اسلام آباد : چیئرمین پیپلزپارٹی بلاول بھٹو کا 13 ستمبر کو لاہور پہنچنے کا امکان ہے، جہاں وہ اور آصف زرداری سی ای سی اجلاس کی صدارت کریں گے۔
تفصیلات کے مطابق چیئرمین پیپلزپارٹی بلاول بھٹو کا 13 ستمبر کو لاہور پہنچنے کا امکان ہے، ذرائع نے بتایا ہے کہ پیپلزپارٹی قیادت کچھ دن تک لاہور میں قیام کرے گی، آصف زرداری ، بلاول بھٹو سی ای سی اجلاس کی صدارت کریں گے تاہم آصف زرداری کے دورہ لاہور پر مشاورت جاری ہے۔
پارٹی ذرائع کا کہنا ہے کہ آصف زرداری لاہور نہ آنے کی صورت میں بزریعہ ویڈیو لنک سی ای سی میں شریک ہوں گے ، سی ای سی کو الیکشن کمیشن سے ملاقات پر بریفنگ دی جائے گی اور ن لیگ کی پی پی مخالف بیان بازی اور حلقہ بندیوں کے باعث الیکشن میں ممکنہ تاخیر کا معاملہ زیر غور آئے گا۔
ذرائع نے کہا کہ سی ای سی الیکشن حکمت عملی، مستقبل کا لائحہ عمل طے کرے گی اور سیاسی جماعتوں سے رابطوں سمیت مختلف آپشنز پر غور ہو گا جبکہ الیکشن سے قبل عوامی رابطہ مہم کیلئے حکمت عملی طے ہو گی۔
مرکزی مجلس عاملہ میں اے پی سی بلانے کی تجویز زیرغور آئے گی، لاہور میں سی ای سی کا مقصد پنجاب میں پارٹی فعال کرنا ہے، پی پی قیادت لاہور میں پارٹی رہنما، عہدیداروں سے ملاقاتیں کریں گے کیونکہ پیپلزپارٹی بروقت انتخابات کے حوالے سے مایوسی کا شکار ہے۔
ذرائع کے مطابق گزشتہ سی ای سی میں اراکین نے پارٹی قیادت کے فیصلوں پر تنقید کی تھی اور اجلاس بغیر کسی نتیجے کے ختم ہوا تھا۔
