رحمتوں اور برکتوں والے مہینے رمضان المبارک شروع ہونے میں چند ہفتے ہی باقی رہ گئے ہیں پاکستان میں پہلا روزہ کب ہوگا محکمہ موسمیات نے پیشگوئی کر دی ہے۔
اے آر وائی نیوز کے مطابق دنیا بھر میں رحمتوں اور برکتوں والے ماہ رمضان المبارک شروع ہونے میں صرف چند ہفتے ہی باقی رہ گئے ہیں۔ پاکستان میں رمضان کا چاند کب نظر آئے گا اور پہلا روزہ کس دن ہوگا اس حوالے سے محکمہ موسمیات نے پیشگوئی کی ہے۔
محکمہ موسمیات نے رواں سال 22 مارچ کو رمضان المبارک 1444 ہجری کا چاند نظر آنے کا امکان ظاہر کرتے ہوئے کہا ہے کہ ملک میں پہلا روزہ جمعرات 23 مارچ کو ہوسکتا ہے۔
محکمہ موسمیات کی پیشگوئی کے مطابق پاکستان میں نیا چاند 21 مارچ کی شب 10 بج کر 23 منٹ پر پیدا ہوگا اور فلکیاتی پیرا میٹرز کے مطابق رمضان المبارک 1444 ہجری کا چاند نظر آنے کا امکان 22 مارچ 2023 کی شام یعنی 29 شعبان 1444 ہجری کو ہے۔
پی ایم ڈی نے کہا ہے کہ موسمیاتی ریکارڈ کے مطابق 22 مارچ کی شام ملک کے بیشتر حصوں میں موسم صاف یا جزوی طور پر ابر آلود رہنے کی توقع ہے۔
اگر پی ایم ڈی کی پیش گوئی کے مطابق رمضان کا ماہ مقدس شروع ہوتا ہے تو پہلا روزہ 23 مارچ جمعرات کو ہوگا۔
