کراچی: ثانوی تعلیمی بورڈ کراچی نے دسویں جماعت سائنس گروپ کے نتائج کا اعلان کر دیا۔
تفصیلات کے مطابق ثانوی تعلیمی بورڈ کراچی نے دسویں جماعت سائنس گروپ کے نتائج کا اعلان کر دیا، بورڈ آف سیکنڈری ایجوکیشن کراچی کی آفیشل ویب سائٹ پر نتائج دیکھے جا سکتے ہیں، کامیابی کا کل تناسب 86.30 رہا۔
ثانوی تعلیمی بورڈ کراچی کے تحت دسویں جماعت کے نتائج کے اعلان کے لیے ایک تقریب کا اہتمام کیا گیا، جس میں پوزیشن حاصل کرنے والے طالبِ علموں کو میڈل سے نوازا گیا، اس موقع پر والدین سمیت اسکولوں کے پرنسپلز بھی موجود تھے۔
میٹرک سائنس گروپ میں پہلی اور دوسری پوزیشن لڑکیوں کے نام رہی، پہلی پوزیشن پر شہیرہ فاطمہ نے میٹرو پولس اسکول سے 94.91 فی صد نمبر حاصل کیے، فیلکن ہاؤس اسکول کی ربیسا علی نے 94.09 فی صد نمبر حاصل کر کے دوسری پوزیشن حاصل کی، جب کہ تیسری پوزیشن 93.72 فی صد نمبر کے ساتھ اسلامیہ سیکنڈری اسکول کے محمد عمر اقبال انصاری کے نام رہی۔
میٹرک سائنس گروپ میں اے ون گریڈ لینے والے طلبہ کی تعداد 33 ہزار 967 رہی، 45080 طلبہ اے، 34250 طلبہ بی، 18033 طلبہ سی جب کہ 3037 طلبہ ڈی اور 16 طلبہ ای گریڈ میں پاس ہوئے۔
میٹرک بورڈ دسویں جماعت سائنس گروپ میں کُل 1 لاکھ 56 ہزار 68 طلبہ و طالبات نے امتحانانی فارم جمع کرائے، جن میں سے 156022 امیدوار امتحانات میں شریک ہوئے، اور 1 لاکھ 34 ہزار 646 طلبہ و طالبات نے مجموعی طور پر کامیابی حاصل کی۔