ہیئر ٹرانسپلانٹ سرجن ڈاکٹر منظور قادر عمر نے کہا ہے کہ بالوں کے گرنے کی وجہ متناسب غذائی اجزاء کا ناکافی استعمال ہے۔
انہوں نے کہا کہ آجکل نو عمری میں بال گرنا عوام کیلئے پریشانی کا باعث ہے، جس نے مردوں کے ساتھ خواتین کو بھی متاثر کیا ہوا ہے، سرجن نے کہا کہ کسی بھی جزوی غذائی اجزاء کی کمی بال گرنے کا سبب بنتی ہے اور جن افراد میں وٹامن بی 6 کی کمی ہوتی ہے ان کے بال گرتے ہیں۔
انہوں نے کہا کہ بالوں کے گرنے کی دوسری اہم وجہ پریشانی، تنائو اور صدمہ ہے، جس کی وجہ سے بالوں کی نشوونما کیلئے ضروری غذائی اجزاء ان تک نہیں پہنچ پاتے ہیں، انہوں نے کہا کہ ٹائیفائیڈ، نزلہ زکام، جسمانی کمزوری بھی بال گرنے کا سبب بنتی ہیں۔
انہوں نے کہا کہ بالوں کو صحت مند رکھنے کیلئے روزانہ کی خوراک میں ضروری اجزاء کی مناسب مقدار استعمال کرنا ضروری ہے، بال پروٹین سے بنے ہوتے ہیں اور بالوں کی نشوونما کیلئے پروٹین ضروری ہے۔ پروٹین دودھ، مکھن، دہی، سویابین، انڈوں، گوشت اور مچھلی میں پایا جاتا ہے۔
