شہر قائد میں سخت گرمی پڑ رہی ہے، ایسے میں کچھ کھانے کا دل بھی نہیں چاہتا۔ لیکن جسم و جاں کا رشتہ برقرار رکھنے کے لیے کھانا ضروری ہے۔
اسی لیے آج ہم ہلکی پھلکی سی چنے کی دال اور قیمہ بنانے کی آسان ترکیب بتارہے ہیں جو معدے پر گراں بھی نہیں گزرے گی اور لذیذ بھی ہے۔
اجزا
قیمہ: آدھا کلو
چنے کی دال ابلی ہوئی: 200 گرام
تیل: آدھا کپ
پیاز: 2 عدد
ادرک لہسن کا پیسٹ: 2 چائے کے چمچ
نمک: ڈیڑھ چائے کا چمچ
لال مرچ پسی ہوئی: ڈیڑھ چائے کا چمچ
ہلدی: آدھا چائے کا چمچ
دھنیہ: 1 چائے کا چمچ
زیرہ بھنا اور پسا ہوا: 1 چائے کا چمچ
گرم مصالحہ: 1 چائے کا چمچ
ٹماٹر: 3 سے 4 عدد
ہرا دھنیہ: 2 کھانے کے چمچ
ہری مرچ: 4 عدد
ترکیب
سب سے پہلے تیل گرم کر کے اس میں پیاز فرائی کریں، یہاں تک کہ وہ نرم ہو جائے۔
اب اس میں ادرک لہسن کے پیسٹ کو قیمے کے ساتھ شامل کر کے دس منٹ کے لیے فرائی کر لیں۔
پھر اس میں نمک، پسی لال مرچ، ہلدی، پسا زیرہ، دھنیا اور ٹماٹر ڈال کر اچھی طرح فرائی کریں۔
اس کے بعد ایک کپ پانی شامل کریں اور ڈھک کر پکائیں، یہاں تک کہ قیمہ تقریباً تیار ہو جائے۔
پھر اس میں گرم مصالحہ اور بلی چنے کی دال شامل کر کے ڈھک دیں اور دم پر چھوڑ دیں۔
آخر میں کٹا ہرا دھنیا اور کٹی ہری مرچ ڈال کر گرم گرم چپاتی کے ساتھ سرو کریں۔
