لاہور : پاکستان تحریک انصاف نے صدر مملکت ڈاکٹر عارف علوی کیخلاف نفرت انگیز حکومتی پروپیگنڈہ انہیں جھکانے اور زمینی حقائق دھندلانے کی کوشش قرار دیا ہے۔
تفصیلات کے مطابق پاکستان تحریک انصاف کی کور کمیٹی کا اجلاس ہوا جس میں ملک کی موجوہ سیاسی صورتحال پرغور وخوص کیا گیا۔
اجلاس میں آرمی ایکٹ، آفیشل سیکرٹ ایکٹ ترامیم کے مسودہ جات پر صدر مملکت کے ٹوئٹ کے بعد پیدا ہونے والی صورتحال کا تفصیلی جائزہ لیا گیا۔
پی ٹی آئی کی کور کمیٹی نے صدر کیخلاف نفرت انگیز حکومتی پروپیگنڈہ انہیں جھکانے اور حقائق دھندلانے کی کوشش قرار دے دیا۔
کورکمیٹی اراکین کا کہنا ہے کہ صدر کے غیر معمولی ٹوئٹ کے بعد پوری قوم شدید اضطراب میں مبتلاہے، واقعے کے اصل حقائق کا تعین کرنا اور سربراہ ریاست کے منصب کو نیچا دکھانے والوں کا محاسبہ کیا جانا اہم ہے۔
اراکین نے کہا کہ دھونس اور جبر کی بنیاد پر کسی کو معاملہ الجھانے یا ذمہ داروں کو بچانے کی اجازت نہیں دیں گے، عدالت عظمیٰ آئین و ریاست کے وسیع تر مفاد میں غیرمعمولی معاملے کو بلاتاخیر اٹھائے۔
اجلاس میں کور کمیٹی نے بٹگرام حادثے کا شکار ہونے والی چیئر لفٹ اور جاری ریسکیو آپریشن پر غور کرتے ہوئے چیئر لفٹ میں پھنسے نونہالوں، ٹیچرز کی مکمل سلامتی اور بحفاظت ریسکیو کیلئے خصوصی دعا کی۔
واضح رہے کہ گذشتہ روز صدر مملکت ڈاکٹر عارف علوی نے آفیشل سیکرٹ اور آرمی ایکٹ ترمیمی بلوں پر دستخط کی تردید کرتے ہوئے ٹویٹ میں لکھا تھا کہ قوانین سے متفق نہیں تھا، عملے کو ہدایت دی کہ دونوں بلوں کو بغیر دستخط واپس بھجوا دیں، اب پتا چلا میرا عملہ میری مرضی اور حکم کے خلاف گیا، ان سے معافی مانگتا ہوں جو اس قانون سے متاثر ہوں گے۔
