لاڑکانہ : پولیس نے سندھ کے دو تھانوں میں سینیٹر اعظم سواتی کے خلاف درج مقدمات ختم کردیئے ، اعظم سواتی تاحال قمبر پولیس کی حراست میں ہے۔
تفصیلات کے مطابق لاڑکانہ میں نصیرآباد اور وارہ کے جوڈیشل مجسٹریٹ کی عدالتوں میں سینیٹر اعظم سواتی کے خلاف درج مقدمات کی رپورٹ پیش کردی گئی۔
وکیل اعظم سواتی نے بتایا کہ اعظم سواتی پر 2 تھانوں میں درج مقدمات ختم کردیئے گئے ہیں،لاڑکانہ میں ایک اور کشمور میں درج 2 مقدمات بھی ختم کئےجاچکے ہیں۔
وکیل رؤف کورائی کا کہنا تھا کہ لاڑکانہ کے 3 اضلاع میں مجموعی طور پر 5 مقدمات درج ہوچکے ہیں جبکہ اعظم سواتی کا 3 روزہ جسمانی ریمانڈ بھی مکمل ہوچکا ہے ، وہ تاحال قمبر پولیس کی حراست میں ہے۔
خیال رہے متنازع ٹویٹس کیس میں گرفتارسینیٹراعظم سواتی کی ضمانت سے متعلق درخواست کافیصلہ آج سنایا جائے گا۔۔
اسلام آباد کی عدالت نے اعظم سواتی کی درخواست ضمانت پر فیصلہ محفوظ کر رکھا ہے، پراسیکیوٹر راجہ رضوان کے معاون وکیل نے گزشتہ روز فیصلہ نہ سنانے کی استدعا کی تھی۔
