کراچی: صوبہ سندھ میں اب اسکول سے رہ جانے والے بچوں کو 4 سال میں آٹھویں تک تعلیم دی جائے گی۔
تفصیلات کے مطابق سندھ میں نان فارمل ایجوکیشن طریقہ کار کے تحت آؤٹ آف اسکول چلڈرن کو مختصر عرصے میں تعلیم مکمل کرنے میں مدد دینے کا فیصلہ کیا گیا ہے۔
وزیر تعلیم و معدنیات سندھ سردار علی شاہ نے ایک اجلاس میں کہا کہ نان فارمل ایجوکیشن طریقہ کار کے تحت اسکول سے رہ جانے والا بچہ مختصر عرصے میں آٹھویں کلاس تک 4 سال میں تعلیم مکمل کر سکے گا، اس طریقہ کار کی مدد سے آئندہ چار سالوں میں سندھ میں 20 لاکھ سے زائد بچوں اور بچیوں کو تعلیم دی جا سکے گی۔
انھوں نے کہا نان فارمل ایجوکیشن طریقہ کار کے تحت آؤٹ آف اسکول چلڈرن کو مختصر عرصے میں تعلیم مکمل کرنے کا موقع دیا جائے گا، جب کہ اسی عرصے کے دوران ووکیشنل تعلیم بھی دی جائے گی، اس ضمن میں سندھ میں نان فارمل ایجوکیشن اٹھارٹی قائم کی جائے گی، جسے جائکا اور یونیسیف کے تعاون اور پبلک پرائیویٹ پارٹنرشپ کے تحت چلایا جائے گا۔
وزیر تعلیم نے کہا نان فارمل ایجوکیشن سینٹرز ایسے علاقوں میں کھولے جائیں گے جہاں آؤٹ آف اسکول چلڈرن کی تعداد زیادہ ہوگی، سندھ پاکستان کا واحد صوبہ ہے جس نے نان فارمل ایجوکیشن کا کریکیولم بنانے کے ساتھ ساتھ کورس ورک بھی ترتیب دے دیا ہے۔
انھوں نے کہا ہمارا سب سے بڑا چیلنج پرائمری کے بعد ڈراپ آؤٹ کا ہے، جس کو نظر میں رکھتے ہوئے ضرورت کے تحت پرائمری اسکولوں کو اپ گریڈ کیا جائے گا، اسکولوں میں STEM ایجوکیشن سسٹم پر بھی زیادہ توجہ دینے کی ضرورت ہے، ہمیں بچوں کو سائنس، ٹیکنالاجی، انجنئرنگ اور میتھ میٹکس کے مضامین سکھانے پر توجہ دینی ہوگی۔
