اسلام آباد : ایسوسی ایشن آف الیکٹرانک میڈیا ایڈیٹرزاینڈ نیوزڈائریکٹرز نے صحافی شاہد اسلم کی گرفتاری اور ذرائع معلوم کرنے کیلئے دباؤ ڈالنے کی مذمت کی۔
تفصیلات کے مطابق ایسوسی ایشن آف الیکٹرانک میڈیا ایڈیٹرزاینڈ نیوز ڈائریکٹرز نے صحافی شاہد اسلم کی گرفتاری کی مذمت کردی۔
ایک بیان میں ایمنڈ نے کہا بول نیوز سے وابستہ شاہد اسلم کو بغیر نوٹس گرفتار کیا گیا، ان پرصحافتی ذرائع بتانے کے لیےدباؤ ڈالا جا رہا ہے جو کسی صورت قابل برداشت نہیں۔
ایسوسی ایشن آف الیکٹرانک میڈیا ایڈیٹرزاینڈ نیوز ڈائریکٹرز کا کہنا تھا کہ اسلام آباد ہائی کورٹ کے واضح احکامات کے باوجود ایف آئی اے نے روش نہیں بدلی۔
ایمنڈ نے مزید کہا کہ سائبر کرائم کی آڑ میں تواتر سے صحافیوں کی زباں بندی اور مقدمات درج کرنے کا سلسلہ جاری ہے، معلومات کاحصول صحافی کی پیشہ ورانہ ذمہ داری ہے، صحافیوں پر مقدمات کا اندراج اظہار رائے کو سلب کرنے کے علاوہ کچھ نہیں۔
ایسوسی ایشن آف الیکٹرانک میڈیا ایڈیٹرزاینڈ نیوز ڈائریکٹرز نے مطالبہ کیا کہ حکومت جعلی مقدمات کی روک تھام کے لئے عملی اقدامات کرے۔
