کراچی: پاکستان تحریک انصاف نے 25 دسمبر کو مزار قائد پر جلسہ کرنے کا اعلان کردیا، عمران خان کا کہنا ہے کہ زرداری اور فضل الرحمن کا تعاقب کریں گے۔
تفصیلات کے مطابق پاکستان تحریک انصاف کی جانب سے سندھ میں قدم جمانے کے لیے کوششیں جاری ہیں، عمران خان مسلسل سندھ کے دورے کررے ہیں اور اب انہوں نے کراچی میں جلسے کا بھی اعلان کردیا ہے۔
اس بات کا اعلان خود پارٹی چیئرمین عمران خان نے کراچی کے دورے کے دوران خیبرچوک بلدیہ ٹاؤن کے علاقے میں ارکان کی مہم سازی کے دوران شرکا سے خطاب کرتے ہوئے کیا۔
زرداری اور فضل الرحمان کا تعاقب کریں گے، عمران خان
عمران خان کا کہنا تھا کہ کراچی میں جلسہ کریں گے، آج سے کراچی میں انتخابی مہم شروع کردی،سندھ میں کرپشن کے خلاف کام شروع کردیا ہے، آصف علی زرداری اور فضل الرحمان کا تعاقب کریں گے۔
چیئرمین تحریک انصاف نے مزید کہا کہ شہری جلد از جلد تحریک انصاف کی رکنیت حاصل کریں، قومی شناختی کارڈ کے تمام مسائل حل کریں گے۔
تحریک انصاف کے مطابق 25 دسمبر کو مزار قائد پر جلسہ کیا جائے گا جس سے پارٹی قائد عمران خان اور دیگر رہنما خطاب کریں گے۔
خیال رہے کہ عمران خان اپنی تقاریر میں متعدد بار اعلان کرچکے ہیں کہ نواز شریف کو گھر بھیج دیا اب آصف زرداری کا احتساب کریں گے۔
اس اعلان کے ساتھ ہی انہوں نے سندھ کی سیاست میں عملی طور پر حصہ لینا شروع کردیا ہے، وہ حیدرآباد اور سکھر میں جلسے کرچکے ہیں، شاہ محمود قریشی بھی کندھ کوٹ میں جلسہ کرچکے۔
یہ بھی پڑھیں: بکتر بند میں بیٹھ کرکاروبار نہیں ہوسکتا: عمران خان
دریں اثنا آج عمران خان کراچی میں موجود ہیں انہوں نےسائٹ ایسوسی ایشن کی دعوت پر ان کے دفتر کا بھی دورہ کیا۔
