نیویارک :امریکی سوشل میڈیا ایپلی کیشن اسنیپ چیٹ کی انتظامیہ نے بڑا فیصلہ کرتے ہوئے اہم عہدوں پر فائز متعدد افسران کو نوکری سے فارغ کردیا۔
تفصیلات کے مطابق امریکی ملٹی میڈیا انسٹنٹ میسجنگ ایپ اسنیپ چیٹ نے کمپنی کی پیداواری صلاحیت میں اضافے کے لیے مبینہ طور پر "تقریباً 20 پروڈکٹ منیجرز” کو ملازمت سے برطرف کردیا ہے۔
اس حوالے سے غیرملکی خبر رساں ادارے کی رپورٹ میں بتایا گیا ہے کہ اسنیپ چیٹ نے اپنی پیداواری صلاحیت کو بہتر کرنے کے لیے منیجمنٹ ٹیم میں کچھ بڑی تبدیلیاں کی ہیں۔
کمپنی کا یہ اقدام گزشتہ چند ماہ کے دوران کمپنی کی جاری تنظیم نو کی کوششوں کے سلسلے کے تناظر میں سامنے آیا ہے تاہم رواں سال کی جانے والی ملازمین کی یہ برطرفیاں گزشتہ سال کی جانے والی 13 سو ملازمین کی برطرفیوں کی نسبت بہت کم ہیں۔
اس حوالے سے کمپنی کے ترجمان کا کہنا ہے کہ ملازمین کی برطرفیوں کا مقصد فیصلہ سازی کے عمل کو تیز کرنا تھا کیونکہ جن ملازمین کو برطرف کیا گیا ان میں نچلے درجے کے ملازمین اور اعلیٰ سطح کے منیجرز شامل تھے۔
رپورٹ کے مطابق ملازمین کی برطرفی کی ایک اور ممکنہ وجہ کمپنی کی بنیادی ترجیحات کو پورا کرنے اور پیداواری صلاحیت کو بڑھانے کے لیے اخراجات کو کم کرنا ہوسکتی ہے۔
واضح رہے کہ اسنیپ چیٹ نے 2023ء کی تیسری سہ ماہی کے دوران اپنی آمدنی میں 5 فیصد اضافے کا اعلان کیا تھا، کمپنی کی آمدنی چھ ماہ میں پہلی بار 1.19 بلین ڈالر تک بڑھ گئی ہے۔
تاہم اشتہاری کاروبار ابھی تک بحال نہیں ہوا ہے کیونکہ اسنیپ چیٹ نے اپنے سرمایہ کاروں کو مشرق وسطیٰ میں جنگ کی صورتحال کے دوران غلط معلومات کے پھیلاؤ پر قابو پانے کے لیے کیے جانے والے اقدامات کی وجہ سے سوشل نیٹ ورکس پر اشتہاری سرگرمیوں میں کمی سے خبردار کیا تھا۔
