بھارتی کپتان روہت شرما کا کہنا ہے کہ جن نوجوانوں پلیئرز میں ٹیسٹ کرکٹ کھیلنے کی بھوک نہیں پھر ایسے کرکٹرز کو کھلانے کا کیا فائدہ۔
بھارتی کرکٹرز شریاس آئیر اور ایشان کشن رانجی ٹرافی کے میچز نہ کھیلنے کے بعد تنقید کی زد میں ہیں۔ بورڈ آف کنٹرول فار کرکٹ ان انڈیا کی جانب سے انھیں خصوصی طور پر شرکت کے لیے کہا گیا تھا تاہم انھوں نے اس بات کو ماننے سے انکار کردیا۔
انگلینڈ کو رانچی میں چوتھے ٹیسٹ میں پانچ وکٹوں سے شکست دینے کے بعد کپتان روہت شرما نے نوجوان پلیئرز کے بارے میں بھی گفتگو کرتے ہوئے کہا کہ وہ کرکٹ کے طویل ترین فارمیٹ کو کھیلنے کے لیے پرشوق نظر نہیں آرہے ہیں۔
انھوں نے کہا کہ جن پلیئرز کو ٹیسٹ کرکٹ کی بھوک نہیں ہے، وہ دیکھ کے ہی پتا چل جاتا ہے، پھر ان سب کو کھلانے کا کیا فائدہ؟
واضح رہے کہ روہت کو خود بھارتی ٹیسٹ ٹیم میں مستقل جگہ حاصل کرنے کے لیے طویل عرصے تک جدوجہد کرنا پڑی تھی۔ انھوں نے اپنے ٹیسٹ کیریئر کا شاندار آغاز کیا تھا۔
موجودہ بھارتی کپتان نے 2013 میں اپنی پہلی دو ٹیسٹ اننگز میں مڈل آرڈر میں بلے بازی کرتے ہوئے سنچریاں بنائی تھیں۔ تاہم، وہ ٹیم میں اپنی جگہ برقرار نہیں رکھ سکے تھے کیونکہ وہ کئی مواقع پر غلط شاٹس کھیل کر آؤٹ ہوئے تھے۔
تاہم جب وہ بھارت کے لیے اننگز اوپن کرنے لگے تو ان کی بیٹنگ بہتر ہوگئی، بعد ازاں ون ڈے کیریئر کی طرح روہت شرما بھارتی ریڈ بال ٹیم کا بھی ایک ناگزیر حصہ بن گئے۔
شریاس اور کشن دونوں کو مبینہ طور پر کرکٹ گورننگ باڈی کی ہدایات پر عمل نہ کرنے پر بی سی سی آئی کے سنٹرل کنٹریکٹس سے نکالے جانے کا خطرہ ہے۔
