لاہور : تحریک انصاف نے انتخابات کیلئے پارٹی بیانیے کی تیاریاں شروع کردیں، پارٹی بیانیے کے لیے میڈیا اسٹریٹجک کمیٹی اور اہم رہنماؤں کی جانب سے تجاویز دینے کا سلسلہ جاری ہے۔
تفصیلات کے مطابق پاکستان تحریک انصاف نے آئندہ عام انتخابات کی تیاریوں کے معاملے پر پارٹی بیانیے کی تیاریاں شروع کردیں۔
میڈیا اسٹریٹجک کمیٹی اور اہم رہنماؤں کی جانب سے تجاویز دینے کا سلسلہ جاری ہے ، مجوزہ بیانیے میں بدعنوانی اور تباہ حال معیشت کو ترجیح دینے کی تجویز دی ہے۔
مجوزہ بیانیے میں پی ڈی ایم حکومت کی نیب اورانتخابی ترامیم کو بیانیے میں رکھا جائے اور کرپشن، ہوشربا مہنگائی اور انسانی حقوق کی خلاف ورزیوں کو بیانیے میں شامل کیا جائے۔
میڈیا اسٹریٹجک کمیٹی اور اہم رہنماؤں نے تجویز دی ہے کہ ناکام معاشی پالیسیوں، بڑھتے ہوئے یوٹیلیٹی بلز کو بھی بیانیے کا حصہ بنایا جائے اور الیکشن کمیشن کے جانبدار سمیت عمران خان پر حملے کا معاملہ ، اجتماعات میں اجاگر کیا جائے۔
پارٹی بیانیے میں پی ٹی آئی دورکی کامیاب معاشی پالیسیوں کو حصہ بنایا جائے، شریف فیملی، زرداری اور فضل الرحمان کی کرپشن کو بھی اجاگر کیا جائے گا، اس کے علاوہ ن لیگ اور پی پی رہنماؤں کو کرپشن کیسز میں ریلیف کو بھی بیانیے کا حصہ بنایا جائے۔
ذرائع نے کہا ہے کہ عمران خان تجاویز پر مشاورت کے بعد عام انتخابات سے قبل حتمی منظوری دیں گے۔
