فلم اینیمل کے کردار سے بالی وڈ میں پھر سے اپنا مقام بنانے والے بوبی دیول نے اپنی 55 ویں سالگرہ کا کیک کاٹا۔
تاہم بالی وڈ اداکار کی 55 ویں سالگرہ کی خاص بات اسی مناسبت سے تیار کیا گیا 5 منزلہ کیک تھا۔ پاپارازی فوٹ گرافرز اور پرستاروں کی جانب سے بوبی دیول کے لیے سپرائز پارٹی منعقد کی گئی۔ اس منفرد کیک اور سالگرہ کی تقریب کی ویڈیو سوشل میڈیا پر وائرل ہوگئی۔
ایک ویڈیو میں بوبی دیول کو ایک بہت بھاری بھرکم ہار پہنے ہوئے بھی دیکھا جاسکتا ہے جو انھیں مداحوں نے پیش کیا تھا۔ اس ہار کو ان کے اسٹاف ممبر کی جانب سے ان کے گلے میں ڈالا گیا۔
اس کے بعد بوبی دیول نے ایک اور چھوٹا سا کیک بھی کاٹا، تاہم اس سے قبل انھوں نے چھری اٹھا کر اپنے ’اینیمل‘ والے سین کو دہرایا۔
بالی وڈ اداکار کے ایکشن اور کیک کاٹنے کے دوران فوٹو گرافرز اور ان کے مداح شور مچاتے رہے اور انھیں سالگرہ کی مبارکباد دیتے رہے۔
واضح رہے کہ آج بروز ہفتہ فلم ’اینیمل’ کے اداکار بوبی دیول اپنی 55ویں سالگرہ منارہے ہیں۔ ان کے خاص دن پر بھائی سنی دیول اور سیکڑوں مداحوں نے انھیں محبت بھرے پیغامات بھیجے ہیں۔
بوبی دیول نے 1995 میں بالی وڈ کی دنیا میں قدم رکھا اور فلم ’برسات’ میں اپنی اداکاری کے جوہر دکھاکر شاندار ڈیبیو سے نام کمایا تھا۔ اداکار اب نئی فلم ’کنگوا’میں نظر آئیں گے۔
