پاکستان تحریک انصاف نے وزیر اعلیٰ گلگت بلتستان خالد خورشید کے خلاف تحریک عدم اعتماد اور ان کی نااہلی کا مقابلہ کرنے کا فیصلہ کرلیا۔
گلگت بلتستان میں پی ٹی آئی کی پارلیمانی پارٹی کا اہم ترین اجلاس طلب کرلیا گیا۔ پارٹی ترجمان نے بتایا کہ ہمیں گلگت بلتستان اسمبلی میں واضح اکثریت حاصل ہے۔
ترجمان نے کہا کہ گلگت بلتستان کے عوام کے مینڈیٹ کی توہین پر بھرپور مزاحمت کی جائے گی، پاکستان میں آئین اور جمہوریت کا قتل عام جاری ہے۔
قبل ازیں خالد خورشید کو چیف کورٹ گلگت بلتستان نے فریقین کے وکلا کے دلائل مکمل ہونے کے بعد جعلی ڈگری رکھنے پر نااہل کر دیا۔
خالد خورشید کے خلاف رکن گلگت بلتستان اسمبلی غلام شہزاد آغا نے کیس دائر کر رکھا تھا جس کی سماعت چیف کورٹ کے تین ججز پر مشتمل بینچ نے روزانہ کی بنیاد پر سماعت کی اور آج ان کو نا اہل قرار دیے جانے کا فیصلہ سنایا۔
اس موقع پر چیف کورٹ کے اطراف میں سکیورٹی کے سخت انتظامات کیے گئے تھے۔
