بھارتی ٹیم کے اوپنر بیٹر شیکھر دھون نے پاکستان اور آسٹریلیا کے وارم اپ میچ کی ویڈیو شیئر کرکے پاکستانی فیلڈنگ پر تنقید کردی۔
ورلڈ کپ سے قبل گزشتہ روز پاکستان اور آسٹریلیا کے درمیان وارم اپ میچ کھیلا گیا، آسٹریلیا کی جانب سے دیے گئے 352 رنز کے تعاقب میں پاکستانی ٹیم 337 رنز پر آل آؤٹ ہوگئی اور یوں میچ آسٹریلیا نے 14 رنز سے جیت لیا۔
پاکستان کو اپنے پہلے وارم اپ میچ میں نیوزی لینڈ سے پانچ وکٹوں سے شکست ہوئی تھی۔
تاہم شیکھر دھون نے وارم اپ میچ میں پاکستان کی فیلڈنگ کو تنقید کا نشانہ بنایا اور ویڈیو شیئر کردی۔
میچ کے دوران 23 ویں اوور میں حارث رؤف کی پہلی گیند گیند باؤنڈری پر جانے سے رُک سکتی تھی لیکن وسیم جونیئر اور محمد نواز کی گیند روکنے کی کوشش نے باؤنڈری کروادی۔
ویڈیو میں دیکھا جاسکتا ہے کہ دونوں فیلڈرز کے درمیان کوئی غلط فہمی ہوگئی تھی جس کی وجہ سے گیند نہ روک پائے۔
Pakistan & fielding never ending love story #PakistanFielding #PakCricket pic.twitter.com/AJzT90hgNM
— Shikhar Dhawan (@SDhawan25) October 3, 2023
بھارتی کرکٹر نے طنزیہ لکھا ‘پاکستانی ٹیم اور فیلڈنگ کے درمیان نہ ختم ہونے والی محبت کی کہانی’۔
شیکھر دھون کی تنقید پر پاکستانی شائقین کرکٹ کی جانب سے انہیں تنقید کا نشانہ بنایا جارہا ہے اور انہیں 2017 چیمپئنز ٹرافی کی یاد دلائی جارہی ہے۔