ممبئی: بالی ووڈ کے آنجہانی اداکار سشانت سنگھ راجپوت کی گرل فرینڈ ریا چکرورتی نے جیل میں گزارے وقت سے متعلق تفصیلات بتادیں۔
بھارتی میڈیا رپورٹس کے مطابق اداکارہ ریا چکرورتی نے سشانت سنگھ راجپوت کی موت کے بعد بائیکلہ جیل میں 28 دن گزارے، ان پر سشانت کے لیے منشیات منگوانے کا الزام تھا اور بعد میں انہیں ضمانت پر رہا کردیا گیا۔
حالیہ انٹرویو میں ریا چکرورتی نے جیل میں گزارے وقت سے متعلق بتایا کہ جیل میں گزارا گیا وقت مشکل ترین تھا جس کا وہ تذکرہ بھی نہیں کرنا چاہتیں کیونکہ ان کی گرفتاری کووڈ 19 کے دنوں میں ہوئی تھی اس لیے 14 دن تک بالکل تنہا ایک کمرے میں تھیں۔
انہوں نے بتایا کہ جو کھانے کے لیے دیا جاتا تھا وہ کھانا پڑتا تھا مجھ سے پوچھا جاتا کہ بھوک لگی ہے تو کھانا کھاؤ اور کھانے میں سوکھی روٹی، پانی میں بھیگی شملہ مرچیں ہوتیں تھیں۔
اداکارہ نے کہا کہ میں دوسرے قیدیوں کو دیکھتی تو میرے اندر احساس شکر پیدا ہوتا کیونکہ ان کے پاس کوئی فیملی سپورٹ نہیں تھی، ان کے پاس ضمانت کے لیے پانچ یا دس ہزار روپے نہیں ہوتے تھے، میں سوچتی کہ میرے پاس فیملی اور دوست تو ہیں۔
ریا چکرورتی کا مزید کہنا تھا کہ جیل میں ناشتہ صبح 6 بجے اور رات کا کھانا 2 بجے دوپہر کو دیا جاتا ہے۔ کھانے کے لیے اپنا معمول تبدیل کرنا پڑا۔ جیل میں گزارا ہوا وقت جسمانی مشقت سے زیادہ ذہنی اذیت اور تکلیف کا باعث ہوتا ہے۔
واضح رہے کہ جون 2020 کو اپنے گھر میں مبینہ طور پر خود کشی کرنے والے بالی ووڈ کے نوجوان اداکار سشانت سنگھ راجپوت کی گرل فرینڈ ریا چکرورتی کو اداکار کے قتل کی تحقیقات کے دوران سشانت سنگھ کو منشیات فراہم اوراستعمال کرنے کے الزام میں انسداد منشیات بیورو نے ستمبر2020 گرفتار کیا تھا اور انہیں 28 دن بعد ضمانت پر رہا کیا گیا تھا۔
