لاہور : آئی جی پنجاب ڈاکٹر عثمان انور نے اس بات کی تصدیق کی ہے کہ سانحہ جڑانوالہ کے اصل ملزمان کو گرفتار کرلیا گیا ہے۔
غیرملکی میڈیا کو انٹرویو دیتے ہوئے ان کا کہنا تھا کہ مذکورہ ملزمان سی ٹی ڈی کی تحویل میں ہیں، انہوں نے بتایا کہ کیس میں اب تک130 سے زائد افراد کو گرفتار کیا جاچکا ہے۔
ڈاکٹر عثمان انور نے کہا کہ اگلے 72 گھنٹوں میں گرجا گھروں کی مرمت تباہ حال گھروں کا معاوضہ دینے اور عبادت شروع کرانے کا فیصلہ کیا گیا ہے۔
آئی جی پنجاب نے بتایا کہ سانحے میں ملوث ملزمان کی گرفتاری کیلئے جیو فینسنگ، مصنوعی ذہانت کے سافٹ ویئرز استعمال کررہے ہیں۔،
علاوہ ازیں پولیس ذرائع کے مطابق گرفتار ہونے والے ملزمان کی شناخت عمیر سلیم عرف راجہ اور عمر سلیمان عرف روکی کے نام سے ہوئی، دونوں ملزمان آپس میں بھائی ہیں،عمیر سلیم عرف راجہ سرکاری ادارے میں درجہ چہارم کا ملازم ہے جبکہ عمر سلیمان عرف روکی ایک نجی ادارے میں ملازم ہے۔
