پیپلز پارٹی کے چیئرمین بلاول بھٹو زرداری نے کہا ہے کہ قومی اسمبلی میں جماعت اسلامی کا ایک رکن ہے وہ میرا کیا گھیراؤ کریں گے؟ دھاندلی کے الزامات لگانے والوں کو کارکردگی سے جواب دیا جائے گا۔
کراچی کے پولو گراؤنڈ میں میئر اور ڈپٹی میئر کی تقریب حلف برداری کے بعد میڈیا سے گفتگو کرتے ہوئے انہوں نے کہا کہ ملکی تاریخ میں پہلی بار کراچی میں پی پی کے میئر اور ڈپٹی میئر منتخب ہوئے ہیں،ہم کراچی والوں کے اعتماد پر پورا اتریں گے۔
انہوں نے کہا کہ ہم اس شہر میں نفرت اور انتہاپسندی کی سیاست کا مقابلہ کئی نسلوں سے کرتے آرہے ہیں۔ ایک وقت تھا جب کراچی شہر ایک ٹیلی فون کال پرچلتا تھا، اس جیت کو شہید بےنظیر بھٹو اور پیپلزپارٹی کے شہید کارکنوں کے نام کرتے ہیں، دھاندلی کا الزام لگانے والوں کو اپنی شاندار کارکردگی سے جواب دینگے۔
ان کا کہنا تھا کہ ملک کو تمام مسائل سے کراچی ہی نکال سکتا ہے، یہاں کے مسائل سے متعلق ذاتی دلچسپی لوں گا،اس بات کا بھی جوابدہ ہوں گا کہ میں نے5سال میں کے ایم سی میں کیا کام کرائے، ہم نے کراچی کے چپے چپے میں مل کر کام کرنا ہے اورنفرت کی سیاست کا خاتمہ کرنا ہے۔
انہوں نے کہا کہ جماعت اسلامی کو مشورہ دوں گا کہ سیاسی جماعتوں کے ساتھ مل کرکام کریں، جناح ہاؤس پر حملے کرنے والوں کے ساتھ مل کر کراچی پرقبضے کی کوشش ناکام ہوگئی۔
کراچی کے مسائل صوبائی حکومت کے ساتھ وفاقی حکومت کو بھی حل کرنا ہونگے، یہاں بہت زیادہ پوٹینشل ہے کراچی خود اپنےمسائل حل کرسکتا ہے، ٹیکس بلدیاتی ادارے لگائیں گے تو بہت زیادہ ٹیکس وصول ہوگا۔
اس قبل میڈیا سے گفتگو کرتے ہوئے میئرکراچی مرتضیٰ وہاب نے کہا کہ انشاءاللہ ہم کراچی میں مثبت تبدیلی لے کر آئیں گے، کراچی والے ہماری بھرپور مدد کریں گے۔ ،
کراچی کی عوام نے پاکستان پیپلزپارٹی کا انتخابات کیا، لوگوں نے دلوں کو جوڑنے کے لئے پی پی کا انتخاب کیا، ہم کراچی سے وفاکریں گے ہم سچے دل سے کراچی کی خدمت کریں گے
