پی ٹی آئی میں توڑ پھوڑ کے بعد ایم کیو ایم سندھ اسمبلی میں اپوزیشن لیڈر کی تبدیلی چاہتی ہے اور اب پی پی قیادت نے اسپیکر سندھ اسمبلی کو اپوزیشن لیڈر تبدیل کرنے کی اجازت دے دی ہے۔
اے آر وائی نیوز کے مطابق 9 مئی واقعے کے بعد پی ٹی آئی میں توڑ پھوڑ، کئی رہنماؤں کے منحرف یا منظر عام سے غائب ہو جانے کے بعد سندھ اسمبلی دوسری بڑی پارٹی ایم کیو ایم پاکستان اپنا اپوزیشن لیڈر لانے کے لیے سرگرم ہوگئی ہے اور اس حوالے سے جی ڈی اے، ٹی ایل پی سمیت دیگر جماعتوں سے رابطے بھی جاری ہیں۔
ذرائع نے بتایا ہے کہ پیپلز پارٹی کی قیادت نے اب اسپیکر سندھ اسمبلی کو اپوزیشن لیڈر تبدیل کرنے کی اجازت دے دی ہے اور کہا ہے کہ اگر ایم کیو ایم اپوزیشن لیڈر کے لیے زیادہ نمبر ظاہر کرتی ہے تو اس کی درخواست پر عمل کیا جائے۔
ذرائع کا کہنا ہے کہ جی ڈی اے کی حمایت کے بعد ایم کیو ایم آج ہی سندھ اسمبلی میں نئی درخواست جمع کرائے گی اور درخواست جمع کرانے کے 24 گھنٹوں کے اندر نئے قائد حزب اختلاف کا نوٹیفکیشن جاری کر دیا جائے گا۔
ذرائع کا یہ بھی کہنا ہے کہ پی پی قیادت نے اپوزیشن لیڈر تبدیل کرنے کی اجازت اس لیے بھی دی ہے کہ وہ آئندہ ماہ اسمبلی مدت پوری ہونے پر نگراں سیٹ اپ کے لیے پی ٹی آئی یا موجودہ اپوزیشن لیڈر حلیم عادل شیخ سے مشاورت نہیں چاہتی۔
