پاکستان تحریک انصاف نے انتخابی مہم کے سلسلے میں آج عمران خان کی زیر قیادت نکالی جانے والی ریلی کو کل تک ملتوی کرنے کا اعلان کر دیا ہے۔
اے آر وائی نیوز کے مطابق پاکستان تحریک انصاف کی ریلی روکنے کے لیے پنجاب حکومت کی جانب سے دفعہ 144 کے نفاذ اور راستے بند کیے جانے کے بعد کسی بھی ناخوشگوار صورتحال سے بچنے کے لیے آج اعلان کردہ ریلی کل تک منسوخ کرنے کا اعلان کیا ہے۔
یہ اعلان چیئرمین پی ٹی آئی عمران خان نے سماجی رابطوں کی ویب سائٹ ٹویٹر پر اپنے ٹویٹ میں کیا۔
It seems again Sec 144 has been imposed illegally solely on PTI election campaign as all other public activities are ongoing in Lahore. Only Zaman Park has been surrounded by containers & heavy police contingent. Clearly, like 8 March, Punjab CM & police want to provoke clashes
— Imran Khan (@ImranKhanPTI) March 12, 2023
عمران خان نے اپنے ٹویٹ میں لکھا کہ میں کل تک ریلی ملتوی کرنے کا اعلان کرتا ہوں اور تمام کارکنوں سے درخواست کرتا ہوں کہ وہ اس جال میں نہ پھنسیں۔
دوسری جانب حماد اظہر نے نیوز کانفرنس کرتے ہوئے کہا کہ آج ریلی ملتوی کردی گئی ہے۔ ہم نے خون خرابے سے بچنے کے لیے ریلی ملتوی کی ہے۔ ریلی ملتوی کر دی ہے اس لیے لاہور کے تمام راستے کھول دیے جائیں جب کہ کارکنوں کو بھی کہوں گا کہ وہ پر امن رہیں اور مشتعل نہ ہوں۔
پی ٹی آئی رہنما نے مزید کہا کہ ہم پر امن حالات میں الیکشن چاہتے ہیں جب کہ یہ لوگ چاہتے ہیں کہ تصادم ہو اور الیکشن ملتوی کردیے جائیں۔ یہ عمران خان کی مقبولیت سے گھبرا رہے ہیں۔ ریاستی جبر کے خلاف قانونی راستہ اپنایا ہوا ہے۔ کارکن اس وقت تک انتظار کریں اور کوئی بھی قانون کو اپنے ہاتھ میں نہ لے۔ ہم لاہور ہائیکورٹ میں پٹیشن دائر کر رہے ہیں۔
