اسلام آباد : وفاقی وزیر داخلہ راناثنااللہ کا کہنا ہے کہ عمران خان کیا کرنا چاہتے ہیں معلوم نہیں، دیکھتے ہیں پیش ہوتے ہیں یا نہیں۔
تفصیلات کے مطابق وفاقی وزیر داخلہ راناثنااللہ نے اے آر وائی نیوز سے گفتگو کرتے ہوئے کہا کہ عمران خان کو عدالت میں ساڑھے 3 بجے پیش ہونا تھا ابھی تک پیش نہیں ہوئے،عمران خان کیا کرنا چاہتے ہیں معلوم نہیں، دیکھتے ہیں پیش ہوتے ہیں یا نہیں۔
راناثنااللہ کا کہنا تھا کہ عمران خان کیساتھ آزاد کشمیر اور گلگت بلتستان کے وزیراعلیٰ کا اسکواڈ بھی موجود ہے، زمان پارک سے جس طرح اسلحہ ملا، پیٹرول بم رکھے گئے تھے تشویشناک ہے۔
وفاقی وزیر داخلہ نے کہا کہ تشویشناک عمل ہےعمران خان سیاست کی آڑ میں تشدد گروہ تیارکررہاہے، عمران خان کاشایدیہ ہی ایجنڈاہےکہ وہ ملک میں انارکی چاہتےہیں۔
ان کا مزید کہنا تھا کہ پاکستان بالکل اس قسم کی صورتحال کامتحمل نہیں،پاکستان کی ساری مشکلات کاذمہ دارایک ہی شخص ہےجوانارکی پھیلانا چاہتا ہے۔
راناثنااللہ نے مزید کہا کہ عدالتیں گرفتار کرنے کی اجازت دیں گی تو ہی عمران خان کو گرفتار کریں گے، ابھی تو ضمانت پہلے ہو جاتی ہیں ایف آئی آر بعد میں کٹتی ہے۔
وزیر داخلہ نے واضح کیا کہ شرپسندعناصرکیخلاف کارروائی قانون کےمطابق ہی ہوگی۔
