امریکا میں پائلٹ کی طبیعت بگڑنے پر معمر خاتون نے ایک انجن والا طیارہ لینڈ کرکے مسافروں کی جان بچالی۔
غیرملکی خبررساں ادارے کی رپورٹ کے مطابق امریکی ریاست میسا چوسٹس کے جزیرے مارتھاز ون یارڈ میں 79 سالہ پائلٹ کی طبیعت بگڑی تو 68 سالہ خاتون نے فوری جہاز کا کنٹرول سنبھال کر ہنگامی لینڈنگ کی اور مسافروں کی جان بچالی۔
پولیس کے مطابق جب طیارہ منزل کے قریب پہنچا تو پائلٹ کی طبیعت ناساز ہوگئی اور وہ جہاز اڑانے کے قابل نہیں رہا۔
اس موقع پر خاتون مسافر نے ہنگامی لینڈنگ کی جس کے باعث طیارے کا بایاں بازو درمیان سے ٹوٹ گیا تاہم مسافر محفوظ رہے۔
رپورٹ کے مطابق پائلٹ کو تشویش ناک حالت میں بوسٹن کے اسپتال منتقل کردیا گیا ہے۔
پولیس کا کہنا ہے کہ جن خاتون نے طیارہ لینڈ کیا انہیں بالکل تجربہ نہیں تھا انہیں معمولی چوٹیں آئی ہیں جنہیں طبی امداد کے لیے اسپتال منتقل کیا گیا تھا جس کے بعد انہیں ڈسچارج کردیا گیا ہے۔