کراچی : صوبائی وزیر اطلاعات شرجیل میمن نے کہا ہے کہ کراچی سندھ ہے اور کراچی سندھ رہے گا، کسی کے باپ میں دم نہیں کہ ہمیں یہاں رہنے سے روکے۔
سندھ اسمبلی کے اجلاس میں اظہار خیال کرتے ہوئے انہوں نے کہا کہ ان کا کہنا تھا کہ اگر اس ایوان میں تعصب سے بھری گفتگو ہوگی تو جواب دینا بنتا ہے، جس نے کراچی کو سندھ سے الگ کرنے کا خواب دیکھا اور کوشش کی وہ لندن میں لاک ہوگیا۔
انہوں نے کہا کہ اگر کسی کی جماعت میں کوئی ایشوز ہیں تو اس پر ہم کیا کرسکتے ہیں، پیپلزپارٹی کی لیڈر شپ کی ہدایت ہے کہ سب کو ساتھ لے کر چلیں۔
شرجیل میمن کا کہنا تھا کہ کس نے کہا تھا کہ ایم کیوایم بلدیاتی انتخابات کا بائیکاٹ کرے؟ ایم کیوایم نے بائیکاٹ اپنی مرضی سے کیا، اب مینڈیٹ کی بات کررہے ہو۔
کراچی میں امن و امان کی صورتحال پربات کی گئی، میں مانتا ہوں کراچی میں اسٹریٹ کرائم ہے لیکن اب کراچی میں بوری بند لاشیں نہیں ملتیں، گاڑیاں نہیں جلتیں، یہاں اب دہشت گردی نہیں ہوتی، بھتہ نہیں لیا جاتا۔ جاوید حنیف اپنی جماعت کا نزلہ اسمبلی میں نہ گرائیں، ہمارا کام ہے کراچی کے لوگوں کے لئے خدمت کرنا۔
انہوں نے کہا کہ کراچی پاکستان کا واحد شہر ہوگا جہاں پنک ٹیکسی بھی شروع ہوگی، سونامی وارننگ آئی ہماری قیادت اور منتخب نمائندے میدان میں تھے، گزشتہ سیلاب اور کورونا میں سندھ حکومت نے تمام لوگوں کو ریلیف دیا۔
کسی کو احساس ہے کہ سیلاب میں 21لاکھ مکانات گرے ،ہم بنانے جارہے ہیں، گوگل سرچ کریں، پوری دنیا میں اتنی تعداد میں کسی نے گھر نہیں بنائے۔
صوبائی وزیر نے کہا کہ کورونا کے سینٹر بنائے گئے عوام کا پیسہ عوام کے پر خرچ کیا، لاکھوں افراد کو بارش میں پکا پکایا کھانا پہنچایا گیا، لوگوں کی زمینیں تباہ ہوگئیں،5ہزار روپے فی ایکڑ کسانوں کو دیے، اس میں ورلڈبینک کی مدد شامل ہے مگر یہ قرضہ سندھ حکومت نے اتارنا ہے۔
