نیویارک: امریکی صدر جو بائیڈن نے کہا ہےکہ سعودی عرب اسرائیل کو تسلیم کرنے کو تیار ہے۔
امریکی صدر جو بائیڈن نے این بی سی کے ’لیٹ نائٹ ود سیٹھ میئرز‘ میں ایک تبصرے میں کہا کہ وہ قطر سمیت 6 عرب ملکوں سے رابطے میں ہیں، انہوں نے کہا کہ غزہ میں جنگ بندی سے ہمیں اس سمت میں آگے بڑھنے کا موقع ملے گا جس کے لیے بہت سے عرب ملک تیار ہیں۔
امریکی صدر کا کہنا تھا کہ اسرائیل کا وجود برقرار رکھنے کے لیے دو ریاستی حل ضروری ہے لیکن اگر اسرائیل نے رفح میں فلسطینیوں کی جانوں کا تحفظ یقینی نہ بنایا تو عالمی حمایت کھو دے گا۔
امریکی صدر جو بائیڈن نے کہا کہ اسرائیل نے غزہ کی پٹی میں رمضان کے دوران فوجی سرگرمیوں میں حصہ نہ لینے پر اتفاق کیا ہے، اگر اسرائیل ایسا نہیں کرتا ہے تو وہ عالمی حمایت حاصل نہیں کرسکے گا۔
واضح رہے کہ غزہ میں جنگ بندی کی کوششوں اور یرغمالی کی رہائی کے معاہدوں کیلئے قطر رواں ہفتے حماس اور اسرائیل کے درمیان بات چیت کی میزبانی کرے گا۔
دوسری جانب اسرائیلی وزیراعظم بن یامین نیتن یاہو کی ہٹ دھرمی برقرار ہے اور نیتن یاہو کا کہنا ہے کہ اگر معاہدہ ہو جاتا ہے تو رفح آپریشن میں تاخیر ہو سکتی ہے مگر رفح آپریشن ضرورہوگا۔
