اسلام آباد: شہدا فورم بلوچستان نے سپریم کورٹ آف پاکستان میں پٹیشن دائر کرتے ہوئے استدعا کی ہے کہ شہدا کے خاندانوں کو مکمل معاوضہ دیا جائے۔
تفصیلات کے مطابق پیٹرن انچیف شہدا فورم بلوچستان نوابزاہ جمال رئیسانی کی طرف سے آرٹیکل184 (3) کے تحت سپریم کورٹ میں ایک پٹیشن دائر کی گئی ہے، جس میں استدعا کی گئی ہے کہ شہدا کے خاندانوں کو مکمل معاوضہ دیا جائے اوردہشت گردوں کے خلاف زیر التوا مقدمات کو جلد از جلد نمٹایا جائے۔
یہ پٹیشن دائر کرنے کا مقصد شہدا کے خاندانوں کی حفاظت کے لیے آرٹیکل 9، 14، 15، 17، 18، 25 کے تحت ضمانت دیے گئے بنیادی حقوق کے تحفظ اور نفاذ کے لیے امتیازی سلوک کے خلاف اقدام ہے۔
پٹیشن میں سیکریٹری وزارتِ دفاع، وزارتِ اطلاعات، وزارتِ قانون اور چاروں صوبوں کے چیف سیکریٹریز کو فریق بنایا گیا ہے۔
پٹیشن میں استدعا کی گئی ہے کہ ریاست ایسے انتظامات کرے کہ لاپتا افراد کے صیغے کے غلط استعمال کو روکا جا سکے، کیوں کہ اکثر لاپتا افراد ریاست اور قانون نافذ کرنے والے اداروں کے خلاف لڑتے ہوئے پائے گئے ہیں۔
