بھارت نے آئی سی سی ورلڈکپ میں لیگ مرحلے کے اپنے آخری میچ میں بھی ناقابل شکست رہتے ہوئے نیدرلینڈز کو باآسانی زیر کرلیا۔
تفصیلات کے مطابق ورلڈکپ گروپ اسٹیج کے آخری میچ میں بھارتی ٹیم نے نیدرلینڈز کو 160 رنز سے شکست دے دی۔ میزباب کی جانب سے دیے گئے 411 رنز کے ہدف کے تعاقب میں نیدرلینڈز کی ٹیم اڑتالیس ویں اوور میں 250 رنزبناکر آل آؤٹ ہوگئی۔
نیدرلینڈز کی جانب سے تیجا ندامانورو نے عمدہ بیٹنگ کرتے ہوئے چھ بلند و بالا چھکوں کی مدد سے 54 رنز اسکور کیے جب کہ سائے برینڈ 45 رنز بنا کر نمایاں رہے۔
بھارت کی طرف سے کلدیپ یادیو، رویندرا جڈیجا، محمد سراج اور جسپریت بمراہ نے 2،2 وکٹیں حاصل کیں۔
اس سے قبل بنگلورو کے ایم چنا سوامی اسٹیڈیم میں پہلے بیٹنگ کرتے ہوئے بھارتی ٹیم نے 4 وکٹوں کے نقصان پر410 رنز کا پہاڑ کھڑا کیا تھا۔ شریاس آئیرنے شاندارسنچری اسکور کرتے ہوئے 128 رنز کی اننگز کھیلی۔
مڈل آرڈر بیٹر کے ایل راہول بھی بھرپور فارم میں نظر آئے اور انھوں نے جارحانہ انداز اپناتے ہوئے 62 گیندوں پر سنچری اسکور کی۔
کپتان روہت شرما61 رنز بنا کر پویلین لوٹے، اس کے علاوہ اوپنر شبمن گل اور ویرات کوہلی نے 51، 51 رنز اپنے نام کے آگے درج کروائے۔
واضح رہے کہ بھارتی ٹیم ورلڈکپ میں اب تک ناقابل شکست ہے اور اس نے اپنے تمام 9 لیگ میچز میں کامیابی حاصل کی ہے۔ پہلے سیمی فائنل میں بھارت اور نیوزی لینڈ کا مقابلہ ہوگا۔
