بخارسٹ: یورپی ملک رومانیا میں 10 نوزائیدہ بچے کرونا وائرس میں مبتلا ہوگئے۔
غیرملکی خبررساں ادارے کی رپورٹ کے مطابق رومانیا میں والدین کے کرونا وائرس ٹیسٹ کی رپورٹ منفی آنے کے باوجود 10 نوزائیدہ بچوں میں کرونا وائرس کی تصدیق ہوگئی۔
رومانیا کے وزیر صحت نیلو تتارو کا کہنا ہے کہ شبہ ہے کہ نومولود بچوں میں کرونا وائرس طبی عملے کی غفلت کی وجہ سے پھیلا ہو۔
رپورٹ کے مطابق بچوں میں کرونا وائرس کی علامات ظاہر نہیں ہوئی ہیں اور ان میں سے ایک بچے کے علاوہ تمام بچوں کو اپنی ماؤں کے ساتھ گھر پر آئسولیشن میں رہنے کی اجازت دی گئی ہے۔
رومانیا کے وزیر صحت کا کہنا تھا کہ بچوں میں کرونا وائرس کی تصدیق کے بعد مقامی پبلک ہیلتھ ڈائریکٹوریٹ (ڈی ایس پی) چیف کو نوکری سے برخاست کردیا گیا ہے، واقعے کی مزید تحقیقات جاری ہیں۔
ایک بچے کی والدہ کا کہنا تھا کہ ’اسپتال عملے نے ماسک نہیں پہنے ہوئے تھے، بدھ کے روز ایک ٹی وی چینل پر اس اسپتال میں کرونا وائرس کے کیسز کے بارے میں سنا تھا۔
دوسری جانب طبی عملے کا کہنا تھا کہ گزشتہ کئی روز سے فرنٹ لائن پر کام کرنے والے ڈاکٹرز اور عملے کے لیے ناکافی سامان کے بارے میں آگاہ کیا تھا لیکن طبی سامان مہیا نہیں کیا گیا۔
واضح رہے کہ رومانیا میں کرونا وائرس کے کیسز کی تعداد 4 ہزار 400 ہوگئی ہے، متاثرہ افراد میں 700 کے قریب ہیلتھ کیئر ورکرز شامل ہیں، کرونا وائرس سے ہلاکتوں کی تعداد 180 تک جاپہنچی ہے۔
