمارت میں اٹھارہ فلیٹ اوراٹھارہ خاندان رہائش پذیرہیں، ایس بی سی اے حکام نے بتایاکہ سات روز پہلے رہائشیوں کو عمارت خالی کرنے کیلئے نوٹسز جاری کئے تھے۔۔
پولیس نے مزاحمت کرنےوالے تین افراد کو حراست میں لے لیا ، جس کے بعد ایس بی سی کی ڈیمولش ٹیم نے ہتھوڑے سے گیٹ توڑنے کی ایک بار پھر کوشش کی تاہم رہائشیوں کے شدید احتجاج کے بعد پولیس نےآپریشن روک دیا اور ایس بی سی اے، ضلع انتظامیہ اور پولیس واپس چلی گئی۔
